ހަމަލާއާ ގުޅިގެން ހައްޔަރުކުރި ފާތިހުއަކީ މީގެ ކުރިން ފުލުހުންގެ ވަޒީފާގައި ހުރި މީހެއް
22 މެއި 2021 | ހޮނިހިރު 10:32ފުލުހުންގެ ވަޒީފާއިން ވަކިވީ އަމިއްލައަށް
ރައީސް ނަޝީދަށް ދިން ހަމަލާއާ ގުޅިގެން ހައްޔަރުކުރެވުނު އަހްމަދު ފާތިހް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގައި ހައްޔަރު ކުރި އެއްޒުވާނަކީ ފުލުހުންގެ ވަޒީފާގައި އުޅުނު މީހެއް ކަމަށް އެމުއައްސަސާއިން ބުނެފިއެވެ.
ރާއްޖެއެމްވީއަށް ފުލުހުންގެ މީޑިއާ އޮފިސަރު ވިދާޅުވީ ލ. ގަން، ދުންފުނިއުފާ، 23 އަހަރުގެ އަހުމަދު ފާތިހުއަކީ މީގެ ކުރިން ފުލުހުންގެ ވަޒީފާގައި އުޅުނު މީހެއް ކަމަށާއި، ވަޒީފާއިން ވަކިވީ އަމިއްލައަށް ކަމަށެވެ. ފުލުހުންގެ ޚިދުމަތުގައި ފާތިހު އުޅުނީ ކިހާ ދުވަހު ކަމެއް އަދި މިކަމާއި ގުޅޭ އިތުރު ތަފްސީލެއް ހާމަކޮށްފައިނުވެއެވެ.
މައުލޫމާތު ލިބިފައިވާ ގޮތުގައި ފާތިހު މީގެ ކުރިން މޯލްޑިވިއަންގެ ކެބިންކްރޫއެއްގެ ވަޒިފާ ވެސް އަދާކޮށްފައިވެއެވެ.
ފާތިހު ހައްޔަރުކޮށްފައިވަނީ މިމަހުގެ 19ވީ ބުދަ ދުވަހުގެ ރޭ ބ. ދަރަވަންދޫގައި ކުރިއަށް ގެންދިޔަ ޚާއްސަ އޮޕަރޭޝަނެއްގައެވެ. އަދި އޭނާގެ ބަންދަށް ބުރާސްފަތި ދުވަހު 15 ދުވަހުގެ ބަންދުގެ މުއްދަތު ޖަހާފައިވެއެވެ.
މާލޭ ނީލޯފަރު މަގުގައި އެއްޗެއް ގޮއްވާލައިގެން ދިން ޓެރަރިސްޓް ހަމަލާއާ ގުޅިގެން ފުލުހުން މީގެ ކުރިން ވަނީ ތިން މީހަކު ހައްޔަރު ކޮށްފައެވެ. އެއީ ބޮންގޮއްވުމުގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ.
މެއި މަހުގެ ހަވަނަ ދުވަހު ދިން ހަމަލާއަށްފަހު މާލޭގެ އިތުރުން ރާއްޖޭގެ އެކި ކަންކޮޅުތަކުގައި ފުލުހުން ގެންދަނީ ޚާއްސަ އޮޕަރޭޝަންތަކެއް ހިންގަމުންނެވެ. އެގޮތުން މާލޭގައި ހިންގި އޮޕަރޭޝަންތަކުގައި 5 ގެއެއް ބަލައި ފާސްކޮށް ބައެއް ތަކެތި ފުލުހުންގެ ބެލުމުގެ ދަށަށް ގެނެސްފައިވެއެވެ. ހަމައެހެންމެ, އައްޑޫ ސިޓީގައި ހިންގި އޮޕަރޭޝަންގައި 9 މީހަކާއި ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން މައުލޫމާތުދެއެވެ.
