ޑިމާންޑު އިތުރުވަމުން އަންނާތީ، އެމިރޭޓްސް އެއާލައިނުން ރާއްޖެއަށް ކުރާ ދަތުރުތައް އަނެއްކާ ވެސް އިތުރުކޮށްފިއެވެ.

މިކަން ހާމަކޮށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ކުރި ޓްވީޓެއްގައި ވަނީ ހުކުރު ދުވަހުން ފެށިގެން އެ އެއާލައިނުން ރާއްޖެއަށް ދުވާލަކު ހަތަރު ފްލައިޓް ޝެޑިއުލްކޮށްފައިވާކަމަށެވެ. އަދި މިއާ ވިދިގެން އެ އެއާލައިނުން 1400 ފަތުރުވެރިން ރާއްޖެއަށް އަންނާނެކަމަށް އަންދާޒާކުރެވެއެވެ.

ކޮވިޑް-19 އާލަމީވަބާއާ ގުޅިގެން ބަންދުކުރި ރާއްޖޭގެ ބޯޑަރުތައް ޖުލައި މަހުގެ 15 ގައި ހުޅުވާލިފަހުން، އެމިރޭޓްސްގެ ފުރަތަމަ ފްލައިޓް ރާއްޖެ އައިސްފައި ވަނީ ޖުލައި މަހުގެ 16 ގައެވެ.

އެމިރޭޓްސްގެ ފުރަތަމަ ދަތުރުތައް ފަށާފައިވަނީ ހަފްތާއަކު ފަސް ފްލައިޓް ދަތުރުކުރާ ގޮތަށްނަމަވެސް އޮގަސްޓުން ފެށިގެން އެ އެއަރލައިންގެ ދަތުރުތައް ހަފްތާއަކު ހަ ފްލައިޓަށް ވަނީ އިތުރުކޮށްފައެވެ.

އެ އެއާލައިނުން ކޮންމެ ދުވަހަކު ރާއްޖެއަށް ފްލައިޓްތައް ބާއްވަން ފެށީ އޮކްޓޫބަރު މަހުގެ 7 ވަނަ ދުވަހުން ފެށިގެންނެވެ. އަދި ޑިސެމްބަރު 11 ވަނަ ދުވަހުން ފެށިގެން އެމިރޭޓްސްއިން އަންނަނީ ދުވާލަކު ތިން ފްލައިޓް ރާއްޖެއަށް ބާއްވަމުންނެވެ.

ޓޫރިޒަމް މިނިސްޓްރީން ހިއްސާކޮށްފައިވާ ބައެއް މައުލޫމާތުތަކަށް ބަލާއިރު، ބޯޑަރުތައް އަލުން ހުޅުވާލިފަހުން ރާއްޖެއަށް އެންމެ ގިނައިން ފަތުރުވެރިން އުފުލާ އެއާލައިންތަކުގެ ތެރޭގައި އެމިރޭޓްސް ހިމެނެއެވެ. އަދި ރާއްޖެއަށް އެންމެ ގިނަ މީހުން އުފުލާ އެއާލައިންތަކުގެ ތެރޭގައި ވެސް އެމިރޭޓްސް ހިމެނެއެވެ.