އިންޑިއާގެ ބަހާރަތު ބައޯޓެކުން އުފައްދާ ކޮވިޑް ވެކްސިން, ކޮވެކްސިނަށް ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯގެ ހުއްދަ ލިބޭނެކަމުގެ ޔަގީންކަން އެބައޮތް ކަމަށް އެ ކުންފުނިން ބުނެފިއެވެ.
ބަހާރަތު ބައޯޓެކުން މިހެން ބުނެފައިވަނީ ކޮވެކްސިން ބޭނުންކުރުމަށް އެމަރޖެންސީ ހުއްދައަކަށް އެދި ޑަބްލިއުއެޗްއޯއަށް ހުށަހަޅާފައިވަނިކޮށެވެ. މީގެ ކުރިން ވެސް ވެކްސިން އުފައްދާ ބައޯޓެކުން ބުނެފައިވަނީ ކޮވެކްސިނަށް ޖުލައި ނުވަތަ ސެޕްޓެމްބަރ ހިސާބުގައި އެމަރޖެންސީ ހުއްދަ ލިބޭނެކަމަށް ގަބޫލުކުރާ ކަމަށެވެ.
ކޮވެކްސިނަށް ހުއްދަ ނުލިބި ގިނަ ދުވަސްތަކެއް ވެގެން ދިއުމާއެކު، އެކަމުގެ ސަބަބުން ބޭރަށް ދަތުރުކުރުމަށް ރާވާފައިވާ ޕްލޭންތައް ނުވެދާނެކަމުގެ ބިރު ވަނީ ހީވެފައެވެ.
ޑަބްލިއުއެޗްއޯއިން ކޮވެކްސިނަށް ހުއްދަ ދީފައި ނުވާ އިރު، އެމެރިކާ، ކެނެޑާ، އަޔަރލޭންޑް އަދި އީޔޫ ގައި ވެސް ކޮވެކްސިނަށް ހުއްދަ ދީފައި ނުވެއެވެ. މިހާތަނަށް ޑަބްލިއުއެޗްއޯއިން ހުއްދަ ދީފައިވާ ވެކްސިންތަކުގެ ތެރޭގައި ފައިޒާ، މޮޑާނާ، ކޮވިޝީލްޑް ވެކްސިން ހިމެނެއެވެ. އެ ޖަމިއްޔާ އިން ބުނެފައިވަނީ ކޮވެކްސިނަށް ހުއްދަ ދިނުމަށް އަދި އިތުރު މައުލޫމާތު ބޭނުންވާ ކަމަށެވެ.
އެންޑީޓީވީން ބުނެފައިވަނީ ޑަބްލިއުއެޗްއޯއަށް ހުއްދައަށް ލުމުގެ ކުރިން ސަރުކާރާއެކު ބައްދަލުވުމެއް ބާއްވާފައިވާ ކަމަށާއި، 90 އިންސައްތަ ލިޔެކިޔުންތައް ހުށަހަޅާފައިވާ ކަމަށެވެ. އަދި ޑަބްލިއުއެޗްއަށް އިތުރަށް ހުށަހަޅަންޖެހޭ ލިޔެކިޔުންތައް ޖޫން މަހުގެ ތެރޭގައި ހުށަހަޅާނެ ކަމަށެވެ.
