ބެކްލޮގުގެ އަދަދުތަކާއެކު އައު ރިކޯޑެއް، 2194 ޕޮޒިޓިވް ކޭސްއާއެކު ޖުމްލަ އަދަދު ބައި ލައްކައަށް
ފާއިތުވި 24 ގަޑިއިރު ނެގި ސާމްޕަލްތަކުގެ ތެރެއިން ޕޮޒިޓިވްވެފައިވަނީ 691 ކޭސް
މާލެ ސަރަޙައްދުގައި ކޮވިޑް-19 އަށް ރެންޑަމް ސާމްޕަލް ނެގުމަށް ޓީމުތަކުން ޙަރަކާތްތެރިވަނީ
2194 މީހުން ކޮވިޑް-19ށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން އެންމެ ފަހުން ހާމަކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ނެގި ސާމްޕަލްތަކުގެ ތެރެއިން ޕޮޒިޓިވްވެފައިވަނީ 691 ކޭސްއެވެ. 7259 ސާމްޕަލް ފާއިތުވި 24 ގަޑިއިރު ޓެސްޓްކޮށްފައިވެއެވެ. އޭގެތެރެއިން 2194 ސާމްޕަލް ޕޮޒިޓިވްވެފައިވާއިރު 1698 މީހުން ޕޮޒިޓިވްވެފައިވަނީ މާލެ ސަރަހައްދުންނެވެ. ރަށްރަށުން 467 މީހުން ޕޮޒިޓިވްވެފައިވާއިރު 29 މީހުން ޕޮޒިޓިވްވެފައިވަނީ ރިސޯޓްތަކުންނެވެ.
ފާއިތުވި 24 ގަޑި އިރު ރިޕޯޓް ކުރި ކޭސްތަކުގެ ތެެރެއިން ބުދަ ދުވަހުގެ އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00ށް ޕޮޒިޓިވްވެފައިވަނީ 691 މީހެކެވެ. ބެކްލޮގް ކްލިއަރ ކުރުމަށް ކުރަމުންދާ މަސައްކަތުން ފާއިތުވި 24 ގަޑި އިރު 1503 ސާމްޕަލެއް ޕޮޒިޓިވް ކަމަށް ދައްކައެވެ.
މިއާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 50،802ށް އަރާފައެވެ. އެކްޓިވް ކޭސްތަކުގެ އަދަދު ވަނީ 20،276ށް އަރާފައެވެ. އަދި ބަލިން ރަނގަޅުވި މީހުންގެ އަދަދު ވަނީ 30،403ށް އަރާފައެވެ.
މިވަގުތު 280 މީހަކަށް އަންނަނީ ހޮސްޕިޓަލްތަކުގައި ފަރުވާދެމުންނެވެ. އަދި 114 މީހަކު ވަނީ ނިޔާވެފައެވެ.
ރާއްޖޭގައި ކޮވިޑްގެ ހާލަތު ގޯސްވެފައިވާއިރު މާލެ ސަރަހައްދުގަޔާއި ރަށްރަށުގައި އަންނަނީ ރައްކާތެރިކަމުގެ ފިޔަވަޅުތައް އަޅަމުންނެވެ. އެގޮތުން މާލެ ސަރަހައްދުގައި ހަވީރު 4ން ފަތިހު 4ށް އަންނަނީ ކާފިއު ހިންގަމުންނެވެ.
