ރަށުގައި ފަތުރުވެރިކަން ކުރިއަރުވާ ހިންގުމަށް ކައުންސިލްތަކަށް ބޭނުންވާ ފަންނީ އެހީ ފޯރުކޮށްދޭނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މައުސޫމް މިހެން ވިދާޅުވީ ސަރުކާރުގެ ސްޓްރެޓެޖިކް ޕްލޭންގައި އެކުލަވާލާފައިވާ ޓޫރިޒަމް ސިނާއަތުގެ ސިޔާސަތުތަކުގެ ތެރޭގައި ހިމެނިފައިވާ "ޓޫރިޒަމް ޑައިވާސިފިކޭޝަން އެންޑް ލޯކަލައިޒޭޝަން" ޕްރޮޖެޓް ތައާރަފުކުރުމަށް ހުރިހާ އަތޮޅު ކައުންސިލު ރައީސުން އަދި ސިޓީ މޭޔަރުންނާ އޮންލައިންކޮށް ބޭއްވި ބައްދަލުކުރެއްވުމުގައި ވާހަކަދައްކަވަމުންނެވެ.
މިނިސްޓަރު މައުސޫމް ވިދާޅުވީ ޓޫރިޒަމުން ރައްޔިތުންނަށް ސީދާ ގޮތުންނާއި ނުސީދާގޮތުން ފައިދާ ހޯދައިދިނުމަށް ގިނަ ކައުންސިލްތަކާ ގުޅިގެން މަސައްކަތް ކުރާނެ ކަމަށެވެ. އެގޮތުން، ރަށްރަށުގެ ލޭންޑް ޔޫސް ޕްލޭން ހެދުމުގައި ޓޫރިޒަމް ޒޯން ކަނޑައެޅިގެންދާނެ ކަމަށެވެ. އަދި ރަށުގައި ފަތުރުވެރިކަން ކުރިއަރުވާ ހިންގުމަށް ކައުންސިލްތަކަށް ބޭނުންވާ ފަންނީ އެހީ އެ މިނިސްޓްރީން ފޯރުކޮށްދޭނެކަމުގެ ޔަގީންކަން މިނިސްޓަރު ދެއްވިއެވެ.
މިނިސްޓަރު މައުސޫމް ވަނީ އަވަސް މުއްދަތެއްގެ ތެރޭގައި އަތޮޅުތެރޭގައި ލޯކަލް ޓޫރިޒަމް ތަރައްގީ ވެގެން އަންނަތަން ފެންނާނެ ކަމުގެ އުއްމީދު ކައުންސިލުތަކާއި ރައްޔިތުންނަށް ދެއްވާފައެވެ.
މީގެ އިތުރުން ސީނިއަރ އެގްޒެކެޓިވް ޑިރެކްޓަރ ރައްޒާން އަދި ޑިރެކްޓަރ ޝިނާން ވަނީ ބައްދަލުވުމުގެ ބައިވެރިންނަށް ޕްރެޒެންޓޭޝަނެއް ހުށަހަޅާފައިވެއެވެ.
އެ ދެބޭފުޅުންގެ ވާހަކައިގައި އަލިއަޅުވާލައްވާފައިވަނީ ސްޓްރެޓެޖިކް އެކްޝަން ޕްލޭން 2019- 2023ގައި ފަތުރުވެރިކަމުގެ ސިނާއަތަށް ކަނޑައަޅާފައިވާ 6 ސިޔާސަތުގެ ދަށުން ކައުންސިލްތަކާ ގުޅުންހުރި އެކިއެކި ފަތުރުވެރިކަމުގެ ހަރަކާތްތަކުގެ މައުލޫމާތާއި އަދި ޓޫރިޒަމްއާ ބެހޭ ގާނޫނާއި ރާއްޖޭގެ އިދާރީ ދާއިރާތައް ލާމަރުކަޒީ ކުރުމުގެ ގާނޫނަށް ގެނެވުނު އިސްލާހުތަކާއެކު ފަތުރުވެރިކަމާ ގުޅޭ މަސައްކަތްތަކުގައި މިނިސްޓްރީއާއި ކައުންސިލްތަކާ ގުޅިގެން ކުރެވޭނެ މަސައްކަތްތަކުގެ މައްޗަށެވެ. މީގެ އިތުރުން ސީދާ ކައުންސިލްތަކުން ކުރާނެ މަސައްކަތްތަކުގެ ތެރެއިން ވަކިން ޚާއްސަކޮށް މީހުން ދިރިއުޅޭ ރަށްރަށުގައި ފަތުރުވެރިކަމުގެ ބޭނުމަށް ދޫކުރެވޭ ބިންބިމުގެ ބީލަމުގެ މަސައްކަތްތަކަށެވެ.
18 އަތޮޅު ކައުންސިލް ރައީސުންނާއި 4 ސިޓީގެ މޭޔަރުން ބައިވެރިވެވަޑައިގަތް މި ބައްދަލުވުމުގައި ކައުންސިލްތަކުގެ ރައީސުންނާއި މޭޔަރުން ވެސް ވަނީ އެ ބޭފުޅުންގެ ހިޔާލު މިނިސްޓަރާ ހިއްސާކޮށްފައެވެ.
ޓޫރިޒަމް ޑައިވާސިފިކޭޝަން އެންޑް ލޯކަލައިޒޭޝަން ޕްރޮޖެކްޓުގެ މަސައްކަތް ކުރިއަށްގެންދިޔުމަށް މިނިސްޓްރީ އިން ވަނީ މިކަމަށް ހާއްސަކޮށް "ޓޫރިޒަމް ޑައިވާސިފިކޭޝަން އެންޑް ލޯކަލައިޒޭޝަން" ޔުނިޓެއް މިނިސްޓްރީގައި ގާއިމުކޮށްފައެވެ. ކުރިއަށް އޮތްދުވަސްތަކުގައި، މި ޔުނިޓުގެ ފަރާތުން ރަށްރަށުގެ ކައުންސިލުތަކާ އެކު ޓޫރިޒަމް ޑައިވާސިފިކޭޝަން ޕްރޮޖެކްޓް ހިންގުމާބެހޭ ބައްދަލުވުންތައް ބޭއްވުމަށް ހަމަޖެހިފައިވެއެވެ.
