މާލޭ މީހުން ތިބީ އެމްޑީޕީ އަށް ރުޅިމޫނު ދައްކާ، ވޯޓުލާން އަސަޑުވެ ފޫހިވެފައޭ ބުނެ ފަރުޖައްސާކަށް ނެތީމެވެ. މުޅިމާލޭން ދެމީހުންނާ ފަޅި ނުކުމެގެންވެސް ހޮވިފައި ހުރި މޭޔަރުގެ ޢިއްޒަތް މިއަދު އޮތީ މުޢިއްޒަށެވެ.
ޖޭޕީން، އަދާލަތުން އެމްޑީއޭ އަދި ޕީޕީއެމުން ވިޔަސް، ރައްޔިތަކަށް ހުޅުވާލެވުނު ވޯޓަކުން ޑރ. މުޢިއްޒު ހޮވުނު ފުރަތަމަ މަގާމަކީ ބަޔަކު މޭކެރިޔަސް ހަމަ މޭޔަރުކަން ކަމުގައި މިއޮތީ ވެނިމިފައެވެ.
މިވަރުގެ މަގާމަކަށް މާލޭގެ ވޯޓަކުން ހޮވުނީމާ މުއިއްޒު އުޅުއްވަނީ ރައީސުލްޖުމްހޫރިއްޔާ ހެދިވަޑައިގެން ހަނދި ހަސަނަށް މޫދު ހިތަކަށް ލިބުނީމާ އުޅޭހެން ކަމަށް ވުމަކީ މާބޮޑަށް އަޖައިބުވާން ޖެހޭ ކަމެއް ނޫނެވެ.
ކޮންމެ ގޮތަކުން ނަމަވެސް މާލެ ސިޓީގެ އަޣުލަބިއްޔަތު މިހާރު މިއޮތީ ދުވަހަކުވެސް ނުލިބޭ ބަޔަކަށް ލިބިފައެވެ. އަލަށް އެއްޗެއް ލިބުމުން ކުރެވޭ އިހުސާސަކީ ތަފާތު އެއްޗެކެވެ. ގާބިހެއް ނަމަވެސް އަލަށް އެޅުމުން ކުކުޅުގެ އިހުސާސްތައް ބަންޑުންކޮށްލާ ގޮތުގެ ވާހަކަ މީހުން ދައްކައެވެ. ދެފިޔަތަޅައި ކަރުދަމާ ވާންކޮށް، ބާރަށް ގޮވާ ހުއްޓުމެއްނެތި ކާކާ ލައްވައެވެ. މެދުނުކެނޑި އެސޮރުގެ ލަގޮނޑި ކައްކަނީ އެކުކުޅަށް އެވީ ފިސާރި ބޮޑު އެހާމެ އާ ކަމެއްވީމައެވެ.
ހުވާ ކުރިފަހުން މޭޔަރާ އަދި މޭޔަރުގެ ޓީމަށް ވެސް ވެގެން މިއުޅެނީ ގާބިސް އެޅި އައު ކުކުޅަށްވީފަދަ ގޮތެކެވެ. ވާހުރިހާ ކަމަކާ ހިނގާ ކޮންމެ ހާދިސާއެއްގެ ތެރެެއަށް ދަނޑިބާނަން ފަށައިފިއެވެ. ދައުލަތުގެ މާާލީ ކަންކަމާ ވެސް ބެހެން ފަށައިފިއެވެ. މުޅިރާއްޖޭ ރައްޔިތުންގެ ޕެންޝަން ފަންޑަށް ހަދަން ޖެހޭގޮތް ވެސް މިހާރު ކިޔަނީ މުޢިއްޒުއެވެ.
ވެރިކަމުގައި ތިއްބެވި ދުވަސްވަރު އެކިއެކި ފީތަކާއި ކުލިތަކާއި ޖޫރިމަނާތަކާއި ދުއްތުރާ ރައްޔިތުންނަށް ބޮޑުވާނެހާ ގޮތަކަށް ކުރެއްވިޔަސް މިއަދު އެއީ ލާމަރުކަޒީ އަނެއް މުއިއްޒުއެވެ.
