ތިންވަނަ ބުރު ނުކުޅެ ލީގު ނިންމާލައިފި، ޗެމްޕިއަންކަން މާޒިޔާއަށް

ދިރާގު ދިވެހި ޕްރިމިއާ ލީގުގެ ތިންވަނަ ބުރު ނުކުޅެ ލީގު ނިންމާލަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމުމުން، ލީގުގެ ޗެމްޕިއަންކަން މާޒިޔާ ސްޕޯޓްސް އެންޑް ރެކްރިއޭޝަނަށް ލިބިއްޖެއެވެ.

ދިވެހި ޕްރިމިއާ ލީގުގެ ކުޅުން މީގެ ކުރިން މެދުކަނޑާލީ ދެވަނަ ބުރަށްފަހުއެވެ. ދާދި ފަހުން ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން އެފްއޭއެމުގެ ރައީސް ބައްސާމް އަދީލް ޖަލީލް ވިދާޅުވީ މިހާރުގެ ހާލަތަށް ބަލާއިރު ލީގު ދިގުދެމިގެންދިއުމުގެ ބަދަލުގައި، އޭނާގެ އަމިއްލަ ވިސްނުމަކީ ލީގުގެ ދެ ބުރު ކުޅެފައިވުމާއެކު، ތިންވަނަ ބުރު ނުކުޅެ މި ހިސާބުން ލީގު ނިންމާލުން ކަމަށެވެ.

އެއާއެކު އާދީއްތަ ދުވަހު ކުރިއަށްދިޔަ އެފްއޭއެމްގެ އަހަރީ އާންމު ޖަލްސާގައި ބައްސާމް ވަނީ ލީގުގެ ތިންވަނަ ބުރު ނުކުޅެ ސީޒަން ކުރުކޮށްލުމަށް އެފްއޭއެމުގެ ހިންގާ ކޮމިޓީން ނިންމާފައިވާކަން އިއުލާން ކުރައްވާފައެވެ. މީގެ އިތުރުން އެފްއޭއެމުން ވަނީ މި އަހަރު އެފްއޭ ކަޕާއި ޕްރެޒިޑެންޓްސް ކަޕުވެސް ނުކުޅެން ނިންމާފައެވެ. މިއީ ރާއްޖޭގެ ފުޓްބޯޅަ ސީޒަން އެފްއޭ ކަޕާއި ޕްރެޒިޑެންޓްސް ކަޕް ނުބާއްވައި ނިންމާލަން ޖެހިޖެހިގެން ނިންމި ތިންވަނަ އަހަރެވެ.

ދެ ވަނަ ބުރުން ލީގު ނިންމާލުމާއެކު މާޒިޔާއިން ވަނީ ނުވަ ޕޮއިންޓުގެ ލީޑަކާއެކު ލީގު ޗެމްޕިއަންކަން ދިފާއުކޮށްފައެވެ. މާޒިޔާއަށް ކުޅުނު 14 މެޗުން 34 ޕޮއިންޓް ލިބިފައިވާއިރު، ދެވަނައިގައި އޮތް ކުލަބު ވެލެންސިއާއަށް 14 މެޗުން ލިބިފައިވަނީ 25 ޕޮއިންޓެވެ.

ލީގުގެ ތިންވަނައިގައި އޮތީ 14 މެޗުން 19 ޕޮއިންޓާއެކު ކުލަބު ގްރީން ސްޓްރީޓްސްއެވެ. ހަތަރުވަނައިގައި 14 މެޗުން 17 ޕޮއިންޓާއެކު އީގަލްސް އޮތްއިރު، ފަސްވަނައިގައި އޮތީ 14 މެޗުން 16 ޕޮއިންޓާއެކު ދަ ގްރާންޑޭ ސްޕޯޓްސް ކުލަބެވެ. އަދި ހަވަނައިގައި އޮތީ 14 މެޗުން 15 ޕޮއިންޓާއެކު ސުޕަ ޔުނައިޓެޑް ސްޕޯޓްސް (ސަސް) އެވެ. މީގެ އިތުރުން ތާވަލުގެ ހަތްވަނައިގައި އޮތް ޓީސީ ސްޕޯޓްސް ކުލަބަށް 14 މެޗުން 13 ޕޮއިންޓް ލިބިފައިވާއިރު، ޔުނައިޓެޑް ވިކްޓަރީ (ޔޫވީ) ފުލުގައި އޮތީ 14 މެޗުން 12 ޕޮއިންޓް ހޯދައިގެންނެވެ.

މި ފަހަރުގެ އެފްއޭ ކަޕާއި ޕްރެޒިޑެންޓްސް ކަޕުވެސް ނުބާއްވަން އެފްއޭއެމުން ނިންމުމާއެކު، އަންނަ އަހަރުގެ އެފްއޭ ކަޕުގެ ކޮލިފައިންއިން ޖާގަ ލިބޭނީ ލީގުގެ ދެވަނައިގައި އޮތް ވެލެންސިއާއަށެވެ.