މޫސުމީ ވިއްސާރައިގެ ސަބަބުން އެކަމުގެ އަސަރު ޕާކިސްތާނުގެ 33 މިލިއަން މީހުންނަށް އެކި ގޮތްގޮތުން ކުރިމަތިލާން ޖެހިފައިވާއިރު، މޫސުން ގޯސްވެ، ފެންބޮޑުވެ، ގެދޮރު ގެއްލި ހާލުގައި ޖެހިފައިވާ އެތައް ހާސް ބަޔަކު މިވަގުތު އެބަތިއްބެވެ. އަދި ބައެއް ހިސާބުތަކަށް ދެ މަހެއްހާ ދުވަސް ވަންދެން ވިއްސާރަ މޫސުމާ ކުރިމަތިލާންޖެހުމާއެކު، ބޮޑެތި ހިސާބުތަކުގައި ފެންބޮޑުވެ ދިމާވި އެކި ހާދިސާތަކުގައި 1،500ށްވުރެ ގިނަ މީހުން ވަނީ މަރުވެފައެވެ. މީގެ އިތުރުން އިމާރާތްތަކަކާއި ބްރިޖްތަކެއްވެސް ވަނީ ވެއްޓިފައެވެ. ފެންބޮޑުވެ، ކިސަޑު ބޯވުމުގެ ސަބަބުން ގިނަ މަގުތަކެއް ބަންދުވެފައިވާއިރު އެސަރަހައްދުތަކަށް ޚިދުމަތް ފޯރުކޮށްދެވޭނެ ގޮތެއްވެސް ވަނީ ނެތިފައެވެ. ފެންބޮޑުވުމުގެ ސަބަބުން އެ ގައުމުގެ ދަނޑުބިންތަކާއި މަގުތައް ވަނީ ހަލާކުވެފައެވެ. އެގޮތުން ފެންބޮޑުވުމުގެ ސަބަބުން ލިބުނު ގެއްލުން 10 ބިލިއަން އެމެރިކާ ޑޮލަރަށް އަރާނެކަމަށް މިވަގުތަށް އަންދާޒާ ކުރެވޭކަމަށް އެގައުމުގެ ޕްލޭނިންގ މިނިސްޓްރީން ބުނެއެވެ.