އދ.ހަންޏާމީދޫގެ ފެނުގެ ނިޒާމް ޤާއިމްކުރުމުގެ ޢަމަލީ މަސައްކަތް ފަށައިފިއެވެ.

އެމް.ޑަބްލިއު.އެސް.ސީން އދ.ހަންޏާމީދޫގައި ކުރިއަށްގެންދާ ފެނުގެ ނިޒާމުގެ މަޝްރޫއުގެ ދަށުން ދުވާލަކު 37 ޓަނުގެ ފެން އުފެއްދޭވަރުގެ 2 ޕްލާންޓް ގާއިމުކުރުމަށް ވަނީ ހަމަޖެހިފައެވެ. އަދި މި 2 ޕްލާންޓުން އުފައްދާ ފެން ރައްކާކުރުމަށްޓަކައި 200 ޓަނުގެ 2 ތާނގީ ބެހެއްޓުމަށް ނިންމާފައިވެއެވެ. އެއާއެކު ވިއްސާރަ މޫސުމުގައި ވާރޭފެން ރައްކާކުރުމަށްޓަކައި 503 ޓަނުގެ ތާނގީއެއް ބެހެއްޓުމަށްވެސް ހަމަޖެހިފައިވެއެވެ.

ހަންޏާ މީދޫގައި ފެން އުފެއްދުމަށްޓަކައި ފެން ނަގަން ހަމަޖެހިފައިވަނީ ބިމުގެ 30 ނުވަތަ 40 މީޓަރު އަޑިއަށް ބޯހޯލް ތޮރުފައިގެންނެވެ. އެގޮތުން އެރަށުން ފެން ނެގުމަށް 2 ބޯހޯލް ތޮރުފާނެކަމަށް އެމް.ޑަބްލިއު.އެސް.ސީން ބުނެއެވެ.

މި މަޝްރޫއުގެ އަމަލީ މަސައްކަތް ފެށިގެން ކުރިއަށްދާއިރު, މިހާރު ކުރެވެމުންދަނީ, ފެންހޮޅި ވަޅުލުމާއި އާރް.އޯ ފެސިލިޓީ ބިލްޑިންގ އިމާރާތް ކުރުމުގެ މަސައްކަތް ކަމަށް އެކުންފުނިން ބުނެއެވެ.

ހަންޏާމީދޫގައި ގާއިމުކުރާ ފެނުގެ ނިޒާމު ވެގެންދާނީ ދުނިޔޭގެ ފެންވަރުގެ ތަކެތި ބޭނުންކޮށްގެން ގާއިމުކުރާ ނިޒާމަކަށްކަމަށް އެމްޑަބްލިއުއެސްސީއިން ބުނެއެވެ. އަދި މިނިޒާމު ފަރުމާކޮށްފައިވަނީ ކުރިއަށް އޮތް 15 ނުވަތަ 20 އަހަރަށްވެސް އެއްވެސް ދަތިކަމެއްނެތި ޚިދުމަތް ދެވޭގޮތަށް ކަމަށް އެކުންފުނިން މައުލޫމާތުދެއެވެ.