ހަންޓޭ މިހާރު ގޮއިދޫ ބަލާލަނީ 169 މީޓަރު މަތިން
5 ޖޫން 2021 | ހޮނިހިރު 19:22ކައިޓް ސާފް ކުރަން ދަސްކުރީ އުމުރުން 13 އަހަރުގައި
ކައިޓް ސާފިންގގައި ތަފާތު ދައްކަމުން އަންނަ ހަސަން މާހިރު (ހަންޓޭ)
ބ. އަތޮޅު ގޮއިދޫއަކީ ކުޅިވަރަށް މަރުދޭ ރައްޔިތުންތަކެއް ދިރިއުޅެމުން އަންނަ ރަށެކެވެ. ވޮލީބޯޅަ، ފުޓުބޯޅަ، ސްކޭޓް ކުރުން މިއީ މިރަށުގެ ޒުވާނުންގެ މެދުގައި އެންމެ ނަގާކިޔާ ކުޅިވަރުތަކެވެ. އެހެންނަމަވެސް މި ފަހުން ގޮއިދޫ މަޝްހޫރުވެފައި ވަނީ މޫދު ކުޅިވަރުގެ ރަށެއްގެ ގޮތުގައެވެ. ހާއްސަކޮށް ކައިޓް ސާފިންގ އަށް ގޮއިދޫ ކުދިބޮޑު ރައްޔިތުން މަރުދޭ ވާހަކައަކީ މިހާރު އާންމު ވާހަކައެކެވެ.
މިއީ އުމުރުން އެންމެ 13 އަހަރުގައި ކައިޓް ސާފް ކުރަން ފެށި ހަސަން މާހިރު (ހަންޓޭ)ގެ ވާހަކައެވެ. ހަމަޔަގީނުންވެސް ހަންޓޭއަކީ މިއަދު ގޮއިދޫ ރައްޔިތުންގެ އުންމީދާ ގުޅިފައިވާ ގޮއިދޫގެ ކައިޓް ސާފިންގ 'ކިންގް' އެވެ.
ކައިޓް ސާފް ކުރުމަކީ ހަންޓޭއަށް މިހާރު ފަސޭހަކަމެކެވެ. އެންމެ ކުޑައިރުން ފެށިގެން ކައިޓް ސާފް ކުރަން ބޭނުންވި ހަންޓޭއަށް ކައިޓް ސާފް ކުރަން ފުރުސަތު ލިބުނީ އެރަށު ޒުވަނުންތަކެއް ކައިރި ރިސޯޓަކުން ކުޑަ ކައިޓެއް ގެނައުމުންނެވެ. އެއާއިއެކު ފުރަތަމަ ދުވަހުންވެސް ކައިޓް ކޮންޓްރޯލް ކުރަން ހަންޓޭ ދަސްކުރިއެވެ. އެކަމަކު ތިންވަނަ ދުވަހު ކައިޓާއިއެކު ގޮސް ވެއްޓުނީ ފުށްޓަރު ފަރާތު ގާތަކެއްގެ މައްޗަށެވެ.
ފުރަތަމަވެސް ތަޖުރިބާ ކުރަން ޖެހުނީ އަނިޔާއެވެ. އެކަމަކު ހަންޓޭގެ ހިތްވަރަށް ބަދަލެއް ނާދެއެވެ. މިއަދު ހަންޓޭގެ ވަރަށް ބައިވަރު އުންމީދުތަކެއްވެއެވެ. އެންމެ ބޮޑު އަޒުމަކީ ބައިނަލްއަގްވާމީ މުބާރާތެއްގައި ބައިވެރިވެ، އޭނާގެ ހުނަރު ދުނިޔެއަށް ދައްކާލުމެވެ. އަދި ކައިޓްގައި އެންމެ އުހަށް އަރާ ދުނިޔޭގެ ރެކޯޑު ހެދުމަކީވެސް އޭނާގެ އުންމީދެވެ. ހަންޓޭ މިހާރު ކައިޓްގައި 169 މީޓަރު މައްޗަށް އުދުހެއެވެ. އެއާއިއެކު ހަންޓޭ ވެގެން ގޮސްފައިވަނީ ދުނިޔޭގެ ތިންވަނައަށް ކައިޓްގައި އުދުހޭ އެތުލީޓަށެވެ.
ހަންޓޭގެ ވީޑިއޯއެއް ކުޅިވަރާއި ބެހޭ ވަޒީރު އަޙްމަދު މަޙްލޫފުގެ އިތުރުން މޯލްޑިވްސް އޮލިމްޕިކް ކޮމެޓީގެ ސެކެޓްރީ ޖެނެރަލް އަހްމަދު މަރުޒޫގު ވަނީ ހިއްސާ ކުރައްވާފައެވެ. އެވީޑިއޯއަށް އެތައް ބަޔެއްގެ ސަމާލުކަން ވަނީ ހުއްޓިފައެވެ. އެ ވީޑިއޯއިން ފެންނަ ގޮތުގައި ހަންޓޭ ވަނީ ގޮއިދޫ ކުޅީގެ ބޭރުފަރާތުން ރަށުގެ ތަންކޮޅެއް ހުރަސްކޮށް ކައިޓްގައި ކުޅިއަށް ޖައްސާފައެވެ.
މީގެ އިތުރުން މަޙްލޫފް ވަނީ ހަންޓޭ 169 މީޓަރު މަތީގައި އުދުހޭ ވީޑިއޯއެއްވެސް ޓްވިޓާގައި ހިއްސާ ކުރައްވާފައެވެ.
ގޮއިދޫ ކައިޓް ސާފިންގެ ކިންގަށް ހަންޓޭވީ އެތައް ބައެއްގެ އެހީތެރިކަމާއިއެކުގައެވެ. ހަންޓޭގެ ޝުކުރުގެ ލިސްޓުވަރަށްވެސް ދިގެވެ. އެންމެ ފުރަތަމަ ރަހުމަތްތެރިންނެވެ. ދެން އާއިލާއެވެ. އެއަށްފަހު ރެޑްބުލް މޯލްޑިވްސްއާ އޭނާގެ ސްޕޮންސަރު ސްލިންގސޮޓް އެވެ.
