އިންކަމް ޓެކްސް ބަޔާން ހުށަހެޅުމާއި ފައިސާ ދެއްކުމުގެ ސުންގަޑި ފަސްކޮށްފި

އިންކަމް ޓެކްސް ބަޔާން ހުށަހެޅުމާއި ފައިސާ ދެއްކުމުގެ ސުންގަޑި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ފަސްކޮށްފިއެވެ.

މީރާ އިން ބުނީ ކޮވިޑް-19 ފެތުރުން ހުއްޓުވުމުގެ ގޮތުން އަޅާފައިވާ ފިޔަވަޅުތަކަށާއި މި ހާލަތުގައި ޓެކްސް ދައްކާ ފަރާތްތަކަށް ދިމާވެފައިވާ ދަތިތަކަށް ރިޔާއަތްކޮށް އާމްދަނީން ޓެކްސް ނެގުމުގެ ޤާނޫނުގެ ދަށުން 2020 ވަނަ އަހަރަށް ހުށަހަޅަން ޖެހޭ އިންކަމް ޓެކްސް ބަޔާން ހުށަހެޅުމާއި ފައިސާ ދެއްކުމުގެ ސުންގަޑި 31 އޮގަސްޓް 2021ށް ފަސްކޮށްފައިވާ ކަމަށެވެ. އަދި 2021 ވަނަ އަހަރަށް ހުށަހަޅަންޖެހޭ ފުރަތަމަ އިންޓެރިމް ބަޔާން ހުށަހެޅުމާއި އިންޓެރިމް ޕޭމަންޓް ދެއްކުމުގެ ސުންގަޑި ވެސް 30 ސެޕްޓެމްބަރު 2021ށް ފަސްކޮށްފައިވާ ކަމަށް މީރާ އިން ބުންޏެވެ. މީރާގެ އޮންލައިން ޕޯޓަލް "މީރާކަނެކްޓް" މެދުވެރިކޮށް ޓެކްސް ބަޔާންތައް ހުށަހަޅައި ފައިސާ ދެއްކޭނެއެވެ.

އިންކަމް ޓެކްސް ބަޔާން ހުށަހެޅުމާއި ފައިސާ ދެއްކުމުގެ ސުންގަޑި މީރާ އިން ފަސްކޮށްފައިވާއިރު މި ހިނގާ ޖޫން މަހުގެ 10 ވަނަ ދުވަހާ ހަމައަށް އަތޮޅުތަކުގައި ހުރި މީރާގެ ކަލެކްޝަން ސެންޓަރުތަކުން ނަގުދު ފައިސާ ބަލައިނުގަންނާނެ ކަމަށް އެ އިދާރާ އިން ވަނީ ބުނެފައެވެ. މި ފިޔަވަޅު އެޅީ ކޮވިޑް-19 ފެތުރުން އިތުރުވުމާއެކު މޯލްޑިވްސް އިންލެންޑް ރެވެނިއު އޮޓޯރިޓީ (މީރާ) ގެ ކަސްޓަމަރުންނާއި މުވައްޒަފުންގެ ސަލާމަތާއި ރައްކާތެރިކަމަށްޓަކައި ކަމަށް މީރާއިން ބުނެއެވެ.

މީރާގެ އަތޮޅުތަކުގެ އޮފީސްތަކުން ނަގުދު ފައިސާއާއި ޗެކު ބަލައިގަތުން ވަގުތީގޮތުން ހުއްޓާލާފައިވާކަމަށް އެ އިދާރާއިން ބުނެއެވެ. މި މުއްދަތުގައި މީރާއިން ފައިސާ ބަލައިގަތުން ކުރިއަށްދާނީ ޑެބިޓް އަދި ކްރެޑިޓް ކާޑު މެދުވެރިކޮށެވެ. އަތޮޅުތެރޭގައި އުޅޭ ޓެކްސް ދައްކާ ފަރާތްތަކަށް ފަސޭހަކޮށްދިނުމުގެ ގޮތުން މީރާގެ ކަލެކްޝަން ސެންޓަރުތައް ރާއްޖޭގެ އެކި އަތޮޅުތަކުގައި ވަނީ ގާއިމްކޮށްފައެވެ. މިހާތަނަށް މީރާއިން އަންނަނީ 17 އަތޮޅެއްގައި 18 އޮފީސް ގާއިމްކޮށް އެ އޮފީސްތައް މެދުވެރިކޮށް ޚިދުމަތް ފޯރުކޮށްދެމުންނެވެ.

މާލޭގައި ހުރި މީރާގެ ކަލެކްޝަން ސެންޓަރުން ވެސް ކޮވިޑް-19އާ ގުޅިގެން ޚިދުމަތްދޭ ގޮތްތަކަށް ވަނީ ބަދަލު ގެނެސްފައެވެ. އެގޮތުން އަންނަ މަހުގެ 8 ވަނަ ދުވަހާ ހަމައަށް މީރާގެ އޮފީސް ވަނީ ބަންދުކޮށްފައެވެ. މީރާއިން ފޯރުކޮށްދޭ އެހެނިހެން ޚިދުމަތްތައް ވެސް އޮންލައިންކޮށް ލިބޭނެ އިންތިޒާމް ހަމަޖެހިފައިވާއިރު، ހުރިހާ ފަރާތްތަކުން ވެސް އޮންލައިންކޮށް ޚިދުމަތްތައް ހޯދުމަށް މީރާއިން އިލްތިމާސްކުރެއެވެ.