ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އިތުރު ފަރުވާ ހޯއްދެވުމަށް ރާއްޖެއިން ބޭރަށް ވަޑައިގަތުމަށް ފަހު އެމަނިކުފާނުގެ ހާލުކޮޅު ރަނގަޅުވަމުން އަންނަކަން ދައްކުވައިދޭ ވީޑިއޯއެއް އާންމުކުރައްވައިފިއެވެ.
ސޯޝަލް މީޑިއާގައި އާންމުވެފައިވާ ވީޑިއޯގައި ފެނިގެންދަނީ އެމަނިކުފާނު ފަރުވާ ހޯއްދަވަމުން ގެންދަވާ ހޮސްޕިޓަލްގެ ސިޑިން މައްޗަށް އަދި ތިރިއަށް ވަޑައިގަންނަވާ މަންޒަރެވެ. އެ ވީޑިއޯއިން އެކަނިވެސް އެމަނިކުފާނުގެ ހިތްވަރާއި ނުގުޑާ އަޒުމް ފެނިގެންދެއެވެ. މޭ މަހުގެ 6ވަނަ ދުވަހުގެ ރޭ އެމަނިކުފާނަށް ދިން ހަމަލާއަށް ފަހު، އޭޑީކޭގައި ހަފުތާއެއް ވަންދެން ފަރުވާ ހޯއްދެވުމަށް ފަހު ޖަރުމަންވިލާތަށް ވަޑައިގެންނެވީ މި މަހުގެ 13 ވަނަ ދުވަހު ހެނދުނުއެވެ.
މާލޭގައި ދިން ޓެރަރިސްޓު ހަމަލާގައި އެމަނިކުފާނަށް ބޮޑެތި އަނިޔާތަކެއް ވަނީ ލިބިވަޑައިގެންފައެވެ. ފުއްޕާމެއާއި ގޮހޮރުގެ އެކިތަންތަންކޮޅު ފޫއަޅުވާލައި ރޭޒާފުއްތަކެއް ވަދެފައިވާއިރު ބޮލާއި ފަޔަށްވެސް އެކި ވަރުގެ ޒަޚަމްތައް ލިބިފައިވެއެވެ. ފައިގެ ކަކުލުހުޅަށް ވެސް ރޭޒާފުއް ވަދެފައިވާ ކަމަށް އޭޑީކޭއިން އެމަނިކުފާނަށް ފަރުވާދިން ޑޮކްޓަރުން ވިދާޅުވެފައިވެއެވެ.
އާންމުކޮށްފައިވާ ވީޑިއޯގައި އެމަނިކުފާނު ސިޑިއެއް ބޭނުން ކުރައްވާ މަންޒަރު ފެނިގެންދާއިރު، ކަކުލު ހުޅުގެ ޒަޚަމާ ގުޅިގެން ހިނގާބިނގާވެ އުޅުމުގައި ދަތިތަކެއް ހުރިކަން ފާހަގަވެއެވެ. އާއިލާއިން ބުނެފައިވަނީ އެމަނިކުފާނުގެ ހާލުކޮޅު ދުވަހެއް ދުވަހަކަށް ރަނގަޅުވަމުން އަންނަ ކަމަށާއި އިއްޔެއާ އަޅާބަލާއިރު މިއަދު ހިންގެވުން ވެސް ރަނގަޅު ކަމަށެވެ.
ރައީސް ނަޝީދުގެ ފުރާނަފުޅަށް ގެއްލުން ދިނުމަށްޓަކައި ހިންގުނު ޓެރަރިސްޓް ހަމަލާއަށް ފަހު އެމަނިކުފާނު ތަކުރާރުކޮށް، އެކި ބޭފުޅުން މެދުވެރިކުރައްވައި އަދި ހަމަލާއަށް ފަހު އާންމުންނަށް ކުރެއްވި ފުރަތަމަ ޓުވީޓުގައި ވެސް ވިދާޅުވެފައި ވަނީ ގަދަކޮށް އެނބުރި ވަޑައިގަންނަވާނެ ކަމުގައެވެ. އެ ހަމަލާއަށް ދެ ހަފުތާވާން ގާތްވެފައިވާއިރު، އެމަނިކުފާނުގެ ރިކަވަރީގައި ދައްކަވަމުން ގެންދަވާ ހިތްވަރާއި ސާބިތުކަން އައު ވީޑިއޯން ފެނިގެންދެއެވެ.
