އީރާނުން ޔުރޭނިއަމް ފައްކާ ކުރަމުންދަނީ މަތީލެވެލްއެއްގައި – އައިއޭއީއޭ
އީރާނުން ޔުރޭނިއަމް ފައްކާކުރަމުން ދަނީ ކަންބޮޑުވާން ޖެހޭ މިންވަރަށް
އީރާންގެ ނިއުކްލިޔާ ޕްލާންޓްއެއް
އީރާނުން މިހާރު ޔޫރޭނިއަމް ފައްކާ ކުރަމުން އަންނަނީ، ނިއުކްލިޔަރ ހަތިޔާރު އުފައްދާފައިވާ މަދު ގައުމަކުން ނޫނީ ނުއުފެއްދޭނެ ވަރުގެ މަތީލެވެލްއެއްގައި ކަމަށް އިންޓަނޭޝަނަލް އެޓަމިކް އެނަރޖީ އެޖެންސީ (އައިއޭއީއޭ)ން ބުނެފިއެވެ.
އައިއޭއީއޭގެ ވެރިޔާ މަރިޔާނޯ ގްރޫސީ ވިދާޅުވީ އީރާނުން އިއުލާންކޮށްފައިވާ ގޮތަށް އެގައުމުން ޔުރޭނިއަމް ފައްކާ ކުރަމުން ގެންދާ ކަމަށް އައިއޭއީއޭގެ އިންސްޕެކްޓަރުން ކަށަވަރު ކޮށްދީފައިވާ ކަމަށެވެ. އަދި މިއީ ނިޔުކްލިއަރ ހަތިޔާރު އުފައްދާފައިވާ ދުނިޔޭގެ މަދުގައުމުތަކުން އަސްކަރީ ބޭނުންތަކަށް ޔުރޭނިއަމް އުފައްދާ މިންވަރު ކަމަށް މަރިޔާނޯ ވިދާޅުވިއެވެ. އަދި މިއީ ކަންބޮޑުވާން ޖެހޭ ފަދަ ކަމަށް ކަމަށް މަރިޔާނޯ ވިދާޅުވިއެވެ.
އިރާނުގެ ނިޔުކްލިޔަރ މައްސަލަ ހައްލުކުރުމަށް، އެގައުމާއި ދުނިޔޭގެ ބޮޑެތި ބާރުތަކާ ދެމެދު 2015 ވަނަ އަހަރު ސޮއިކުރި އެއްބަސްވުމުގެ ދަށުން، ޔުރޭނިއަމް ފައްކާކުރުމުގެ ފުރުސަތު އީރާނަށް ލިބިދެނީ 3.5 ޕަސެންޓަށެވެ. މިއީ ނިޔުކްލިޔަރ ހަކަތައިން އިލެކްޓްރިކް ކަރަންޓު އުފެއްދުމާއި ދަނޑުވެރިކަމާއި ޑޮކްޓަރީ ކަންކަންފަދަ މަދަނީ ބޭނުންތަކަށް ޔުރޭނިއަމް ފައްކާކުރަންޖެހޭ މިންވަރެވެ.
އެހެން ނަމަވެސް އެމެރިކާގެ ކުރީގެ ރައީސް ޑޮނާލްޑް ޓްރަމްޕްގެ ވެރިކަމުގައި، އެމެރިކާއިން ވަނީ އީރާނުން އެއްބަސްވުމާއި ހިލާފުވެފައިވާ ކަމަށް ބުނެ، އެއްބަސްވުމާއި ވަކިވެފައެވެ. އެކަމަކު އެމެރިކާގެ މިހާރުގެ ރައީސް ޖޯ ބައިޑެން ވަނީ އަލުން އަނބުރާ އެއްބަސްވުމަށް ރުޖޫއަވުމަށް އީރާނާއިއެކު މަޝްވަރާ ކުރާނެ ކަމުގެ އިޝާރާތެއް ދީފައެވެ.
