އިރާނުގައި ކޮވިޑް-19 ޖެހިގެން މަރުވި މީހުންގެ އަދަދު 50،000ށް އެރުމާއެކު އެ ގައުމުގައި ވައިރަސް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތައް ދިގު ދައްމާލައިފިއެވެ.

އިރާނަކީ މެދު އިރުމަތީގައި ކޮވިޑްގެ ހާލަތު އެންމެ ގޯސް ގައުމެވެ. އަދި އިރާނަށް މިހާރު ކޮވިޑްގެ ތިންވަނަ ރާޅެއްވަނީ އައިސްފައެވެ. އިރާނުގައި ކޮވިޑް-19 ޖެހުނު މީހުންގެ އަދަދުވަނީ މިލިއަނަކަށް އަރާފައެވެ.

ވައިރަސް ފެތުރުން ކޮންޓްރޯލްކުރުމަށް އިރާނުގެ މައި ސިޓީ ތެހެރާން ހިމެނޭގޮތަށް ގިނަ ސިޓީތަކެއް ވަނީ ދެ ހަފްތާގެ މުއްދަތަށް ލޮކްޑައުންކޮށްފައެވެ. އެގޮތުން ސިޓީތަކުގައި ކޮންމެހެން ދޭންޖެހޭ ޚިދުމަތްތައް ނޫން އެހެން ޚިދުމަތްތައް ދިނުންވަނީ މެދުކަނޑާލާފައެވެ. އަދި ސަރުކާރު އޮފީސްތަކަށް ގޮސްގެން ޚިދުމަތްދޭ މިންވަރުވަނީ މަދުކޮށްފައެވެ.

ސިޓީތަކުގައި ކޮވިޑް-19 ޖެހޭ މީހުންނާއި ވައިރަސް ޖެހިގެން ހޮސްޕިޓަލްގައި އެޑްމިޓްކުރާ މީހުންގެ އަދަދު އޮފިޝަލުން އަންނަނީ ގަވާއިދުން ބަލަމުންނެވެ. އަދި ސިޓީތަކުގައި ވައިރަސް ހުރި މިންވަރަށް ބަލާ ކަނޑައަޅާފައިވާ ކުލަތަކަށް ބަދަލުތައް އާދޭތޯ އޮފިޝަލުން އަންނަނީ ބަލަމުންނެވެ.

އެގޮތުން ވައިރަސްގެ އެއްވެސް ނުރައްކަލެއް ނެތް ސިޓީތަކަށް ހުދު ކުލަ ދީފައިވާއިރު ވައިރަސްގެ ހާލަތު އެންމެ ގޯސް ސިޓީތަކަށް ދީފައިވާ ކުލައަކީ ރަތް ކުލައެވެ. ހޮނިހިރު ދުވަހު އެ ގައުމުންވަނީ ރަތް ކުލަ ހުރި ސަރަހައްދުތަކުގައި ލޮކްޑައުންކޮށްފައި އޮތްއޮތުން އަދިވެސް ދިގުދައްމާލާނެކަމަށް ބުނެފައެވެ.

އޭގެ އިތުރުން ރޭގަނޑު ގަޑީގައި ކާފިއު އިއުލާންކޮށްފައި އޮތްއޮތުން 278 ސިޓީއެއްގައި ވަނީ ދިގުދައްމާލާފައެވެ. އެ ސިޓީތަކަށް ދީފައިވާ ކުލައަކީ އޮރެންޖް ކުލައެވެ. އޭގެ މާނައަކީ އެ ސަރަހައްދުތަކުގައި ވައިރަސްގެ ހާލަތު އަންނަނީ ރަނގަޅުވަމުންނެވެ. މީގެ އިތުރުން ހުރިހާ ރައްޔިތުން މާސްކު އަޅައިގެން އުޅެންޖެހޭ އުޅުން ވަނީ އަދިވެސް އެގޮތުގައި ދަމަހައްޓާފައެވެ.

އިރާނުގެ ރައީސް ހަސަން ރޫހާނީ ވިދާޅުވީ މީހުންނާއި އޮފިޝަލުން ސަމާލުކަންދޭންޖެހޭ ކަންކަމަށް ސަމާލުކަންނުދޭނަމަ ތެހެރާންގެ ހާލަތު ލޮކްޑައުންކުރި އިރު އޮތް ހިސާބަށް ދިޔުމަކީ އެކަށީގެންވާ ކަމެކެވެ. އެހެންކަމުން ވައިރަހުން ރައްކާތެރިވުމަށް އަޅާފައިވާ ފިޔަވަޅުތަކަށް ސަމާލުކަން ދިނުމަށް ރޫހާނީ ގޮވާލެއްވިއެވެ.

އިރާނުގައި މިހާތަނަށް އެންމެ ގިނަ މީހުންނަށް އެއް ދުވަހާ ވައިރަސް ޖެހިގެން ރިކޯޑް ކޮށްފައިވަނީ ނޮވެމްބަރ މަހުގެ 27 ވަނަ ދުވަހުއެވެ. އެއީ 14،051 މީހުންނަށެވެ. އަދި އެންމެ ގިނަ މީހުން މަރުވެގެން ރިކޯޑްކޮށްފައިވަނީ ނޮވެމްބަރ މަހުގެ 16 ވަނަ ދުވަހު އެވެ. އެ ދުވަހު ވައިރަސް ޖެހިގެން 486 މީހުންވަނީ މަރުވެފައެވެ.