ރާއްޖޭގެ ފުރަތަމަ ގަޑި އުފައްދާ އަމިއްލަ ކުންފުނި "މޯލްޑިވްސް ވޭވް" އިން ކުރިއަށް ގެންދިޔަ ގިވް އަވޭ ޕްރޮމޯޝަންގެ ނަސީބުވެރި ފަރާތްތަކަށް އަގު ހުރި ހަދިޔާތައް ހަވާލުކޮށްފިއެވެ.

އަންގާރަ ދުވަހުގެ ރޭ ގ.ބޮނޑުފެންވަޅުގޭގައި ކުރިއަށް ގެންދިޔަ ހާއްސަ ހަފްލާއެއްގައި ނަސީބުވެރި ފަރާތްތަކަށް ހަދިޔާތައް ހަވާލުކޮށްދިނީ މޯލްޑިވްސް ވޭވްގެ ބްރޭންޑް އެމްބެސެޑަރ އެއްކަމަށްވާ ރާއްޖޭގެ މޯލްޑިވިއަން އައިޑަލް ޝަލަބީ އިބްރާހިމްއެވެ.

މި ގިވް އަވޭގައި އެއް ވަނަ އަށް ދިޔަ ފަރާތަށް ޕްލޭ ސްޓޭޝަން 5 ގެ ޑިސްކް ވާޝަން އަކާއި އައިފޯން 12 ގެ 128 ޖީބީގެ ފޯނެއްގެ އިތުރުން މޯލްޑިވްސް ވޭވް ބޮޑުބެރު ގަޑި ސީރީސްގެ ކަޕްލް ވޮޗް އަދި 7،000 ރުފިޔާ ވަނީ ލިބިފައެވެ.

ދެ ވަނައަށް ހޮވުނު ފަރާތަށް ލަވަރސް ޕެކޭޖެއްގެ އިތުރުން 5،000 ރުފިޔާގެ ފައިސާގެ އިނާމެއް ލިބިފައިވާ އިރު ތިން ވަނަ އަށް ހޮވުނު ފަރާތަށް ލިބިފައި ވަނީ ވެލާ ސީރީސްގެ ފިރިހެން ގަޑި އަކާއި 3،000 ރުފިޔާއެވެ.

މޯލްޑިވްސް ވޭވްގެ ސީއޯއޯ މުހައްމަދު ޒާޖި އިސްމާއިލް ވަނީ ގިވް އަވޭގެ ކަންތައްތައް ވީހާވެސް ޓްރާންސްޕޭރެންޓްކޮށް ކުރިއަށް ގެންދިއުމަށް ގިނަ މަސައްކަތްތަކެއް ކޮށްފައިވާނެ ކަން ފާހަގަކޮށް މި ގިވް އަވޭގައި މޯލްޑިވްސް ވޭވްގެ ހިއްސާ އޮންނަ އެއްވެސް ފަރާތަކާއި މޯލްޑިވްސް ވޭވް ގައި މަސައްކަތްކުރާ އެއްވެސް ފަރާތެއްގެ އާއިލާ މެމްބަރެއް އަދި ގާތްތިމާގެ މީހަކަށް މި ގިވް އަވޭގައި ބައިވެރިވުމުގެ ފުރުސަތު ދީފައި ނުވާނެ ކަމަށް ބުނެފައެވެ.

އެގޮތުން މި ގިވް އަވޭގެ ނަސީބުވެރިން ހޮވި މަންޒަރު ޓީވީއެމް އިން ލައިވްކޮށް ދައްކާފައިވާ އިރު، ނަސީބުވެރިން ހޮވާފައި ވަނީ އިންސްޓާ ބޮބް ކިޔާ ވެބްސައިޓެއް ބޭނުންކޮށްގެންނެވެ.

މޯލްޑިވްސް ވޭވްގެ މި ގިވް އަވޭއަށް 60،000 އަށް ވުރެ ގިނަ ކޮމެންޓްސް ލިބިފައިވާ އިރު، 80،000 އަށް ވުރެ ގިނަ ލައިކް ވަނީ ލިބިފައެވެ. މޯލްޑިވްސް ވޭވް އިން މި ގިވް އަވޭ ކުރިއަށް ގެންގޮސްފައި ވަނީ އެއް އަހަރު ފުރުމުގެ މުނާސަބަތުގައެވެ.