ގާނޫނު އިސްލާހު ކޮށްގެން ކުރީގެ ރައީސް އަދި އެމްޑީޕީގެ ލީޑަރު މުހައްމަދު ނަޝީދު މިނިވަން ކުރެވިދާނެކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވުމުން ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު އަދި އެމްޑީޕީގެ ޕާލަމެންޓްރީ ގްރޫޕްގެ ޑެޕިއުޓީ ލީޑަރު ރޮޒައިނާ އާދަމް ވަރަށް ބޮޑަށް ފާޑު ވިދާޅުވެއްޖެ އެވެ.

އިލެކްޝަންސް ކޮމިޝަނުން އަންނަ މެއި މަހުގެ ހަ ވަނަ ދުވަހު ބޭއްވުމަށް ނިންމާފައިވާ ލޯކަލް ކައުންސިލްތަކުގެ އިންތިހާބުގެ އެމްޑީޕީ ކެމްޕެއިން ހަރަކާތްތަކުގެ ތެރެއިން ނ. މިލަދޫގައި ބުރާސްފަތި ދުވަހުގެ ރޭ ބޭއްވި ހާއްސަ ޖަލްސާގައި ވާހަކަ ދައްކަވަމުން ރޮޒައިނާ ވިދާޅުވީ ރާއްޖޭގެ ހުރިހާ ސިޔާސީ ޕާޓީތަކެއްގެ ލީޑަރުން ރައީސް ނަޝީދު މިނިވަން ކުރުމަށް ބޭނުންވެލައްވާކަމަށްވާނަމަ އެކަމަށްއެދި ސިޓީއަކުން ރައީސް ޔާމީންއަށް ދަންނަވާ އަދި ރައީސް ނަޝީދު މިނިވަން ކުރެވޭފަދަ މަގަކަށް ދިއުމަށް ބޭނުންވާ ގާނޫނުތައް އިސްލާހު ކުރުމުން ރައީސް ނަޝީދު މިނިވަން ކުރެވިދާނެ ކަމަށް ވިދާޅުވާއިރު، ރައީސް ނަޝީދުގެ މައްޗަށް ހިންގާފައިވާ ޝަރީއަތަކީ ގާނޫނާ އެއްގޮތަށް ހިންގާފައިވާ ޝަރީއަތެއް ނޫން ކަމަށެވެ.

ފުރަތަމަ ރައީސް ޔާމީން ކުރައްވަންޖެހިވަޑައިގަންނަވާ ކަމަކީ ގާނޫނާ އެއްގޮތަށް އަމަލު ކުރުން ކަމަށް ރޮޒައިނާ ވިދާޅުވިއެވެ.

"ރައީސް ޔާމީން މިއަދު ޖަލްސާއެއްގައި ވިދާޅުވީ ހުރިހާ ސިޔާސީ ލީޑަރުން ވިދާޅުވެ، ސިޓީއަކުން ރައީސް ނަޝީދު މިނިވަން ކުރަން ވިދާޅުވެއްޖެނަމަ، އަދި އެމަގަށް ގާނޫނުތައް ބަދަލު ކުރުމަށް ބޭނުންނަމަ ރައީސް ނަޝީދު މިނިވަން ކުރެވިދާނެ ކަމަށް. އަޅުގަނޑު ބުނެލަން ބޭނުންވަނީ ރައީސް ނަޝީދަށް ޝަރީއަތްކޮށް ހުކުމް ކުރެއްވީ ގާނޫނާ އެއްގޮތަށްތޯއޭ. ކާނަލް ނާޒިމް، މަހުލޫފްގެ މައްޗަށް ހުކުމް ކޮށްފައިވަނީ ގާނޫނާ އެއްގޮތަށް ތޯއޭ. ނިހާނު ފުލުހުންގެ ބެރިކޭޑް މަތިން ފުއްމާލާ ފުލުހުންނާ ދިމާލަށް ދިޔައީ ފުލުހުން ދައުވަތު ދީގެންތޯއޭ. ގާސިމް ހައްޔަރު ކޮށްގެން ތިއުޅުއްވަނީ ގާނޫނީ އިމުގެ ތެރެއިންތޯއޭ، ގާސިމް 42 މެމްބަރުންގެ ތާއީދު ހޯދަން އުޅުމަކީ ކޮން ގާނޫނަކުން މަނާކަމެއް ތޯއޭ،" ރޮޒައިނާ ވިދާޅުވި އެވެ.

މީގެއިތުރުން ރޮޒައިނާ ވިދާލުވީ ރައީސް ޔާމީން ޓެރެރިސްޓް މާނަކުރާގޮތާއި ދުނިޔޭގެ އެހެން ގައުމުތަކުންނާއި ދިވެހި ރައްޔިތުން މާނަކުރާ ގޮތް ވަރަށް ތަފާތު ކަމަށެވެ. ރައީސް ނަޝީދަކީ ޓެރެރިސްޓެއްކަމަށް ނިންމިއިރު، ރައީސް ނަޝީދަށް ދަނީ ދުނިޔޭގެ އެކިއެކި ގައުމުތަކުން އެވޯޑްތައް ލިބިވަޑައިގަންނަވަމުން ކަމަށާއި ތިޔަ ވިދާޅުވާ ޓެރެރިސްޓާއެކު ދުނިޔޭގެ ލީޑަރުން މަޝްވަރާކުރައްވަމުން ގެންދަވާ ކަމަށެވެ. އެހެންވީމާ ރައީސް ޔާމީން ޓެރެރިސްޓް މާނަ ކުރާގޮތް މިހުރީ ފެންނަން ކަމަށްވެސް ރޮޒައިނާ ވިދާޅުވި އެވެ.

ރޮޒައިނާ ވިދާޅުވި ރައީސް ޔާމީނަށް ކޮރަޕްޝަނަކީ ކޮބައިކަން ނޭނގުނުނަމަވެސް ދިވެހި ރައްޔިތުންނަށް އެނގޭ ކަމަށާއި މިސަރުކާރު އޮތީ ކޮރަޕްޝަނުން ފޯވެފަ ކަމަށެވެ.

ރޮޒައިނާ ވިދާޅުވީ ސަރުކާރު ބަދަލުކުރަން ގޮވުމާއި މަޖިލިސް މެމްބަރުންނަށް ނުފޫޒު ފޯރުވުން، އެއީ ރައީސް ޔާމީން ކުރެއްވި ކަމެއްނަމަ އެއީ ރަނގަޅުކަމެއްކަމަށް ވާތަން ފެންނަމުންދާ ކަމަށެވެ. އެކަމަކު އިދިކޮޅު ލީޑަރަކު އެކަން ކޮށްފިނަ އެއީ ޓެރެރިސްޓް އަމަލެއް ކަމަށް މިސަރުކާރުން ނިންމާކަމަށެވެ.

ރޮޒައިނާ ވިދާޅުވީ އެކި ފަރާތްތަކަށް އެކި ގޮތް އަދި ތަފަތު ކުރުން އިންތިހާއަށް އޮތުމުން އެއީ ވަރަށް ބޮޑު މައްސަލައެއް ކަމަށެވެ.