އެންމެ ފަހުން ދުނިޔެއަށް ހަނދުން ސާމްޕަލް ގެނައިތާ 44 އަހަރު ފަހުން ޗައިނާގެ ޖައްވީ އުޅަނދު ޗަންގުއޫ-5 ހަނދުން ސާމްޕަލް ހިފައިގެން ދުނިޔެ އަށް މިސްރާބު ޖަހައިފި އެވެ.

ޗައިނާގެ ސައިންސްވެރިން ބުނީ މިއީ ހަނދުގެ މިޝަންގެ މުހިންމު މަރުހަލާއެއް ކަމަށެވެ. އަދި ޗައިނާގެ ޖައްވީ އުޅަނދު ޗަންގުއޫ-5 ހަނދުން ވެއްޔާއި ގަލާ އަދި ހިރަފުހުގެ ސާމްޕަލް ގެންނާނެ ކަމަށް އެގައުމުގެ ސައިންސްވެރިން ބުންޏެވެ.

އެންމެ ފަހުން ހަނދުން ސާމްޕަލް ގެނަސްފައިވަނީ 1976 ވަނަ އަހަރު އެޕޯލޯގެ އެސްޓްރޮނޯޓުންނެވެ. އެފަހަރު 400 ކިލޯގެ ސާމްޕަލް ވަނީ ގެނަސްފައެވެ. އެކަމަކު އެއީ ތިން ބިލިއަން އަހަރުވެފައިވާ ސާމްޕަލް ތަކެކެވެ.

ޗައިނާ ހަނދުގެ މިޝަންގެ އިސް އޮފިޝަލަކު ބުނީ ޗައިނާގެ އުޅަނދުން ސާމްޕަލް ނަގައިފައިވާނީ ވޮލްކަނިކް އޭރިއާއެއް ކަމަށްވާ މޮންސް ރުމްކާ އިންކަމަށެވެ. އަދި އެއީ ހަނދު ދުނިޔެއާއި ކައިރި ފަރާތުގެ ހުޅަނގު އުތުރު ކަމަށް އޭނާ ބުންޏެވެ، އެނާ ބުނީ މި އޭރިއާގެ ސާމްޕަލް އަށް ވާނީ 1.2 ނުވަތަ 1.3 ބިލިއަން އަހަރު ކަމަށެވެ.

ޗައިނާގެ ސަރުކާރުން ބުނީ މި މިޝަން ފުރިހަމަވާނީ ކާމިޔާބުކަމާއިއެކު ޖައްވީ އުޅަނދު ދުނިޔެއަށް ޖެއްސުމުން ކަމަށެވެ. އަދި މިއީ ޗައިނާގެ ސަރުކާރުން ވަރަށް ބޮޑު އަހަންމިއްޔަތުކަމެއް ދީގެން ކުރަމުން ގެންދާ މަސައްކަތެއް ކަމަށް އެގައުމުގެ ސަރުކާރުން ބުނެއެވެ.