ދަގަނޑޭ އާއި ތޮއްޕޭ ޕޮޒިޓިވްވެ ގައުމީ ޓީމާ ދުރަށް

ކޮވިޑް-19 އަށް ޕޮޒިޓިވްވުމާ ގުޅިގެން ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި ޒުވާން ޑިފެންޑަރު އަލީ ޝާމިސް (ތޮއްޕޭ) ގައުމީ ފުޓްބޯޅަ ޓީމުގެ ކޭމްޕާ ދުރަށްދާން ޖެހިއްޖެއެވެ.

ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެ ހިމެނޭ ގްރޫޕް އޭގެ ބާކީ ހުރި މެޗުތައް އާދީއްތަ ދުވަހުން ފެށިގެން އަންނަ ޖޫން މަހުގެ 15 ވަނަ ދުވަހުގެ ނިޔަލަށް ޗައިނާގައި ކުޅެން ވަނީ ތާވަލުކޮށްފައެވެ. އެހެންކަމުން 25 ކުޅުންތެރިންގެ ފައިނަލް ސްކޮޑެއް އެކުލަވާލައި، ގައުމީ ޓީމުން އައީ ދުބާއީގައި ތަމްރީނުތައް ހަދަމުންނެވެ.

ޗައިނާއަށް ފުރުމުގެ ކުރިން ދެ ފަހަރެއްގެ މަތިން ގައުމީ ޓީމުގެ ކުޅުންތެރިންނާއި އޮފިޝަލުން ކޮވިޑަށް ޓެސްޓުކުރިއިރު، އެ ޓެސްޓުތަކުން ދަގަނޑޭ އާއި ތޮއްޕޭ ވަނީ ޕޮޒިޓިވްވެފައެވެ. އެއާއެކު އެ ދެ ކުޅުންތެރިން މިހާރު ވަނީ ގައުމީ ޓީމުގެ ކޭމްޕާ ދުރަށް ގޮސްފައެވެ.

ދަގަނޑޭ އާއި ތޮއްޕޭ ޕޮޒިޓިވްވެފައިވާތީ، ޕްރޮޓޮކޯލާ އެއްގޮތަށް އަމަލުކުރުމުގެ ގޮތުން އެ ދެ ކުޅުންތެރިން 10 ދުވަހު ދުބާއީގައި ކަރަންޓީނުވާން ޖެހޭނެއެވެ. އެހެންކަމުން އެ ދެ ކުޅުންތެރިންނަށް ގައުމީ ޓީމާއެކު ޗައިނާއަށް ނުދެވޭއިރު، ކުރިއަށް އޮތް ކޮލިފައިން މެޗުތަކުގައި އެ ދެ ކުޅުންތެރިންނަށް ކުޅެވޭނެ ކަމާ މެދު ވަނީ ސުވާލު އުފެދިފައެވެ.

ދަގަނޑޭ ކޮވިޑަށް ޕޮޒިޓިވްވިއިރު، މީގެ ކުރިން މާލޭގައި ކުރިއަށްގެންދިޔަ ކޭމްޕުގެ ތެރެއިން އޭނާ ވަނީ އަންހެނުން ޕޮޒިޓިވްވުމާ ގުޅިގެން ކޭމްޕް ދޫކޮށްލާފައެވެ. އެކަމަކު ފަހުން ދަގަނޑޭ ކޭމްޕާ ގުޅުނީ ކޮވިޑަށް ޓެސްޓުކޮށް، ނަތީޖާ ނެގެޓިވްވުމުންނެވެ. މީގެ އިތުރުން ތޮއްޕޭ މީގެ ކުރިންވެސް ކޮވިޑަށް ޕޮޒިޓިވް ވެފައެވެ. އެއާއެކު ގައުމީ ޓީމުގެ ފައިނަލް ސްކޮޑާއެކު ތޮއްޕޭއަށް ދުބާއީއަށް ނުދެވުނުއިރު، އޭނާ ގައުމީ ޓީމާ ގުޅުނީ ވައިރަހުން ރަނގަޅުވެ، މިދިޔަ ހަފުތާގެ އަންގާރަ ދުވަހުއެވެ.

އާދީއްތަ ދުވަހު ގައުމީ ޓީމު ކޮލިފައިން މެޗުތައް ކުޅުމަށް ޗައިނާއަށް ދާއިރު، ކޮވިޑާ ގުޅިގެން ދަގަނޑޭ އާއި ތޮއްޕޭއަށް ކޮލިފައިންގެ ދެ މެޗު ގެއްލޭނެކަން މިހާރު ވަނީ ޔަގީންވެފައެވެ. އެއީ 10 ދުވަހަށް ދުބާއީގައި ކަރަންޓީނުވާން ޖެހުމާ ގުޅިގެން އަންނަ މަހުގެ ތިންވަނަ ދުވަހު ޗައިނާއާ ދެކޮޅަށް ކުޅޭ މެޗާއި، ހަތްވަނަ ދުވަހު ސީރިއާއާ ބައްދަލުކުރާ މެޗެވެ.

ކޮވިޑާ ގުޅިގެން ކޮލިފައިން މެޗުތައް ޗައިނާގައި ކުޅޭއިރު، ރާއްޖެއަށް ބާކީ ތިން މެޗު އެބައޮތެވެ. އެއީ ޗައިނާ އާއި، ސީރިއާ އަދި ފިލިޕީންސާ ދެކޮޅަށް ކުޅެން އޮތް މެޗުތަކެވެ. މީގެ ތެރެއިން ސީރިއާ މެޗަކީ ރާއްޖޭގެ ހޯމް މެޗެކެވެ.

އޭޝިއަން ކަޕަށް ކޮލިފައިވުމަށް ރާއްޖެއިން އަމާޒުހިފާފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ހަތަރު މެޗުން ހަތް ޕޮއިންޓާއެކު ދެވަނައިގައި ޗައިނާ އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އަދި ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެގެން އަދި ޕޮއިންޓެއް ލިބިފައިނުވާ ގުއާމެވެ.