ފަލަސްތީނުގެ ރައްޔިތުންގެ ހައްގުތަކަށްޓަކައި އަޑުއުފުލައި ވަކާލާތުކުރުމުގައި ބަދަލެއްނެއިސް ދެމިއޮންނާނެ ކަމަށް ދިވެހިރާއްޖެއިން ބުނެފިއެވެ.

ރާއްޖެއިން މިހެން ބުނެފައި ވަނީ އޮގަނައިޒޭޝަން އޮފް އިސްލާމިކް ސަމިޓް (އޯއައިސީ) ގެ ބައްދަލުވުމުގައި ފަލަސްތީނުގެ މައްސަލާގައި ޚާރިޖީ ވަޒީރު އަބްދުﷲ ޝާހިދު ދެއްކެވި ވާހަކަފުޅުގައެވެ. އޯއައިސީގެ މެމްބަރު ގައުމުތަކުގެ ޚާރިޖީ ވަޒީރުންނާއެކު އާދީއްތަ ދުވަހު ވާރޗުއަލްކޮށް ބޭއްވި ބައްދަލުވުމުގައި އިސްރާއީލުން ފަލަސްތީނުގެ ރައްޔިތުންނަށް އަމާޒުކޮށް ދެމުންގެންދާ އުދުވާނީ ހަމަލާތަކާ ގުޅޭގޮތުން ވަނީ ފުޅާދާއިރާއެއްގައި މަޝްވަރާކޮށްފައެވެ.

އިރުމަތީ ގުދުސްގައި އުޅޭ ފަލަސްތީނު ރައްޔިތުން ގެދޮރުން ނެރެލުމަށް އިޒްރޭލުން ހިންގާ ލާ އިންސާނީ އަމަލުތައް ކުށްވެރިކުރައްވައި ވާހަކަފުޅު ފައްޓަވަމުން ޚާރިޖީ ވަޒީރު އަބްދުﷲ ޝާހިދު ވަނީ ބަރަކާތްތެރި ރަމަޟާން މަހު މުސްލިމުން އަމާންކަންމަތީ ރޭ އަޅުކަންކުރަން ތިއްބާ ޚާއްސަކޮށް އަގްސާ މިސްކިތަށް އަމާޒުކޮށް އަދި އޭގެ ފަހުން އެކި ފަހަރުމަތިން ގުދުސްގެ އެހެނިހެން ތަންތަނަށް އަމާޒުކޮށް ދެމުންގެންދާ ހަމަލާތައް ހަރުކަށި އިބާރާތުން ކުށްވެރިކުރައްވާފައެވެ.

މި ބައްދަލުވުމުގައި މިނިސްޓަރ ޝާހިދު ވިދާޅުވީ އިސްރާއީލުން ހުޅަނގުގެ އައްސޭރީގެ އިތުރު ބިންތަކަށް ވެރިވުމަކީ ސަރަހައްދީ ހަމަޖެހުން، ނަގާލުމަށް ސިލްސިލާކޮށް ކުރަމުންދާ މަސައްކަތުގެ ބައެއް ކަމަށެވެ. ހިފާފައިވާ ހުޅަނގު އައްސޭރީގެ ބިންތަކަކީ އިސްރާއީލުގެ އަމިއްލަ ބިންކަމުގައި ކަނޑައެޅުމަކީ ދިވެހިރާއްޖެއިން ވަރަށް ހަރުކަށިކޮށް ކުށްވެރިކުރާ އަދި އެކަމާ ދެކޮޅު ހަދާ ކަމެއްކަމަށް މިނިސްޓަރ ވިދާޅުވިއެވެ. އިސްރާއީލުން ފަލަސްތީނުގެ ރައްޔިތުންގެ އިންސާނީ ހައްގުތަކަށް އަރައިގަތުން އިތުރު ދަރަޖައަކަށް ގެންގޮސްފައިވާކަން ފާހަގަކުރައްވައި އިރުމަތީ ގުދުސްގައި ޔަހޫދީން އާބާދުކުރުމުގެ މަޝްރޫއުގެ ތެރެއިން ޝެއިޚު ޖައްރާގައި ދިރިއުޅޭ ފަލަސްތީނު ރައްޔިތުން އެމީހުންގެ ގެދޮރުން ގަދަބާރުން ނެރެލުމަކީ އެއްވެސް ހާލެއްގައި ބަލައިގަނެވޭނެކަމެއް ނޫންކަމަށް ވިދާޅުވިއެވެ.

