އާދީއްތަދުވަހު ބީއެމްއެލުން ކާޑު ދޫކުރަން ފަށަނީ
ކަސްޓަމާ ސާވިސް ސެންޓަރު ހުޅުވާނީ އާދީއްތަދުވަހުން ބުރާސްފަތިދުވަހަށް
ބީއެމްއެލުން ވަނީ ކަސްޓަމާ ސާވިސް ސެންޓަރު ހުޅުވައި ކާޑު ދޫކުރުމަށް ނިންމާފައި
މި އާދީއްތާގައި ބޭންކް އޮފް މޯލްޑިވްސްގެ ކަސްޓަމާ ސާވިސް ސެންޓަރު މެދުވެރިކޮށް ކާޑު ދޫކުރުމުގެ ޚިދުމަތް ދިނުމަށް އެކުންފުނިން ނިންމައިފިއެވެ.
ބީއެމްއެލުން މައުލުމާތުދޭ ގޮތުގައި އާދިއްތަދުވަހުން ބުރާސްފަތިދުވަހަށް، ކޮންމެ ދުވަހެއްގެ ހެނދުނު 10:00ން މެންދުރުފަހު 2:00ށް އެ ބޭންކުގެ ކަސްޓަމާ ސާވިސް ސެންޓަރު ހުޅުވައި ކަސްޓަމަރުންނަށް ޚިދުމަތް ދޭނެއެވެ. ކޮންމެ ދުވަހަކުވެސް ޚިދުމަތް ދޭނީ ވަކި އަދަދެއްގެ ކަސްޓަަމަރުންނަށް ކަމަށާއި ކަސްޓަމަރުންނާއި މުވައްޒަފުންގެ ރައްކާތެރިކަމަށްޓަކައި ޚިދުމަތް ދޭނީ ކިއުބީ މެދުވެރިކޮށް ދޫކުރާ އޮންލައިން ޓޯކަން އަށް ކަމަށް ބީއެމްއެލުން ބުނެއެވެ. އަދި ޚިދުމަތް ހޯދަން އަންނަ ކަސްޓަމަރުންގެ އަތުގައި ޕޮލިސް ޕާމިޓް އޮންނަން ޖެހޭނެކަމަށް ވެސް ވަނީ ބުނެފައެވެ.
ކާޑު ނަގަން އަންނައިރު، މާސްކު އަޅައި ގައިދުރުކަން ބެހެއްޓުމަަށާއި ސެންޓަރަށް ދާއިރު، އަމިއްލަ ގަލަން ގެންދިއުމަށާއި، ސެނިޓައިޒާ ބޭނުންކޮށްގެން އަތް ސާފުކުރުމަށް ބޭންކުން ވަނީ އިލްތިމާސްކޮށްފައެވެ. އަދި އުމުރުން ދުވަސްވީ މީހުންނަށާއި ޚާއްސަ އެހީއަށް ބޭނުންވާ ކަސްޓަމަރުން ކާޑު ނެގުމަށް ބޭންކަށް ދާން ނުޖެހޭނެ ކަމަށާއި އެފަދަ ކަސްޓަމަރުން ބޭންކަށް ގުޅުމަށް ބޭންކުން ވަނީ އެދިފައެވެ.
ބީއެމްއެލުން ވަނީ މެއި މަހުގެ 27 ވަނަ ދުވަހުގެ ފެށިގެން, ކަސްޓަމާ ސާވިސް ސެންޓަރު ހިމެނޭހެން, ބޭންކުގެ ހުރިހާ ގޮފިތަކަކާއި ސާވިސް ސެންޓަރުތަކެއް ހުޅުވައިގެން ޚިދުމަތް ދިނުން 10 ދުވަހަށް ހުއްޓާލަން ނިންމާފައެވެ. އެހެން ނަމަވެސް މި މުއްދަތުގެ ތެރޭގައި އޮންލައިން ބޭންކިންގެ ޚިދުމަތާއި ފައިސާ ނެގުމާއި ފައިސާ ޖަމާކުރުމުގެ ޚިދުމަތް މެދުކެނޑިގެން ނުދާނެ ކަމަށް ބުނެއެވެ.
