ތޫފާން ޓައުޓޭގެ ސަބަބުން އިންޑިޔާއިން 21 މީހުން މަރުވެ 100 މީހުން ގެއްލިފައިވާ ކަމަށް ރިޕޯޓުތައް ބުނެފިއެވެ.

ގަޑިއަކު 185 ކިލޯމީޓަރުގެ ވަޔާއެކު އިންޑިއާގެ ގުޖަރާތު ސްޓޭޓަށް އެރި ތޫފާން ޓައުޓޭގެ ސަބަބުން އެތައްހާސް ގެއަކުން ކަރަންޓު ވަނީ ކެނޑިފައެވެ.

އިންޑިއާގެ ހުޅަނގު އައްސޭރިފަށުން އެ ތޫފާން ދަތުރު ކުރަމުން ދިޔައިރު، ގަދަ ވަޔާއެކު ގަސްތަކާއި މަތިން ދަމާފައިވާ ކަރަންޓާއި ފޯން ކޭބްލަތައް ވަނީ ބުރިވެފައެވެ. މިހާތަނަށް، 21 މީހުން މަރުވެ، 150،000 މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.

ތެޔޮބާޖެއް ރާޅާއެކު މުމްބާއީގެ އައްސޭރިފަށަށް އަޑިއަށް ގޮސްގެން އިންޑިއާގެ އަސްކަރިއްޔާއިން ވަނީ އޭގައި ތިބި މީހުން ސަލާމަތްކުރުމުގެ މަސައްކަތް ކޮށްފައެވެ. 273 މީހުންގެ ތެރެއިން 96 މީހުން އަދިވެސް ނުފެނެއެވެ.

މުމްބާއީގެ އެއާރޕޯޓުތައް ހޯމަ ދުވަހުން ފެށިގެން ބަންދުކޮށްފައިވާއިރު، ސަލާމަތީ ޚިދުމަތްދޭ ފަރާތްތަކުންވަނީ ބޭރަށް ނުނިކުމެ ގޭގައި މަޑުކުރުމަށް އިލްތިމާސްކޮށްފައެވެ.

މިއީ އެންމެ ބާރުގަދަ "ސައިކްލޯނިކް ސްޓޯމެއް" ގޮތުގައި ކުރިން ކަނޑައެޅި ނަމަވެސް މިޓިއޮރޮލޮޖިކަލް ޑިޕާޓްމަންޓުން ބުނީ ތޫފާނުގެ ބާރު މިހާރު ދަށްވެފައިވާ ކަމަށެވެ. ގުޖަރާތަށް ތޫފާނު އެރުމަށް ފަހު ބާރު ދަށްވަމުންދާ ކަމަށް މިޓިއޮރޮލޮޖިކަލް ޑިޕާޓްމަންޓުން ކުރި ޓްވީޓެއްގައިވެއެވެ.

ތޫފާން ޓައުޓޭއަކީ 1998 ވަނަ އަހަރަށް ފަހު އިންޑިއާއަށް އެރި އެންމެ ބާރުގަދަ ތޫފާނެވެ. ގުޖަރާތާއި މުމްބާއީ ހިމެނޭ މަހާރަޝްތުރާ ސްޓޭޓް އޮތީ ތޫފާނަށް ތައްޔާރުވުމުގެ ގޮތުން އެލާޓަށް ގެނެސްފައެވެ.