ފަލަސްތީނުގެ މައްސަލައިގައި ދިވެހިރާއްޖެއިން އަބަދުވެސް ގަބޫލުކުރަނީ 1967ވަނަ އަހަރު އެކުލަވާލި ފަލަސްތީނުގެ ސަރަހައްދީ އިމުގެ ތެރޭގައި ފަލަސްތީނުގެ މިނިވަން ދައުލަތެއް ގާއިމްކޮށް، އެދައުލަތުގެ ވެރިރަށަކީ އިރުމަތީ ގުދުސްކަމަށް ހެދުންކަން މިނިސްޓަރ ޝާހިދު ފާހަގަކުރެއްވިއެވެ. އަދި އިސްރާއީލުން ފަލަސްތީނުގެ އިތުރު ބިންތަކަށް ވެރިވުމަކީ އިސްރާއީލާއި ފަލަސްތީނުގެ ވަކި ދެ ދައުލަތެއް ގާއިމްކުރުމަށް ކުރެވޭ މަސައްކަތަށް އެޅޭ އިތުރު ހުރަހެއްކަމަށާއި، އެކަން ހާސިލް ކުރެވޭނީ އިޚްލާސްތެރިކަމާއެކު މަސައްކަތް ކޮށްގެންކަމަށް މިނިސްޓަރ ވިދާޅުވިއެވެ.

ފަލަސްތީނުގެ ރައްޔިތުން އިންސާފާއި ސުލްހައާއި މިނިވަންކަން ހޯދުމަށް ކުރަމުންދާ މަސައްކަތުގައި މުޅި އިސްލާމީ އުއްމަތް އެކަތިގަނޑެއްގެ ގޮތުގައި ފަލަސްތީނުގެ ރައްޔިތުންނާއެކު ދެމިތިބުމަށް މިނިސްޓަރ ގޮވާލެއްވިއެވެ. އެމަނިކުފާނު ވަނީ ފަލަސްތީނުގެ ރައްޔިތުންގެ ހައްގުތަކުގެ އަޑުއުފުލައި ވަކާލާތުކުރުމުގައި ގުޑުމެއްނެތި ދިވެހިރާއްޖެ ދެމިއޮންނާނެކަމަށް ވިދާޅުވެފައެވެ.

އިސްރާއީލުގެ އުދުވާނީ ހަމަލާތަކާ ގުޅޭގޮތުން މަޝްވަރާކުރުމަށް ވަރޗުއަލްކޮށް ބައްދަލުވުމެއް ބާއްވާފައި ވަނީ، އޯއައިސީގެ ނާގާބިލުކަމުގެ ސަބަބުން އެ ޖަމާއަތަށް އަމާޒުވަމުންދާ ފާޑުކިޔުންތައް އިތުރުވެފައިވާ ދަނޑިވަޅެއްގައެވެ. މުޅިއެކު 57 ގައުމުގެ މައްޗަށް އެކުލެވޭ އޯއައިސީ އުފެއްދީ 1969ވަނަ އަހަރުގެ ތެރޭގައި އަގްސާ މިސްކިތަށް ޔަހޫދީން ހަމަލާދިނުމުންނެވެ. އޭރު ފަލަސްތީނުގެ މުގައްދަސް ބިނާތަކާއި މުސްލިމުންގެ ސަލާމަތަށް އުފެއްދި އޯއައިސީގެ ރާގާއި މަންޒަރު މިހާރުވަނީ ވަރަށް ބޮޑަށް ބަދަލުވެފައެވެ. ފާއިތުވި ރަމަޟާން މަހުން ފެށިގެން އިސްރާއީލުގެ އިސްތިއުމާރީ ފައުޖުތަކުން ހިންގަމުންދާ އުދުވާނުތަކާ ދެކޮޅަށް އޯއައިސީގެ ފަރާތުން ލިބިފައިވަނީ ވަރަށް ބަލިކަށި އަދި ވަރަށް ފިނި ރައްދެކެވެ. ބައެއް ގައުމުތަކުން އާންމު އުސޫލުން ނެރޭ ނޫސްބަޔާން ފިޔަވައި އިތުރު ކަމެއް ނުކުރެއެވެ.