ސްޓެލްކޯގެ ބޮޑު އިންޖީނަށް ދިމާވި މައްސަލަ އަކައި ގުޅިގެން މާލޭގެ ބައެއް ސަރަހައްދަކުން ކަރަންޓް ކެނޑިއްޖެ އެވެ.

ސްޓެލްކޯގެ މީޑިޔާ އޮފިޝަލް ވިދާޅުވީ، ކަރަންޓް ކެންޑުނީ، މާލޭގެ ފަސް ބައިކުޅަ ދެބައިން ކަމަށާއި ކަރަންޓް ކެންޑުނީ، ބޮޑު އިންޖީނަށް ދިމާވި ޓެކްނިކަލް މައްސަލައަކާއި ގުޅިގެން ކަމަށެވެ. ކަރަންޓް ކެނޑުނު ހިސާބުތަކަށް ކަރަންޓް ދެމުން އަންނަ ކަމަށްވެސް އޭނާ ވިދާޅުވި އެވެ.

މާލޭގެ ބައެއް ސަރަހައްދުތަކުން ކަރަންޓް ކެނޑިފައިވާ އިރު މިދިޔަ މަރޗު މަހުގެ 5 ވަނަ ދުވަހުވެސް މާލޭގެ ބޮޑު ސަރަހައްދަކުން ކަރަންޓު ވަނީ ކެނޑިފަ އެވެ. 

އެދުވަހު ގާތްގަނޑަކަށްމެންދުރު 13:00 އިން 16:00 އަށް ކަރަންޓް ކެނޑުމުން އާއްމުންގެ ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. އެ ދުވަހު ވެސް ކަރަންޓާ އެކު ފެން ކެނޑި ގިނަ ބަޔަކަށް ދަތިތަކާ ކުރިމަތިލާންޖެހުނެވެ. އަދި އޭގެ ފަހުން ގިނަ ދުވަސްތަކެއް ވަންދެން ބައެއް ސަރަހައްދުތަކަށް ޕްރެޝަރުގައި ފެން ލިބިފައެއް ނުވެއެވެ.

އެފަހަރު ސްޓެލްކޯއިން ބުނީ މުޅި މާލެއިން ކަރަންޓް ކަނޑައިގެން ދިޔައީމާލެއަށް ފެނުގެ ހިދްމަތް ފޯރުކޮށްދޭ އެމްޑަބްލިޔުއެސްސީއަށް ކަރަންޓް ދިނުމަށް ވަގުތީ ގޮތުން ބަހައްޓާފައި ހުރި ޓްރާންސްފޯމަރެއްގެ ހައިވޯލްޓޭޖް ކޭބަލަކަށް ދިމާވި މައްސަލައަކާ ގުޅިގެން، ކޭބަލް ޝޯޓް ސާރކިޓް ވުމުގެ ސަބަބުން ކަމަށެވެ. ނަމަވެސް އެމްޑަބްލިޔުއެސްސީން ބުނެފައި ކަރަންޓް ކެނޑުނީ އެ ކުންފުނީގެ މައްސަލައަކުން ނޫން ކަމަށާއި އެވަގުތު އެފަދަ މެއިންޓެނަންސް މަސައްކަތެއް ވެސް ކުރަމުން ނުދާ ކަމަށެވެ.