ބޯހިޔާވަހިކަމަށް އެދި މާލޭ ރައްޔިތުން ރޯރުއިމުގެ އަޑުއިވިވަޑައިގެން އެންމެ ފުން އަސަރެއް ކުރި ބޭފުޅަކީ މުއިއްޒު ކަމުގައި ބުނެއުޅެއެވެ. އެހެނީ ރައްޔިތުން ރޯތީ ކުރިއަސަރުގައި މުއިއްޒު ހުޅުމާލޭން ބައްލަވައިގަތީ މަތީ ފަންތީގެ ރޯހައުސް އެއް ކަމަށް އަޑުއިވުނު އިރެއް ވެސް ދިޔައެވެ. ޔަގީނުން ވެސް އެނގޭ ކަމެކެވެ. މާލެ ރައްޔިތުން ކިތަންމެ ބާރަށް ރުޔަސް އަޑު ނީވޭހާ ފިސާރިއުސް "ނުރޯހައުސް" އެއް ފުރަމާލޭ ބިމުގައި މުޢިއްޒު މިހާރު އެވަނީ ބިނާ ކުރައްވާފައި ކަމެވެ.
ދަންނަން ޖެހޭ އެއްކަމެއް އެބަވެއެވެ. ސިޔާސީ ކަންކަމުގައި ނަންބޯޑު ބަދަލުކޮއްގެން ކާމިޔާބު ކުރުމަށް މުއިއްޒު އެދައްކާ މޮޅުކަމާއި ހުނަރުގެ ތަފާތުކަމެވެ. އެންމެ ބޮޑު ގޮންޖެހުގައި 7 އަހަރު ވަޒީރު ކަމުގައި މުއިއްޒު ދެމި ހުންނެވުމުގެ އަސްލަކީ ވެސް މުއިއްޒުގެ ނަންބޯޑްތައް ގިނަވުން ކަމަށް ވެދާނެވެ. ޖޭޕީ، އަދާލަތު އެމްޑީއޭ އަދި ޕީޕީއެމްގެ ރުހުމުގައި ދިގުކޮށް ވަޒީރުކަން ކުރެއްވިއެވެ.
ދަނޑިވަޅު ބަލާފައި އެމްޑީޕީގެ ބަޔަކާވެސް އެކުވެ މިފަހަރު މާލޭގެ މޭޔަރުކަން ހޯއްދަވައިފިއެވެ.
ސިޔާސީ ބޮޑުމަގާމަކަށް ސަލަފުގެ ކެންޑިޑޭޓަކު ހޮވުން ދުރުކަން މުޢިއްޒަށް ވެސް އެނގިވަޑައިގަންނަވާނެވެ. މޭޔަރުކަން ހޯއްދެވި އިރު އެބަޔަކު ވެސް ތާއީދުކުރީ މުޢިއްޒަށް ކަމަށްވެއެވެ. މިހިރަ މިިހިރަ ކަންކަމުގެ މައްޗަށް ވިސްނާ ބަލާއިރު ދެން ބުއްދިއަށް އަންނަނީ ނަމުގައި ނެތް، ކަމުގައި އޮންނަ ވަރުގަދަ އަޑީ ދައުލަތެއްގެ ވާހަކައެވެ.
މިދާގޮތަށް ގޮސް، ފަހުވަގުތު ނަންބޯޑަކާ ނުލައި އަމިއްލަ ގޮތުންނޭ ކިޔައި ރައީސުލްޖުމްހޫރިއްޔާ ކަމަށް ވާދަކުރާ ކެންޑިޑޭޓަކީ މުއިއްޒުކަމަށް ނުވެއްޖެއްޔާ ކިތަންމެހާ ވެސް ރަނގަޅެވެ.
