ރަހުމްކުޑަ ހަމަލާއެއްގައި މަރާލާފައިވާ ލިޔުންތެރިޔާ، ޔާމީން ރަޝީދުގެ އާއިލާއިން ސްރީ ލަންކާގައި ހުންނަ އެމެރިކާގެ އެމްބަސީގެ އޮފިޝަލުންނާ ބައްދަލުކޮށްފިއެވެ.

މި ބައްދަލުވުމުގެ ތަފްސީލު ހާމަކޮށްފައި ނުވި ނަމަވެސް، ސްރީ ލަންކާގައި ހުންނަ އެމެރިކާގެ އެމްބަސީގެ އޮފިޝަލަކު ވަނީ ޔާމީންގެ އާއިލާއާ ބުރާސްފަތި ދުވަހުގެ ހެނދުނުގެ ވަގުތެއްގައި ބައްދަލުކޮށްފައިވާކަން ރާއްޖެއެމްވީއަށް ކަށަވަރުކޮށްދީފައެވެ.

ރާއްޖެއެމްވީއަށް އެނގިފައިވާ ގޮތުގައި މި ބައްދަލުވުމުގައި ޔާމީންގެ ބައްފަ، ހުސެއިން ރަޝީދު ވަނީ ބައިވެރިވެފައެވެ.

އާދިއްތަ ދުވަހުގެ ފަތިހު ވަގުތެއްގައި ތޫނު އެއްޗަކުން ހަމަލާދީ ޔާމީން މަރާލާފައިވާއިރު، ބޭރުގެ ފަރާތްތަކުންވެސް ވަނީ މި ހަމަލާ ހަރުކަށި އިބާރާތުން ކުށްވެރިކޮށްފައެވެ. އެގޮތުން އެމެރިކާއިން ރާއްޖެއަށް ކަނޑައަޅާފައި ހުންނަވާ ސަފީރު އަތުލް ކެޝަލް ވަނީ ޔާމީންގެ މަރުގެ އަވަސް، ފުރިހަމަ ތަހުގީގެއް ކޮށް، ކުށްވެރިން ހޯދުމަށް ގޮވާލައްވާފައެވެ.

މީގެ އިތުރުން، ކެޝަޕް ވިދާޅުވީ ޔާމީން ރަޝީދަކީ ހުރިހާ ދިވެހިންގެ އިންސާނީ ހައްގުތަކާއި ހިޔާލުފާޅު ކުރުމުގެ މިނިވަންކަމަށް ވަކާލާތު ކުރި މީހެއްކަމަށެވެ.

ޔާމީންގެ ދެ ގާތިލުންގެ ފޮޓޯ ހާމަކޮށްފައިވާއިރު، އެއީ ކޮން ބައެއް ކަމެއް ފުލުހުން އަދި ހާމައެއް ނުކުރެ އެވެ.