ޗެމްޕިއަންސް ލީގު ފައިނަލް: ގާޑިއޯލާއަށް އޮތް ޕްރެޝަރެއް

ޔުއެފާ ޗެމްޕިއަންސް ލީގުގެ ފައިނަލުގައި ޗެލްސީއާ ދެކޮޅަށް ނުކުންނައިރު، ކޯޗެއްގެ ގޮތުގައި އަބަދުވެސް ޕްރެޝަރު އޮންނާނެ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

މި މުބާރާތުގެ ފައިނަލަށް ސިޓީ ދަތުރުކޮށްފައިވަނީ ސެމީ ފައިނަލުގައި ޕީއެސްޖީ އަތުން 4-1 ގެ އެގްރިގޭޓް ނަތީޖާއަކުން މޮޅުވެގެންނެވެ. މިއީ ސިޓީގެ ތާރީޚުގައި އެ ޓީމުން ޗެމްޕިއަންސް ލީގުގެ ފައިނަލުގައި ވާދަކުރާ ފުރަތަމަ ފަހަރެވެ. އަދި މިއީ ޔޫރަޕުގެ މުބާރާތެއްގެ ފައިނަލުން އެ ޓީމު ޖާގަ ހޯދި ދެވަނަ ފަހަރެވެ. އެގޮތުން 1970 ވަނަ އަހަރުގެ ޔޫރަޕިއަން ކަޕް ވިނާސް ކަޕް ފައިނަލުގައި ސިޓީ ވަނީ ވާދަކޮށްފައެވެ.

މި ފަހަރުގެ ފައިނަލަށް ސިޓީ ގޮވައިގެން ގާޑިއޯލާ ނުކުންނައިރު، އޭނާ އެންމެ ފަހުން ޗެމްޕިއަންސް ލީގު ކާމިޔާބުކުރީ 2011 ވަނަ އަަހަރު ބާސެލޯނާގައި ހުރެއެވެ. އަދި އޭގެ ކުރިން 2009 ވަނަ އަހަރުވެސް ބާސާއެކު ގަޑިއޯލާ ޗެމްޕިއަންސް ލީގުގެ ތަށި އުފުލާލި ނަމަވެސް، ބާސާ ދޫކޮށްލި ފަހުން މިހާތަނަށް ޗެމްޕިއަންސް ލީގުގެ ފައިނަލުގައި ގާޑިއޯލާ ވާދަކޮށްފައެއް ނުވެއެވެ.

ޗެލްސީއާ ދެކޮޅަށް ކުޅޭ ފައިނަލް މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ގާޑިއޯލާ ބުނީ ކޯޗެއްގެ ގޮތުގައި މަސައްކަތްކުރާއިރު އަބަދުވެސް ޕްރެޝަރު އޮންނާނެ ކަމަށެވެ. އެކަމަކު ސިޓީގެ މެނޭޖުމަންޓުން އޭނާއަށް ޕްރެޝަރެއް ކުރިމަތިނުވާ ކަމަށާއި، ސިޓީގައި ޗެމްޕިއަންސް ލީގު ހޯދުމުގެ ޕްރެޝަރު އަބަދުވެސް އަންނަނީ ކުލބަުގެ ބޭރުން ކަމަށްވެސް ގާޑިއޯލާ ބުންޏެވެ. އަދި އޭނާ މަސައްކަތްކުރަނީ ސިޓީއަކީ ކޮންމެ މުބާރާތެއްގައިވެސް ވާދަކުރެވޭ ޓީމަކަށް ހަދައި، ކާމިޔާބު ހޯދަން ކަމަށްވެސް ވަނީ ބުނެފައެވެ.

ޗެމްޕިއަންސް ލީގުުގެ ފައިނަލުގައި ޗެލްސީ އާއި ސިޓީ ބައްދަލުކުރާއިރު، ޗެލްސީގެ ކޯޗުގެ މަގާމާ ތޯމަސް ޓުޗެލް ހަވާލުވި ފަހުން ސިޓީއާ ދެކޮޅަށް ކުޅުނު ދެ މެޗުންވެސް ޗެލްސީ ވަނީ މޮޅުވެފައެވެ. އެއީ އެފްއޭ ކަޕުގެ ސެމީ ފައިނަލުގައި 1-0 ގެ ނަތީޖާއަކުންނާއި އިނގިރޭސި ޕްރިމިއާ ލީގުގައި ސިޓީ ދަނޑުގައި ފަހަތުން އަރައި 2-1 ގެ ނަތީޖާއަކުން ޗެލްސީ މޮޅުވި މެޗެވެ.

ފައިނަލް މެޗުގެ ކުރިން ޓުޗެލް ބުނީ ގާޑިއޯލާ އިރުޝާދުދެމުން އަންނަ ޓީމަކާ ދެކޮޅަށް ކުޅުމަކީ އަބަދުވެސް އުދަނގޫވާނެ ކަމެއް ކަމަށާއި، މި ވަގުތަށް ބަލާއިރު ޔޫރަޕުގެ އެންމެ ވަރުގަދަ ޓީމަކީވެސް ސިޓީ ކަމަށެވެ. އެކަމަކު ޗެލްސީގެ ކުޅުންތެރިން ތިބީ މި މެޗަށް ވަރަށް ރަނގަޅަށް ތައްޔާރުވެފައި ކަމަށާއި، މެޗުން މޮޅުވެވޭނެ ކަމުގެ ވަރަށް ބޮޑު ޔަގީންކަމެއް އެބައޮތް ކަމަށްވެސް ބުންޏެވެ.

މި މުބާރާތުގެ ފައިނަލަށް ޗެލްސީ ދަތުރުކޮށްފައިވަނީ ސެމީގައި ރެއާލް މެޑްރިޑް އަތުން 3-1 ގެ އެގްރިގޭޓް ނަތީޖާއަކުން މޮޅުވެގެންނެވެ. މިއީ 2012 ވަނަ އަހަރު ޗެމްޕިއަންސް ލީގުގެ ފައިނަލުގައި ކުޅެ ޗެލްސީން ތަށި ހޯދި ފަހުން، އެ ޓީމު މި މުބާރާތުގެ ފައިނަލަށް ދަތުރުކުރި ފުރަތަމަ ފަހަރެވެ.

މީގެ ކުރިން ތުރުކީގެ އިސްތަންބޫލުގައި ޗެމްޕިއަންސް ލީގުގެ ފައިނަލް މެޗު ކުޅެން ތާވަލުކުރި ނަމަވެސް، ކޮވިޑް-19 ގެ ނުރައްކާ ބޮޑުވެ މެޗު ވަނީ ޕޯޗުގަލުގެ ޕޯޓޯއަށް ބަދަލުކޮށްފައެވެ. ޗެލްސީ އާއި ސިޓީ ކުޅޭ ފައިނަލް މެޗު ފަށާނީ ރާއްޖެ ގަޑިން ހޮނިހިރު ދުވަހުގެރޭ 00:00 ގައެވެ.