ހަލާލް ޓޫރިޒަމަކަށް "މޯލްޑިވްސް ހަލާލް ޓްރެވަލް"
މޯލްޑިވްސް ހަލާލު ޓްރެވަލް ޕްލެޓްފޯމްގެ ހުރިހާ ބައެއްވެސް ކުރިއަށްދާނީ އަރަބި ބަހުން
މޯލްޑިވްސް ހަލާލް ޓްރެވަލް އެމްއެމްޕީއާރުސީގެ މެނޭޖިން ޑިރެކްޓަރ ތައްޔިބު މުހައްމަދު ލޯންޗުކޮށްދެއްވަނީ
ހަލާލް ޓޫރިޒަމް ރާއްޖޭގައި ކުރިއަށް ގެންދިއުމުގެ މަގުސަދުގައި "މޯލްޑިވްސް ހަލާލް ޓްރެވަލް" ޕްލެޓްފޯމް ލޯންޗުކޮށްފިއެވެ.
މޯލްޑިވްސް ހަލާލް ޓްރެވަލް ޕްލެޓްފޯމް ލޯންޗުކޮށްފައި ވަނީ މިއަހަރުގެ އެރޭބިއަން ޓްރެވަލް މާކެޓް ގައި މެއި 16 ވަނަ ދުވަހުއެވެ. މި ޕްލެޓްފޯމް ލޯންޗުކޮށްދެއްވާފައި ވަނީ މޯލްޑިވްސް މާރކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ މެނޭޖިން ޑިރެކްޓަރ ތައްޔިބު މުހައްމަދެވެ.
މޯލްޑިވްސް ހަލާލް ޓްރެވަލް ޕްލެޓްފޯމްގެ މެނޭޖިން ޑިރެކްޓަރ ޑރ. ހުސެއިން ސަނީ އުމަރު ވިދާޅުވީ ހަލާލް ޓޫރިޒަމަކީ ގިނަ ފުރުސަތުތަކެއް ހުރި މާރކެޓެއް ކަމަށާއި މި ޕްލެޓްފޯމް މެދުވެރިކޮށް އަރަބި ގައުމުތަކުން ރާއްޖެއަށް އޮންނަ ޑިމާންޑް އިތުރުކޮށް އެގައުމުތަކުން ރާއްޖެ އަންނަ ފަތުރުވެރިންގެ އަދަދު އިތުރުކުރުމަށް ގިނަ މަސައްކަތަކެއް ރޭވިފައިވާކަމަށެވެ. މި މާރކެޓަކީ 189 ބިލިއަން ޑޮލަރުގެ ބޮޑު މާރކެޓެއް ކަމަށް ސަނީ ފާހަގަ ކުރައްވާފައިވާއިރު، މިޕްލެޓްފޯމްގެ ދަށުން، އަރަބި ގައުމުތަކުގައި ރާއްޖެ ޕްރޮމޯޓްކުރުމަށް ޚާއްސަ މަޖައްލާއެއް ނެރުމާއި، މުސްލިމުންނަށް ޚާއްސަ ޓްރެވަލް ރޭޓިންގެއް ތައާރަފްކުރުމުގެ އިތުރުން، ޕީއާރު އަދި މާރކެޓިން ތަމްރީނުތަކާއި، ކޮންފަރެންސްތައް ބޭއްވުމަށް ވެސް ވަނީ ނިންމާފައެވެ.
ޑރ ސަނީ ވަނީ ހަލާލް ޓްރެވަލް އެވޯޑެއް ބޭއްވުމުގެ ވިސްނުންވެސް ގެންގުޅޭ ކަމަށް ވެސް ވިދާޅުވެފައެވެ.
މި ދާއިރާއިން ގިނާ ދިރާސާތަކެއްކޮށް ތައުލީމާއި ތަޖުރިބާ ހާސިލް ކުރައްވާފައިވާ ޑރ ސަނީ ވަނީ މޯލްޑިވްސް ހަލާލު ޓްރެވަލް ޕްލެޓްފޯމްގެ ހުރިހާ ބައެއްވެސް ކުރިއަށްދާނީ އަރަބި ބަހުން ކަމަށް ވިދާޅުވެފައެވެ. ކޮވިޑް ބަލިމަޑުކަމުގެ ސަބަބުން އެއް މާކެޓުތަކަކަށް ބަރޯސާވެގެން ތިބެވެން ނެތްކަމަށް ހާމަވެގެން ގޮސްފިކަމަށާއި 100 އިންސައްތަ މުސްލިމް ގައުމެއްގެ ގޮތުގައި ރާއްޖެ އޮވެ، ރާއްޖެ އަށް މިކަންތައް ކާމިޔާބު ނުވާނެ އެއްވެސް ސަބަބެއް ނެތް ކަމަށްވެސް ޑރ ސަނީ ވިދާޅުވިއެވެ.
