އަންނަ މަހު ފެށުމަށް ހަމަޖެހިފައިވާ ދެކުނު އެމެރިކާގެ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕާ އެމެރިކާ ހޯސްޓްކުރުމުގެ ފުރުސަތު ކޮލަމްބިއާއަށް ގެއްލިއްޖެއެވެ.
މި އަހަރު ބާއްވާ ކޮޕާ އެމެރިކާއަކީ މިދިޔަ އަހަރުގެ ޖޫން މަހުގެ 12 ވަނަ ދުވަހު ފެށިގެން ޖުލައި މަހުގެ 12 ވަނަ ދުވަހުގެ ނިޔަލަށް އާޖެންޓީނާ އާއި ކޮލޮމްބިއާގައި ބާއްވަން ތާވަލުކުރި މުބާރާތެވެ. އެކަމަކު ކޮވިޑް-19 އާ ގުޅިގެން މި މުބާރާތް ވަނީ މި އަހަރުގެ ހޫނު މޫސުމަށް ފަސްކޮށްފައެވެ.
އެހެންކަމުން މީގެ ކުރިން ތާވަލުކޮށްފައިވަނީ ކޮޕާ އެމެރިކާ އަންނަ ޖޫން މަހުގެ 13 ވަނަ ދުވަހު ފެށިގެން ޖުލައި މަހުގެ 10 ވަނަ ދުވަހުގެ ނިޔަލަށް އާޖެންޓީނާ އާއި ކޮލޮމްބިއާގައި ބޭއްވުމަށެވެ. އޭރު ތާވަލުކޮށްފައި އޮތް ގޮތުން ގްރޫޕް އޭގެ މެޗުތައް ކުޅޭނީ އާޖެންޓީނާގައެވެ. އަދި ގްރޫޕް ބީގެ މެޗުތައް ކުޅޭނީ ކޮލޮމްބިއާގައެވެ. އަދި އެއަށްފަހު މުބާރާތުގެ ފައިނަލް މެޗު ކުޅުމަށް ހަމަޖެހިފައި އޮތީ ކޮލޮމްބިއާގެ މެޓްރޯ ސްޓޭޑިއަމުގައެވެ.
އެކަމަކު ކޮލަމްބިއާގައި ކޮވިޑުގެ ނުރައްކާ ބޮޑުވެފައިވާއިރު، އެ ގައުމުގައި ކުރިއަށްދާ ހަޅުތާލުގެ ސަބަބުން މިހާރު ވަނީ މި މުބާރާތް ހޯސްޓްކުރުމުގެ ފުރުސަތު ކޮލަމްބިއާއަށް ގެއްލިފައެވެ. ކޮލަމްބިއާގެ ސަރުކާރާ ދެކޮޅަށް އެ ގައުމުގެ އެކި ސިޓީތަކުގައި މެދުކެނޑުމެއް ނެތި މުޒާހަރާކުރަމުންދާއިރު، މުޒާހަރާގެ ބައިވެރިން އަންނަނީ ކޮޕާ އެމެރިކާ ބާއްވައިގެން ރައްޔިތުންނަށް ހެލްތު އިންޝިއުއަރެންސް ނުލިބޭ ކަމަށް ބުނެ އަޑު އުފުލަމުންނެވެ.
އެއާއެކު މި އަހަރުގެ ނޮވެމްބަރަށް މުބާރާތް ފަސްކޮށްދިނުމަށް ކޮލަމްބިއާގެ އެފްއޭއިން އެދުނު ނަމަވެސް، ކޮންމެބޯލްއިން ނިންމީ މުބާރާތް ދެވަނަ ފަހަރަށް ފަސްނުކޮށް، މިހާރު ކަނޑައެޅިފައިވާ ތާރީޚުގައި ކުރިއަށް ގެންދިއުމަށެވެ. އެގޮތުން ކޮލަމްބިއާގައި މި މުބާރާތް ދެން ނޯންނާނެ ކަމަށްވެސް ވަނީ ނިންމާފައެވެ.
ރިޕޯޓުތައް ބުނާ ގޮތުން ކޮޕާ އެމެރިކާ ހޯސްޓްކުރުމުގެ ފުރުސަތު ކޮލަމްބިއާއަށް ގެއްލުމާއެކު، އާޖެންޓީނާއިން ވަނީ މި މުބާރާތް އެއްކޮށް އެ ގައުމުގައި ބޭއްވުމަށް އެދިފައެވެ. އެކަމަކު ކޮވިޑުގެ ނުރައްކާ ބޮޑުވެ އާޖެންޓީނާ ސަރުކާރުން މި މަހުގެ ނިޔަލަށް އެ ގައުމު ލޮކްޑައުނަކަށް ދާން ނިންމުމާއެކު، އެ އަށް ބޯލެނބުމުގެ ގޮތުން އާޖެންޓީނާގެ ފުޓްބޯޅައިގެ ރަސްމީ ހުރިހާ ހަރަކާތްތައް ސަސްޕެންޑްކުރަން އާޖެންޓީނާ ފުޓްބޯލް އެސޯސިއޭޝަން (އޭއެފްއޭ) އިން ވަނީ ނިންމާފައެވެ. އެހެންކަމުން މި މުބާރާތް ހޯސްޓުކުރުމުގެ ފުރުސަތު އާޖެންޓީނާއަށްވެސް ގެއްލިދާނެ ކަމަށް ރިޕޯޓުތައް ބުނެއެވެ.
