ފަލަސްތީނުގެ ހައްގުގައި ރައީސް ސާލިހު ޓުވިޓަރއަށް
ކުރީގެ ރައީސް މައުމޫން ވެސް ސޯޝަލް މީޑިއާ ކެމްޕޭނުގައި ވަނީ ބައިވެރިވެވަޑައިގެންފައި
ދިވެހިރާއްޖެއިން ދަނީ އެކި ޕްލެޓްފޯމްތަކުގައި ފަލަސްތީނުގެ ހައްގުގައި ވަކާލާތުކުރަމުން
ފަލަސްތީނުގެ ދިފާއުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ޓުވިޓާގައި އަޑު އުފުއްލަވައިފިއެވެ.
މިހާރު އިސްރާއިލުން ހިންގަމުންދާ ލާއިންސާނީ އަމަލުތައް ހުއްޓުވުމަށް ދުނިޔޭގެ އެކި ކަންކޮޅުތަކުގައި ތަފާތު ހަރަކާތްތައް ކުރިއަށްގެންދާއިރު، ދިވެހިރާއްޖޭގައިވެސް މިފަދަ ހަރަކާތްތައް ދަނީ ހިންގަމުންނެވެ. އެގޮތުން ސޯޝަލް މީޑިއާ ޕްލެޓްފޯމްތަކުގައި ދިވެހިން ތިބީ ފަލަސްތީނުގެ އަޚުންނާއި އުޚުތުންނާއިއެކުކަން ހާމަކުރުމަށް ސްޓޭޓަސް އަޕްޑޭޓްކުރުމާއި، ޓްވީޓްކުރުން ފަދަ ހަރަކާތްތައް ދަނީ ހިންގަމުންނެވެ.
މި ހަރަކާތުގައި ބައިވެރިވެވަޑައިގެން ރައީސުލުޖުމްހޫރިއްޔާ އިބްރާހިމް މުހައްމަދު ސާލިހު ކުރެއްވި ޓުވީޓްގައިވަނީ، ދިވެހިރާއްޖެ އޮތީ ފަލަސްތީނުގެ ދިފާއުގައިކަން ހާމަކުރައްވައި ފަލަސްތީނުގެ ދިދައިގެ ފޮޓޮއޯކާއެކު ޓުވީޓްކުރައްވާފައެވެ. އެމަނިކުފާނުގެ ޓުވީޓްގައި ވަނީ ފަލަސްތީނުގެ މިނިވަންކަމަށް ގޮވާލުމަށް ބޭނުންކުރާ ހޭޝްޓެގް "ފްރީ ޕަލެސްޓައިން"ގެ ހޭޝްޓެގް ބޭނުންކުރައްވައި ފަލަސްތީނުގެ މިނިވަންކަމަށް ގޮވާލައްވާފައެވެ.
ރައީސް ސާލިހުގެ އިތުރުން ކުރީގެ ރައީސް މައުމޫން އަބްދުލްގައްޔޫމްވެސް ސޯޝަލް މީޑިއާ ކެމްޕޭނުގައި ވަނީ ބައިވެރިވެވަޑައިގެންފައެވެ. އެގޮތުން އެމަނިކުފާނުވެސް ވަނީ ދިވެހިރާއްޖެ އޮތީ ފަލަސްތީނުގެ ދިފާއުގައިކަން ހާމަކުރައްވައި ފަލަސްތީނުގެ ދިދައިގެ ފޮޓޯއަކާއެކު ޓުވީޓް ކުރައްވާފައެވެ.
