ގައުމު އިސްލާހު ކުރުމަށް މިއަދު ގުޅިފައިވާ ޕާޓީތަކުން ކުރަމުންދާ މަސައްކަތްތައް ކާމިޔާބު ކުރުމަށް ލޯކަލް ކައުންސިލް އިންތިހާބުގައި ގުޅިފައިވާ ޕާޓީތަކަށް ނިސްބަތްވާ ކެންޑިޑޭޓުންނަށް ވޯޓުދިނުމަށް ރައީސް މައުމޫން އެދިލައްވާފައިވާ ކަމަށް ރައީސް މައުމޫންގެ ދަރިކަނބަލުން ޔުމްނާ މައުމޫން ވިދާޅުވެއްޖެ އެވެ
ގއ. ވިލިނގިލީގައި ގުޅިފައިވާ ޕާޓީތަކުން ބުދަ ދުވަހުގެ ރޭ ބޭއްވި ޚާއްސަ ޖަލްސާގައި ވާހަކަދައްކަވަމުން ޔުމްނާ މައުމޫން ވިދާޅުވީ، މިއަދު ގައުމުގެ ހާލަތަށް ބަލާ އިރު މިހާރު ފަށާފައިވާ ސިޔާސީ މަސައްކަތްތައް ކާމިޔާބުވެއްޖެ ކަމަށް ގަބޫލު ކުރާ ކަމަށެވެ. އަދި ގައުމަށް ހަމަޖެހުން ލިބޭނީ، ސިޔާސީ ފިކުރު އެއްފަރާއިކޮށް ގައުމު އިސްލާހު ކުރުމުގެ މަސައްކަތުގެ ތެރެއިން ކަމަށާއި ސިޔާސީ ހަތަރު ލީޑަރުން އެކުވެ މަސައްކަތް ފެށީ ގައުމަށް ދެމެހެއްޓެނިވި ތަރައްގީ ގެނައުމަށް ކަމަށް އޭނާ ވިދާޅުވި އެވެ.
ގައުމުގައި މިއަދު ފެނިގެންދަނީ ގާނޫނު އަސާސީ އާއި ހިލާފަށް ގާނޫނުތަކަށް ބަދަލު ގެންނަމުންދާ މަންޒަރު ކަމަށް އޭނާ ވިދާޅުވި އެވެ. އަދި ކޮރަޕްޝަނާއި ހިޔާނާތުގެ ބޮޑެތި އަމަލުތައް ހިންގަމުންދާ މަންޒަރު ފެންނަމުންދާ ކަމަށް ޔުމްނާ ވިދާޅުވި އެވެ.
ޔުމްނާ ވިދާޅުވީ، ރައީސް މައުމޫން އަބްދުލް ގައްޔޫމް އެންމެ ފުރަތަމަ މަސައްކަތް ކުރީ، އެމަނިކުފާނު ނިސްބަތްވާ، ޕީޕީއެމްގެ ތެރެއިން ސަރުކާރުން ހިންގާ ކަންކަން އިސްލާހު ކުރުމަށް ކަމަށެވެ. އެހެން ނަމަވެސް، އެމަސައްކަތް ކުރަން ފެށުމުން ރައީސް މައުމޫނަށް ކުރިމަތިވި ދަތިތައް ގައުމުގެ ހުރިހާ ރައްޔިތުންނަށް ފެނިގެންދާނެ ކަމަށް ޔުމްނާ ވިދާޅުވި އެވެ. އެގޮތުން ރައީސް މައުމޫން ޕާޓީގެ ތެރެއިން އިސްލާހީ މަސައްކަތް ފެށުމުން އަމިއްލަ ޕާޓީ އެމަނިކުފާނު އަތުން އަތުލެއްވި ކަމަށް ޔުމްނާ ވިދާޅުވި އެވެ.
"ރައީސް މައުމޫން 30 އަހަރު ބިނާކުރެއްވި ގައުމު ފަހަތަށް ދާތަން ބަލަން ހުންނާކަށް އެމަނިކުފާނަށް ކުޅަދާނައެއް ނޫން. އެމަކިނުފާނުގެ އިސްނެންގެވުމާއި، ރައީސް ނަޝީދު އަދި ގާސިމް އިބްރާހިމްގެ މިންނެތް މަސައްކަތުން ގެންނަ ގާނޫނު އަސާސީން ރައްޔިތުންނަށް ލިބިދިން މިނިވަންކަމާއި ހޯދައިދޭ ހައްގުތައް ނިގުޅާއި ގަނެވޭ ތަން ބައްލަވަން ހުންނަވާކަން ފަސޭހަފުޅެއް ނުވާނެ." ޔުމްނާ ވިދާޅުވި އެވެ.
ޔުމްނާ ވަނީ އިސްލާމީ މަސައްކަތް ގުޅިފައިވާ ޕާޓީގެ ތެރެއިން ފަށަން ޖެހުނީ، ޕީޕީއެމްގެ އެތެރެއިން ކަންކަން އިސްލާހު ކުރުމަށް ކުރި މަސައްކަތް ކާމިޔާބު ނުވުމުން ކަން ފާހަގަކުރައްވާފަ އެވެ.
