ކޮވިޑް ޖެހިގެން އިތުރު މީހަކު ނިޔާވެއްޖެ، މިއީ 116 ވަނަ މަރު

ކޮވިޑް-19ށް ފަރުވާ ހޯދަމުންދިޔަ އިތުރު މީހަކު ނިޔާވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ހުޅުމާލެ މެޑިކަލް ފެސިލިޓީގައި ކޮވިޑް-19ށް ފަރުވާ ހޯދަމުން ދިޔަ 93 އަހަރުގެ އަންހެނެއް ނިޔާވެފައިވާ ކަމަށެވެ. އެ މީހާ ނިޔާވެފައިވަނީ ބުރާސްފަތި ދުވަހުގެ ރޭ 10:44 ހާއިރު ކަމަށް އެޗްޕީއޭއިން ބުނެއެވެ.

Advertisement

މިއީ ރާއްޖެއިން މިބަލީގައި ނިޔާވި 116 ވަނަ މީހާއެވެ.

ބުރާސްފަތި ދުވަހުގެ ރޭ 9:00ހާއިރު 72 އަހަރުގެ ފިރިހެނެއް ވެސް ވަނީ ނިޔާވެފައެވެ. މި މީހާއަށް ވެސް ފަރުވާދެމުން ގެންދިޔައީ ހުޅުމާލޭ މެޑިކަލް ފެސިލިޓީގައެވެ. މިއީ މިބަލީގައި ނިޔާވި 115 ވަނަ މީހާއެވެ.

މީގެ އިތުރުން ކޮވިޑް ޖެހިގެން ބުރާސްފަތި ދުވަހު އިތުރު ދެ މީހުން ނިޔާވެފައިވެއެވެ. އެއީ އުމުރުން 36 އަހަރުގެ ނޭޕާލުގެ ފިރިހެނަކާއި އުމުރުން 62 އަހަރުގެ ދިވެހި ފިރިހެނެކެވެ.

ކޮވިޑް ޖެހިގެން ރާއްޖޭގައި މިފަހުން އެންމެ ގިނަ މީހުން އެއްދުވަހާ ނިޔާވެގެން ރިޕޯޓްކޮށްފައިވަނީ މި މަހުގެ 19ވީ ބުދަ ދުވަހުއެވެ. އެދުވަހު އެކަނި 7 މީހުން ވަނީ ނިޔާވެފައެވެ.

ރާއްޖެއަށް ކުރިމަތިވި ކޮވިޑް-19ގެ ހަތަރު ވަނަ ރާޅާއެކު ކޮންމެ ދުވަހަކު ވެސް ދަނީ ގިނަ ބަޔަކު ޕޮޒިޓިވްވަމުންނެވެ. އައިޖީއެމްއެޗްގެ ޑރ. މުހައްމަދު އިސްމާއިލް ވަނީ ކުރިއާ ޚިލާފަށް ކޮވިޑަށް ޕޮޒިޓިވްވާ ޒުވާނުންގެ ހާލަތު މިހާރު ވަރަށް ބޮޑަށް ސީރިއަސްވަމުން ދާކަމަށް ވިދާޅުވެފައެވެ. ދަރުމަވަންތަ ހޮސްޕިޓަލުގެ އައިސީޔޫގައި މިހާރު ފަރުވާދެމުން އަންނަ 65 ޕަސެންޓް މީހުންނަކީ އުމުރުން 40 އަހަރުން ދަށުގެ މީހުންނެވެ. ކުރިން މި ބަލީގައި ބޮޑުވަރު ވަނީ އުމުރުން ދުވަސްވީ މީހުންނަށް ކަމަށް ވިޔަސް ކޮވިޑްގެ އައު ރާޅާއެކު ހާލަތު މިހާރު ވަނީ ބަދަލުވެފައެވެ.