އިސްލާމިކް ޔުނިވަރސިޓީ (އައިޔޫއެމް) ދެވަނަ ސެމިސްޓަރގެ ކޯސްތައް އިއުލާން ކޮށްފިއެވެ.

އައިޔޫއެމްއިން ބުނީ 2021 ވަނަ އަހަރުގެ ދެވަނަ ސެމިސްޓަރގައި އައިޔޫއެމް އާއި އައިޔޫއެމްގެ ލާރނިންގ ސެންޓަރު ތަކުގައި ޖުމްލަ 61 ކޯހެއް ފެށުމަށް ނިންމާފައިވާ ކަމަށެވެ.

އެގޮތުން ސެޓްފިކެޓް ލެވަލް އެކެއްގެ ކޯސްތަކުން ފެށިގެން މާސްޓަރސް ލެވަލްގެ ކޯސްތައް ފެށުމަށް ވަނީ ނިންމާފައެވެ.

އައިޔޫއެމްއިން ބުނީ ކޯސްތަކުގައި ބައިވެރިވާން ބޭނުންވާ ފަރާތްތަކުން، ކޯހަށް ވަނުމަށް އެދޭފޯމު ފުރިހަމަ ކުރުމަށްފަހު، ފޯމާއެކު ހުށަހަޅަންޖެހޭ ތަކެތި، 30 ޖުލައި 2021 ވަނަ ދުވަހުގެ މެންދުރުފަހު 1:00ގެ ކުރިން ޔުނިވަރސިޓީގެ ކައުންޓަރަށް ނުވަތަ އޮންލައިންކޮށް ހުށަހެޅުމަށް އެދޭ ކަމަށެވެ.

މި ކޯސްތަކާ ބެހޭ މައުލޫމާތާއި ކޯހުގައި ބައިވެރިވުމަށް އެދޭ ފޯމު ޔުނިވަރސިޓީގެ ކައުންޓަރުންނާއި ޔުނިވަރސިޓީގެ ވެބްސައިޓް www.ium.edu.mv އިން ލިބެން ހުންނާނެއެވެ. އިތުރު މައުލޫމާތު 3022120 އަދި 7923247 ނަންބަރަށް ގުޅުމުން ލިބޭނެއެވެ. ކޮންމެ ކޯހެއްވެސް ހިންގޭނީ މަދުވެގެން 15 ދަރިވަރުން އެކޯހެއްގައި ބައިވެރިވުމުން ކަމަށް ވެސް އައިޔޫއެމްއިން ބުނެއެވެ.

ފޯމާއެކު ހުށަހަޅަންޖެހޭ ތަކެއްޗާއި ފުރިހަމަނުވާ ފޯމު ބަލައިނުގަނެވޭނެކަން ފާހަގަކޮށް އައިޔޫއެމް އިން ބުނީ ބަންދު ނޫން ކޮންމެ ދުވަހަކު ފޯމު ދޫކުރުމާއި ބަލައިގަތުމަށް ހަމަޖެހިފައިވާ ކަމަށެވެ. ފޯމު ބަލައިގަންނާނީ ދިވެހިރާއްޖޭގެ އިސްލާމީ ޔުނިވަރސިޓީގެ ކައުންޓަރުގެ އިތުރުން އައިޔޫއެމް ލާރނިންގ ސެންޓަރުން (ލ.ފޮނަދޫ – ކުރީގެ ސިރާޖުއްދީން ޕްރީސްކޫލް) އާއި އައިޔޫއެމް ލާރނިންގ ސެންޓަރުން (ފުވައްމުލަކު ސިޓީ - ކުރީގެ މިސްކިތްމަގު އަންހެނުންގެ ކޮމެޓީ ޢިމާރާތް) އަދި އީ-މެއިލް ކުރާނަމަ، [email protected] އަށް ފޯމު މެއިލްކުރެވޭނެއެވެ. އޮންލައިންކޮށް ފޯމު ހުށަހަޅާނަމަ ވެބްސިޓްގައިވާ އޮންލައިން ޕޯޓަލް (admissions.ium.edu.mv) މެދުވެރިކޮށް ފޯމު ހުށަހެޅޭނެ ކަމަށް އައިޔޫއެމް އިން މައުލޫމާތު ދެއެވެ.