ފަލަސްތީނުގެ ރައްޔިތުންގެ ހައްގުތަކަށްޓަކައި އަޑުއުފުލައި ވަކާލާތުކުރުމުގައި ބަދަލެއްނެއިސް ދެމިއޮންނާނެ ކަމަށް ދިވެހިރާއްޖެއިން އޯގަނައިޒޭޝަން ފޯރ އިސްލާމިކް ކޯޕަރޭޝަން، އޯއަސީގެ މިނިސްޓީރިއަލް ބައްދަލުވުމުގައި ވަނީ ބުނެފައެވެ. މި ބައްދަލުވުމުގައި ވާހަކަފުޅުދައްކަވަމުން ޚާރިޖީ ވަޒީރު އަބްދުﷲ ޝާހިދު ވަނީ ފަލަސްތީނުގެ މައްސަލައިގައި ދިވެހިރާއްޖެއިން އަބަދުވެސް ގަބޫލުކުރަނީ 1967ވަނަ އަހަރު އެކުލަވާލި ފަލަސްތީނުގެ ސަރަހައްދީ އިމުގެ ތެރޭގައި ފަލަސްތީނުގެ މިނިވަން ދައުލަތެއް ގާއިމްކޮށް، އެދައުލަތުގެ ވެރިރަށަކީ އިރުމަތީ ގުދުސްކަމަށް ހެދުންކަމުގައި ވިދާޅުފައެެވެ.
އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ހިންގާ ލާއިންސާނީ އަމަލުތައް ހަރުކަށި އިބާރާތުން ކުށްވެރިކުރައްވާ މިނިސްޓަރ ޝާހިދުވަނީ، ފަލަސްތީނުގެ ރައްޔިތުން އިންސާފާއި ސުލްހައާއި މިނިވަންކަން ހޯދުމަށް ކުރަމުންދާ މަސައްކަތުގައި މުޅި އިސްލާމީ އުއްމަތް އެކަތިގަނޑެއްގެ ގޮތުގައި ފަލަސްތީނުގެ ރައްޔިތުންނާއެކު ދެމިތިބުމަށް ގޮވާލައްވާފައެވެ. އެމަނިކުފާނު ވަނީ ފަލަސްތީނުގެ ރައްޔިތުންގެ ހައްގުތަކުގެ އަޑުއުފުލައި ވަކާލާތުކުރުމުގައި ގުޑުމެއްނެތި ދިވެހިރާއްޖެ ދެމިއޮންނާނެކަމަށް ވިދާޅުވެފައެވެ.
އިސްރާއީލުން ފަލަސްތީނުގައި ހިންގަމުންދާ ލާއިންސާނީ އަމަލުތައް ކުށްވެރިކޮށް، އެއަމަލުތައް ވަގުތުން ހުއްޓާލުމަށް ރައްޔިތުންގެ މަޖިލީހުންވެސް ވަނީ ގޮވާލާފައެވެ. ފަލަސްތީނުގެ ކުށެއްނެތް މައުސޫމު ކުޑަކުދިންނާއި އަންހެނުން ހިމެނޭގޮތަށް ފަލަސްތީނުގެ އާންމު ރައްޔިތުން ޝަހީދުކޮށް، އިސްރާއީލުން ހިންގަމުންދާ ރަހުމުކުޑަ ލާއިންސާނީ އަމަލު ހަރުކަށި އިބާރާތުން ކުށްވެރިކޮށް މަޖިލީހުން ނެރުނު ބަޔާނުގައި ބުނެފައިވަނީ އިސްރާއީލްގެ ލާއިންސާނީ އަނިޔާތަކަކީ ބަލައި ގަނެވޭނެ އަމަލުތަކެއް ނޫންކަމަށެވެ.
މީގެ އިތުރުން ދިވެހިން ވަނީ ރާއްޖެ ފަލަސްތީނާއެކުވާކަން ހާމަކޮށްދިނުމަށް ރާއްޖޭގެ ހުރިހާ ކަންކޮޅުތަކުން އެއްވަގުތެއްގައި ފަލަސްތީނުގެ ދިދަ ހިފައިގެން ގެތަކުގެ ބެލްކަންޏަށް ނިކުމެ ރަމްޒީ ހަރަކާތެއްވެސް ކުރިއަށް ގެންގޮސްފައެވެ. މި ހަރަކާތުގެ ފޮޓޯތައް ސޯޝަލް މީޑިއާގައި އާންމުވެފައިވާއިރު، ފަލަސްތީނުގެ ހައްގުގައި ދިވެހިން ދަނީ ސޯޝަލް މީޑިއާގެ އެކި ޕްލެޓްފޯމްތަކުގައިވެސް އަޑުއުފުލަމުންނެވެ.
