ގއ. ވިލިނގިލީގައި ކޭސްތައް ދަނީ އިތުރުވަމުން، މިހާތަނަށް 43 މީހަކު ޕޮޒިޓިވް

ގއ.ވިލިނގިލީގައި ކޮވިޑް-19ގެ ކޭސްތައް އިތުރުވަމުންދާ ކަމަށާއި، ހާލަތު ރަނގަޅު ނޫން ކަމަށް އެރަށުގެ ކައުންސިލުން ބުނެފިއެވެ.

ވިލިނގިލީ ކައުންސިލުން ބުނީ ފާއިތުވި 24 ގަޑިއިރު 72 ސާމްޕަލެއް ނަގާފައިވާ ކަމަށާއި، އިތުރު 4 މީހަކު ޕޮޒިޓިވްވެފައިވާ ކަމަށެވެ. އަދި 54 ސާމްޕަލެއްގެ ނަތީޖާ ނުލިބޭ ކަމަށް ކައުންސިލުން ބުނެއެވެ. މިހާތަނަށް އެރަށުން 43 މީހަކު ޕޮޒިޓިވްވެފައިވެއެވެ.

Advertisement

ކައުންސިލުން ބުނީ 40 އެކްޓިވް ކޭސް ހިމެނޭއިރު، 3 މީހަކު ބަލިން ރަނގަޅުވެފައިވާ ކަމަށެވެ. އަދި މިވަގުތު 475 މީހަކު ކަރަންޓީގައި އެބަތިއްބެވެ.

ވިލިނގިލީގެ ހާލަތާ ބެހޭ ގޮތުން ޓާސްކް ފޯސްގައި އިސްކޮށް ހަރަކާތްތެރިވާ އަލީ މުހައްމަދު ވިދާޅުވީ ބަލި ކޮންޓްރޯލް ކުރުމަށް ގިނަ ފިޔަވަޅުތައް އަޅާފައިވާ ކަމަށާއި، 24 ގަޑިއިރު ޑިއުޓީ ބަހައިގެން ރަށު ތެރޭގެ ކަންކަން ބަލަހައްޓަމުންދާ ކަމަށެވެ. އެގޮތުން އަބަދުވެސް ބަނދަރު ސަރަހައްދު ބަލާނެ ކަމަށާއި، ހުއްދައާ ނުލައި އެއްވެސް ބަޔަކަށް ރަށަށް އަރައި ފައިބައި ނުހެދޭނެ ކަމަށެވެ.

އަލީ މުހައްމަދު ވިދާޅުވީ މޫސުން ގޯސްވުމާއި އަދިވެސް އެކި ސަބަބުތަކާ ހުރެ ކައިރި ރަށްރަށުގެ އޮޑިދޯނިފަހަރުތައް އެރަށުގެ ބަނދަރަށް ގާތްކުރާ ކަމަށާއި، އެފަރާތްތަކަށް ވެސް ބޭނުންވާ އާލާތްތައް ފޯރުކޮށްދޭ ކަމަށެވެ. އަދި ރަށުގެ މަސްވެރިން ވެސް ތިބެނީ ބޯޓުތަކުގައި ކަމަށާއި ރަށަށް ނާރާކަން އޭނާ ފާހަގަކުރެއްވިއެވެ.

ރަށުގެ ބަލީގެ ހާލަތަށް އަލިއަޅުވާލައި އަލީ މުހައްމަދު ވިދާޅުވީ ބައްޔަށް ގިނަ ބަޔަކު ޕޮޒިޓިވްވަމުންދާ ކަމަށާއި، މިހާތަނަށް ސްކޫލުގެ 12 ކުއްޖަކު ޕޮޒިޓިވްވެފައިވާ ކަމަށެވެ. ސްކޫލުގެ ދަރިވަރުންނަށްވުމާއެކު އެކުދިންގެ ހާލު ވަރަށް ގާތުން ބަލަމުންދާ ކަމަށާއި، އެއްދުވަހުން އަނެއް ދުވަހަށް ރަނގަޅުވަމުން އަންނަ ކަމަށެވެ. އަދި 240 ދަރިވަރުން ކަރަންޓީންގައި އެބަތިބި ކަމަށް އޭނާ ވިދާޅުވިއެވެ.

މީގެ އިތުރުން އަލީ މުހައްމަދު ވިދާޅުވީ ސްކޫލު ބަންދުކޮށްފައި އޮތް ނަމަވެސް ކިޔެވުން ކުރިއަށްދާ ކަމަށާއި، އޮންލައިންކޮށް ކުރިއަށް ގެންދާ ކްލާސްތަކުގައި ގިނަ ދަރިވަރުން ބައިވެރިވާ ކަމަށެވެ. އަދި ޓީޗަރުންނާއި ބެލެނިވެރިންގެ ފުރިހަމަ އެއްބާރުލުން ލިބޭކަން އޭނާ ފާހަގަކުރެއްވިއެވެ.

ކޮވިޑް-19ގެ ކޭސްތައް ފެނުމާއެކު އެރަށް މޮނިޓަރިންގެ ހާލަތަށް ގެނެސްފައިވާއިރު، ރައްކާތެރިވުމުގެ ގޮތުން މެއި މަހުގެ 20 ވަނަ ދުވަހުން ފެށިގެން ވަނީ ގިނަ ފިޔަވަޅުތަކެއް އަޅާފައެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ ވަކިގޮތެއް އަންގަންދެން، ވިލިނގިލީގައި ކޮންމެ ދުވަހެއްގެ ހަވީރު 6:00ން ފަތިހު 4:00ށް، އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނުކުމެއުޅުން މަނާކޮށްފައެވެ. އަދި މި ފިޔަވަޅުން ސިފައިންނާއި، ފުލުހުންނާއި، ޞިއްޙީ ޚިދުމަތް ދޭ އިދާރާތަކުގެ މުވައްޒަފުންނާއި، އެ މުވައްޒަފުން ދުއްވާ އުޅަނދުފަހަރާއި، އެމްބިއުލާންސާއި، ވިލިނގިލީ ޓާސްކުފޯހުގެ ފާސް ލިބިފައިވާ ފަރާތްތަކާއި، އަދި އެމެޖެންސީކޮށް ސިއްހީ ޚިދުމަތް ހޯދަންޖެހޭ ފަރާތްތައް އިސްތިސްނާ ވާނެއެވެ.

މީގެ އިތުރުން މޮނިޓަރިންގައި އޮންނައިރު އަމަލުކުރަންވީ އުސޫލެއް ކައުންސިލުން އާއްމުކޮށްފައިވެއެވެ. މިއުސޫލުގައިވާ ގޮތުން ފަރުމަސްވެރިކަން ކުރުމަށް ދިއުމާއި، ދޮށީ މަސްވެރިކަމަށް ދިއުމުގައި ކައުންސިލުން ހުއްދަ ނަގަން ޖެހެއެވެ. އުސޫލާ ހިލާފުވާ މީހުންނާ މެދު ފިޔަވަޅު އަޅާނެ ކަމަށް ކައުންސިލުން ބުނެއެވެ. މީގެ އިތުރުން ކަރަންޓީން ކުރެވިފައިވާ އެއްވެސް ގެއަކުން ވިޔަފާރިީގެ އެއްވެސް މުއާމަލާތެއް ކުރުމަށް ވަނީ މަނާކޮށްފައެވެ.

ބަލި ކޮންޓްރޯލް ކުރުމަށް އާއްމު ރައްޔިތުންގެ ފަރާތުން ލިބޭ އެއްބާރުލުން ކައުންސިލުން ފާހަގަކޮށްފައިވެއެވެ.