މި ހިނގާ 2020 ވަނަ އަހަރަކީ މޯލްޑިވް ގޭސްއަށް ވިޔަފާރީގެ ގޮތުން އެންމެ ކާމިޔާބު އެއް އަހަރު ކަމަށް އެ ކުންފުނިން ބުނެފިއެވެ.

މޯލްޑިވް ގޭސްއިން ނެރުނު ބަޔާނެއްގައި ބުނީ ކޮވިޑް-19 އާއި ގުޅިގެން މުޅި ދިވެހިރާއްޖޭގެ އިގްތިސާދަށް ކުރިމަތިވި ގޮންޖެހުމާއި އެކުންފުނިންވެސް ކުރިމަތިލާން ޖެހުނު ކަމަށާއި އެގޮތުން ރިސޯޓް ސެކްޓަރ އާއި ކެފޭ ރެސްޓޯރެންޓް ސެކްޓަރގެ ވިކުރާ ދަށްވެ، މޯލްޑިވް ގޭސް ކުންފުނީގެ ޖުމްލަ ސޭލްސް ރެވެނިއުއިން 40 މިލިއަން ރުފިޔާގެ ދަށްވުމެއް އައި ކަމަށެވެ. އެހެންނަމަވެސް ގޭސް ޝިޕްމަންޓްތަކުގެ ފުރެއިޓް އަދި ޕްރިމިއަމް އަށް ގެނެވުނު ބޮޑު ބަދަލުތަކާއިއެކު ކުންފުނިން ގޭސް ގަތުމުގައި ބޮޑު ތަނުން އަގު ހެޔޮކުރެވުނު ކަމުގައެވެ. އަދި ކޮވިޑާއި ގުޅިގެން އެޅުނު ހަރުދަނާ ފިޔަވަޅުތަކާއިއެކު ކުންފުނި ހިންގުމުގެ ހަރަދު ބޮޑު ތަނުން ކުޑަކުރެވިފައިވާ ކަމަށާއި، އެހެންކަމުން ކުންފުނި ހިންގުމުގެ ފައިދާ ބޮޑު ތަނުން އިތުރު ކުރެވިފައިވާ ކަމަށް އެ ކުންފުނިން ބުނެއެވެ.

މޯލްޑިވް ގޭސްގެ އެކްޓިންގ މެނޭޖިންގ ޑިރެކެޓަރ އަލީ އިކްރާމް ވިދާޅުވީ މޯލްޑިވް ގޭސްގެ މިސްރާބު މިހާރު ހުރި ގޮތުން މިއަހަރު ނިމޭއިރު ކުންފުނީގެ ފައިދާ 50 މިލިއަން ރުފިޔާއަށް ވުރެ އިތުރުވާނެ ކަމަށާއި، މިއީ ކުންފުނީގެ ހަޔާތުގައި ވެސް ރެކޯޑް އަދަދަކަށް ފައިދާވި އަހަރެއް ކަމަށެވެ.

މޯލްޑިވް ގޭހުން ވަނީ ކޮވިޑްގެ އެންމެ ނުރައްކާ އަދި އުނދަގޫ ދުވަސްވަރުވެސް ކައްކާ ގޭހާއި މެޑިކަލް އޮކްސިޖަން މެދުކެނޑުމެއްނެތި، މާރކެޓު ޑިމާންޑާއި އެއްވަރަށް ފޯރުކޮށްދީފައެވެ. އަދި ވަޒީފާތަކަށް ދިވެހިންނަށް އިސްކަންދީ މުވައްޒަފުންނަށް މެދުކެނޑުމެއްނެތި މުސާރައާއި އިނާޔަތްތަށް ބަރާބަރަށް ފޯރުކޮށްދީފަ އެވެ.