ކ. މާލެ
|
30 މެއި 2021 | އާދީއްތަ 18:53
ގައުމީ ފުޓްބޯޅަ ޓީމު ދުބާއީގައި ކުރިއަށްގެންދިޔަ ތަމްރީނުތަކުގެ ތެރެއިން
ގައުމީ ފުޓްބޯޅަ ޓީމު ދުބާއީގައި ކުރިއަށްގެންދިޔަ ތަމްރީނުތަކުގެ ތެރެއިން
އެފްއޭއެމް
ކޮލިފައިން މެޗުތައް ފަސްވުން
ގައުމީ ޓީމުގެ ކޮލިފައިން މެޗުތައް ފަސްވެދާނެ: ބައްސާމް
 
ގައުމީ ޓީމުގެ ދަގަނޑޭ އާއި ތޮއްޕޭ ވަނީ ޕޮޒިޓިވްވެފައި
 
ޗައިނާގައި މެޗުތައް ނުކުޅުމުގެ ފުރުސަތުވެސް އެބައޮތް
 
ރާއްޖެ، ފިލިޕީންސް އަދި ސީރިއާއަށް ޗައިނާއަށް ދެވެން ނެތް

ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެ ހިމެނޭ ގްރޫޕް އޭގެ މެޗުތައް ފަސްވެދާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

މީގެ ކުރިން އޭއެފްސީން ވަނީ ގްރޫޕް އޭގެ ބާކީ ހުރި މެޗުތައް އާދީއްތަ ދުވަހުން ފެށިގެން އަންނަ ޖޫން މަހުގެ 15 ވަނަ ދުވަހުގެ ނިޔަލަށް ޗައިނާގައި ކުޅެން ވަނީ ތާވަލުކޮށްފައެވެ. އެހެންކަމުން 25 ކުޅުންތެރިންގެ ފައިނަލް ސްކޮޑެއް އެކުލަވާލައި، ގައުމީ ޓީމުން އައީ ދުބާއީގައި ތަމްރީނުތައް ހަދަމުންނެވެ.

ރާއްޖޭގެ ގައުމީ ފުޓްބޯޅަ ޓީމުން އާދީއްތަ ހެނދުނު ސީރިއާއާއެކު ޗައިނާއަށް ދާން އޮތް ނަމަވެސް، ގައުމީ ޓީމުން އެންމެ ފަހުން ކުރި ކޮވިޑް-19 ގެ ޓެސްޓްތަކުން ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި ޒުވާން ޑިފެންޑަރު އަލީ ޝާމިސް (ތޮއްޕޭ) ޕޮޒިޓިވްވެފައިވާތީ ޓީމު ވަނީ ދުބާއީގައި މަޑުކޮށްފައެވެ. ސީރިއާ ޓީމުގައިވެސް ކޮންމެވެސް ވަރަކަށް ޕޮޒިޓިވް ކޭސްތަކެއް އުޅޭއިރު، މައުލޫމާތު ލިބޭ ގޮތުން ގުއާމާއި ފިލިޕީންސް ޓީމުގެވެސް ގިނަ ކުޅުންތެރިން ވަނީ ކޮވިޑަށް ޕޮޒިޓިވްވެފައެވެ.

ރާއްޖެ އާއި ސިރީއާ ޓީމު ދުބާއީގައި މަޑުކުރިއިރު، ޗައިނާއާ ދެކޮޅަށް އާދީއްތަ ދުވަހު އެ ގައުމުގައި ކޮލިފައިން މެޗަށް ނުކުންނަ ގުއާމުގެ ބައެއް ކުޅުންތެރިންވެސް ކޮވިޑުުގެ ސަބަބުން ޓީމާ އަދި ނުގުޅެއެވެ.

އާދީއްތަ ދުވަހު ކުރިއަށްދިޔަ އެފްއޭއެމްގެ އަހަރީ އާންމު ޖަލްސާގައި ވާހަކަދައްކަވަމުން ބައްސާމް ވިދާޅުވީ ޗައިނާގެ ސަރުކާރުން މިހާރު ނިންމާފައިވާ ނިންމުމުގެ ސަބަބުން ރާއްޖޭގެ އިތުރުން ފިލިޕީންސާއި ސީރިއާ ޓީމަށްވެސް ޗައިނާއަށް ދެވެން ނެތް ކަަމަށެވެ. އެހެންކަމުން މިކަމާ ގުޅޭގޮތުން ޗައިނާ ފުޓްބޯޅަ ފެޑެރޭޝަނުން ޗައިނާ ސަރުކާރާ މަޝްވަރާ ކުރަމުން އަންނަ ކަމަށާއި، މިކަމުގައި ހޯމަ ދުވަހުގެ ވަގުތެއްގައި އޭއެފްސީން ގޮތެއް ނިންމާނެ ކަމަށް ބެލޭ ކަމަށްވެސް ވިދާޅުވިއެވެ.

ބައްސާމް އިތުރަށް ވިދާޅުވީ މިހާރުގެ ހަލަތު އޮތް ގޮތުން މެޗުތައް ލަސްވާނެ ކަމަށް ބެލެވޭ ކަމަށާއި، ދެން އަލުން މެޗުތައް ބާއްވާއިރު ޗައިނާގައި މެޗުތައް ނުކުޅުމުގެ ފުރުސަތުވެސް އެބައޮތް ކަމަށެވެ. އެހެންކަމުން އެފަދަ ހާލަތެއްގައި ދުބާއީގައި މެޗުތައް ކުޅުމަކީ އެންމެ ބޭނުންވާ ގޮތް ކަމަށްވެސް ބައްސާމް ވަނީ ވިދާޅުވެފައެވެ.

ރާއްޖޭގެ ގައުމީ ޓީމުގެ ދަގަނޑޭ އާއި ތޮއްޕޭ ޕޮޒިޓިވްވެފައިވާތީ، ޕްރޮޓޮކޯލާ އެއްގޮތަށް އަމަލުކުރުމުގެ ގޮތުން އެ ދެ ކުޅުންތެރިން 10 ދުވަހު ދުބާއީގައި ކަރަންޓީނުވާން ޖެހޭނެއެވެ.

ކޮވިޑާ ގުޅިގެން ކޮލިފައިން މެޗުތައް ޗައިނާގައި ކުޅެން މީގެ ކުރިން ތާވަލުކުރިއިރު، ރާއްޖެއަށް ބާކީ ތިން މެޗު އެބައޮތެވެ. އެއީ ޗައިނާ އާއި، ސީރިއާ އަދި ފިލިޕީންސާ ދެކޮޅަށް ކުޅެން އޮތް މެޗުތަކެވެ. މީގެ ތެރެއިން ސީރިއާ މެޗަކީ ރާއްޖޭގެ ހޯމް މެޗެކެވެ.

އޭޝިއަން ކަޕަށް ކޮލިފައިވުމަށް ރާއްޖެއިން އަމާޒުހިފާފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ހަތަރު މެޗުން ހަތް ޕޮއިންޓާއެކު ދެވަނައިގައި ޗައިނާ އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އަދި ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެގެން އަދި ޕޮއިންޓެއް ލިބިފައިނުވާ ގުއާމެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އިމާދު ލަތީފް
0%
0%
100%
0%
0%
0%
ކޮމެންޓް