ކުރިއަށް އޮތް ޔޫރޯ ފުޓްބޯޅަ މުބާރާތަށް އެކުލަވާލި ޖަރުމަނުގެ ގައުމީ ފުޓްބޯޅަ ޓީމުގެ ސްކޮޑުގައި ބަޔާން މިއުނިކުގެ ތަޖުރިބާކާރު ފޯވާޑް ތޯމަސް މުލާ އާއި ބޮރޫޝިއާ ޑޯޓްމުންޑުގެ ތަޖުރިބާކާރު ޑިފެންޑަރު މެޓްސް ހަމެލްސް ހިމަނައިފިއެވެ.

މި ދެ ކުޅުންތެރިން އެންމެ ފަހުން ޖަރުމަނުގެ ގައުމީ ޓީމަށް މެޗެއް ކުޅެދީފައިވަނީ 2018 ވަނަ އަހަރުގެ ނޮވެމްބަރު މަހުގެ ތެރޭގައެވެ. އޭގެ ފަހުން މުލާ އާއި ހަމެލްސްއަށްވެސް ގައުމީ ޓީމުން ފުރުސަތު ދީފައިނުވާއިރު، 2019 ވަނަ އަހަރުގެ މާޗު މަހު ދިން އިންޓަވިއުއެއްގައި ޖަރުމަނުގެ ކޯޗު ޔޮއަހިމް ލޯ ވަނީ މުލާގެ އިތުރުން ހަމެލްސްއަށް ދެން ގައުމީ ޓީމުން ފުރުސަތެއް ނޯންނާނެ ކަމަށް ބުނެފައެވެ.

އެކަމަކު މި ފަހަކަށް އައިސް އެ ދެ ކުޅުންތެރިންވެސް ކުލަބު ފެންވަރުގައި މޮޅު ކުޅުމެއް ދައްކާފައިވުމާއެކު، އަންނަ ޖޫން މަހުގެ 11 ވަނަ ދުވަހުން ފެށިގެން ޖުލައި މަހުގެ 11 ވަނަ ދުވަހުގެ ނިޔަލަށް ބޭއްވުމަށް ތާވަލުކޮށްފައިވާ ޔޫރޯގައި ވާދަކުރާ ޖަރުމަނުގެ ސްކޮޑުގައި އެ ދެ ކުޅުންތެރިން ވަނީ ހިމަނާފައެވެ.

މިހާރު އުމުރުން 31 އަހަރުގެ މުލާ އާއި އުމުރުން 32 އަހަރުގެ ހަމެލްސް އަލުން އަނބުރާ ގައުމީ ޓީމާ ގުޅޭއިރު، މީގެ ކުރިން އެ ދެ ކުޅުންތެރިން ވަނީ ޖަރުމަނަށް ޓީމަށް ގިނަ މެޗުތަކެއް ކުޅެދީ ބޮޑެތި ކާމިޔާބީތައް ހޯދާފައެވެ. އެގޮތުން އެ ދެ ކުޅުންތެރިންގެ އެންމެ ފާހަގަކޮށްލެވޭ ކާމިޔާބީއަކީ 2014 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރުމެވެ. އަދި މީގެ ކުރިން މުލާ ވަނީ ޖަރުމަން ޓީމަށް 100 މެޗު ކުޅެދީ 38 ލަނޑު ޖަހާފައެވެ. އަދި ހަމެލްސް ވަނީ ޖަރުމަން ޓީމަށް 70 މެޗު ކުޅެދީ، އެ މެޗުތަކުގައި ފަސް ލަނޑު ކާމިޔާބުކޮށްފައެވެ.

ޖަރުމަނުގެ ސްކޮޑުގައި މުލާ އާއި ހަމަލެސް ހިމަނަން ލޯ ނިންމިއިރު، ޔޫރޯއަށްފަހު ޖަރުމަނުގެ ގައުމީ ޓީމުގެ ކޯޗުކަން ދޫކޮށްލަން އުމުރުން 61 އަހަރުގެ ލޯ ވަނީ ނިންމާފައެވެ. މިހާތަނަށް ޖަރުމަން ޓީމާއެކު ލޯ 14 އަހަރު ހޭދަކޮށްފައިވާއިރު، އޭނާގެ އެންމެ ބޮޑު ކާމިޔާބީއަކީވެސް 2014 ވަނަ އަހަރުގެ ވޯލްޑް ކަޕެވެ. އަދި ލޯއާއެކު ޖަރުމަނުން ވަނީ 2017 ވަނަ އަހަރުގެ ފީފާ ކޮންފެޑެރޭޝަންސް ކަޕުވެސް ކާމިޔާބުކޮށްފައެވެ.

މި ފަހަރުގެ ޔޫރޯގައި ޖަރުމަން ހިމެނެނީ ގްރޫޕް އެފްގައެވެ. މި ގްރޫޕުގައި ދެން ހިމެނެނީ ހަންގޭރީ، ޕޯޗުގަލް އަދި ފްރާންސެވެ.