ޕޮޒިޓިވް ކޭސްތައް ގިނަވެ އެންމެ ފަހުން ވިލިނގިލީގައި ވެސް ކާފިއު ހިންގަނީ
ވިލިނގިލިގައި ފިޔަވަޅުތައް އެޅުމަން ނިންމާފައިވަނީ 20 މެއިން 26 މެއިގެ ނިޔަލަށް 7 ދުވަހުގެ މުއްދަތަކަށް
ގއ. ވިލިނގިލިގައި މި މަހުގެ 16 ވަނަ ދުވަހުން ފެށިގެން ކޮވިޑްގެ ކޭސްތަކެއް ފެނި ރަށުގައި ވަނީ ހާއްސަ ފިޔަވަޅުތަކެއް އަޅާފައި
ހަފްތާއެއްގެ މުއްދަތަށް ގއ. ވިލިނގިލީގައި ކާފިއު ހިންގުމާއެކު ހާއްސަ ފިޔަވަޅުތަކެއް އެޅުމަށް ނިންމައިފިއެވެ.
މި މަހުގެ 16 ވަނަ ދުވަހުން ފެށިގެން ގއ. ވިލިނގިލީގައި ރޭންޑަމް ސާމްޕަލްތަކެއް ޕޮޒިޓިވްވެ ކޮންޓެކްޓުން ޕޮޒިޓިވްވުމާއި ގުޅިގެން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ އެ ރަށުގައި ހާއްސަ ފިޔަވަޅުތަކެއް އެޅުމަށް ނިންމާފައެވެ. ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއިކުރައްވާ ނެރުނު އެންގެވުމުގައި ވަނީ 10 ކަމެއް ހިމަނާފައެވެ. ވިލިނގިލިގައި ފިޔަވަޅުތައް އެޅުމަން ނިންމާފައިވަނީ 20 މެއިން 26 މެއިގެ ނިޔަލަށް 7 ދުވަހުގެ މުއްދަތަކަށެވެ.
ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއިކުރައްވާ އަންގާރަ ދުވަހުގެރޭ ނެރުއްވި އެންގެވުމުގައި ބުނެފައިވަނީ މި ފިޔަވަޅުތަކުން، ސިފައިންނާއި ފުލުހުން، ޞިއްޙީ ޚިދުމަތް ދޭ އިދާރާތަކުގެ މުވައްޒަފުންނާއި އެ މުވައްޒަފުން ދުއްވާ އުޅަނދުފަހަރު އިސްތިސްނާވާނެ ކަމަށެވެ. މީގެ އިތުރުން އެމްބިއުލަންސް، ގއ. ވިލިނގިލި ޓާސްކުފޯހުގެ ފާސް ލިބިފައިވާ ފަރާތްތައް ވެސް އިސްތިސްނާވާނެ ކަމަށެވެ. އަދި ފަތިސް ނަމާދަށް މިސްކިތަށް ދާ ފަރާތްތަކާއި، އެމެޖެންސީކޮށް ޞިއްޙީ ޚިދުމަތް ހޯދަންޖެހޭ ފަރާތްތަކުގެ އިތުރުން އިސްތިސްނާ ހާލަތްތަކުގެ އިތުރުން، ކަނޑައަޅާ ޚާއްޞަ ހާލަތްތަކުގައި، އަންގާ ގޮތެއްގެ މަތިން ޢަމަލުކުރެވޭނެ ކަމަށެވެ.
އަދި މި ފިޔަވަޅުތައް ތަންފީޒު ކުރުމުގައި ވަގުތާއި ހާލަތަށް ރިޢާޔަތްކޮށް، އަޅަންޖެހޭ އެންމެހައި ފިޔަވަޅުތައް އަޅާނީ މޯލްޑިވްސް ޕޮލިސް ސަރވިސްއާއި ކަމާބެހޭ އެހެނިހެން މުއައްސަސާތަކުން ކަމަށް އެންގެވުމުގައި ބުނެފައިވެއެވެ. އަދި މި ފިޔަވަޅުތައް ތަންފީޛުކޮށް، އެ ފިޔަވަޅުތަކަށް ފުރިހަމައަށް ޢަމަލުކުރުމަށް، އެންމެހައި އިދާރާތަކަށާއި ފަރާތްތަކަށް އަންގާ އަދި މި އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް ޢަމަލުކުރުމަށް ވެސް އެންމެހައި ފަރާތްތަކަށް އަންގާފައިވެއެވެ.
