އޮކްސްފޯޑް ޔުނިވާސިޓީ އާއި އެސްޓްރަޒެނެކާ ގުޅިގެން އުފައްދާފައިވާ ކޮވިޑް-19 ވެކްސިންގެ ކްލިނިކަލް ޓްރަޔަލްތައް ނިންމާ ނަތީޖާ އާންމުކޮށްފި އެވެ.

ވެކްސިން ޓްރަޔަލްގެ ނަތީޖާ ދައްކާގޮތުން ކޮވިޑް-19 ގެ އަލާމަތްހުރި ފަރާތްތަކުގެ ތެރެއިން 70 އިންސައްތަ މީޙުންނަށް ވައިރަހުން ރައްކާތެރިކަން ކަަށަވަރުކޮށްދެ އެވެ. އަދި ވެކްސިންގެ ފުލް ދެ ޑޯޒް ދިން ފަރާތްތަކުގެ ތެރެއިން 62 އިންސައްތަ މީހުންނަށް ރައްކާތެރިކަން ކަށަވަރުކޮށްދޭ ކަމަށް ނަތީޖާތައް ދައްކާއިރު، ވެކްސިންގެ ހާފް ޑޯޒެއް އަދި ފުލް ޑީޒެއް ދިން ފަރާތްތަަކުގެ ތެރެއިން 90 އިންސައްތަ މީހުންނަށް ވެކްސިނުން ވަނީ ރައްކާތެރިކަން ކަށަވަރުކޮށްދީފަ އެވެ.

މީގެ އިތުުރުން، އޮކްސްފޯޑް ވެކްސިންގެ ކްލިނިކަލް ޓްރަޔަލްތައް ދައްކާގޮތުން ޓްރަޔަލްގައި ބައިވެރިވި 23,745 މީހުންގެ ތެރެއިން ކުޑަވެސް ނޭދެވޭ އަސަރެއް ދައްކާފައި ވަނީ ތިން މީހުންގެ ފަރާތުންނެވެ. މި ތިން މީހުންގެ ހާލު މީހާރު ރަނގަޅުކަމަށް މައުލޫމާތުދެ އެވެ.

އޮކްސްފޯޑް އާއި އެސްޓްރަޒެނެކާ ވެކްސިންގެ ކްލިނިކަލް ޓްރަޔަލްތައް ވަނީ ތިން މަސް ދުވަހަށް ވުރެ ގިނަ ދުވަހު ކުރިއަށް ގެންގޮސްފަ އެވެ.

މީގެ ކުރިން ހާމަކޮށްފައިވާ ޑޭޓާ ދައްކާގޮތުން އުމުރުން 70 އަހަރުން މަތީ މީހުންނާއި ބޮޑެތި ބަލިތައް ހުންނަ މީހުންގެ ދިފާއީ ނިޒާމު މިވެކްސިން ޖެހުމުން ވައިރަސްއާ ދެކޮޅަށް މަސައްކަތް ކުރެއެވެ.

އޮކްސްފޯރޑް ވެކްސިން ގްރޫޕުން ބުނެފައި ވަނީ މި ވެކްސިންއިން ވައިރަސްގެ އަސަރު އެންމެ ބޮޑަށް ކުރާ މީހުން ވައިރަސްއިން ރައްކާތެރިކޮށްދޭނެ ކަމަށެވެ.

އެސްޓްރަޒެނެކާގެ އޮޕަރޭޝަންސް އެކްސެކިއުޓިވް ޕަމް ޗެންގް ވަނީ އެ ކުންފުނިން އުފައްދާ ކޮވިޑް ވެކްސިންގެ 200 މިލިއަން ޑޮޒް 2020 ވަނަ އަހަރު އުފެއްދޭނެ ކަމަށާއި 2021 ވަނަ އަހަރުގެ ފުރަތަމަ ކުއަރޓާ ނިމެންވާއިރަށް ވެކްސިންގެ 700 މިލިއަން ޑޯޒް އުފެއްދޭނެ ކަމަށް ބުނެފަ އެވެ.