ތުރުކީވިލާތުގައި 2016 ވަނަ އަހަރު ސިފައިންތަކެއް އިސްވެތިބެ ހިންގަން އުޅުނު ބަޣާވާތާ ގުޅިގެން 337 މީހުން އުމުރަށް ޖަލަށް ލާން އެ ގައުމުގެ ކޯޓަކުން ހުކުމްކޮށްފި ކަމަށް ބޭރުގެ މީޑިއާތަކުން ރިޕޯޓްކޮށްފިއެވެ.
ތުރުކީގެ ދައުލަތުގެ މީޑިއާއާ ހަވާލާދީ "އަލްޖަޒީރާ" ގައި ރިޕޯޓްކޮށްފައިވާ ގޮތުގައި މި މައްސަލައިގައި އުމުރަށް ޖަލަށް ލާން ހުކުމްކުރި މީހުންގެ ތެރެއިން 291 މީހެއްގެ މައްޗަށް ހުކުމްކޮށްފައި ވަނީ ޕެރޯލްގެ ފުރުސަތު ނުލިބޭ ގޮތަށެވެ. އޭގެ ތެރޭގައި މި ބަގާވާތް ހިންގަން އިސްކޮށް އުޅުނު ތުރުކީގެ ވައިގެ ސިފައިންގެ ލަޝްކަރުގެ ގިނަ ޕައިލެޓުން ހިމެނޭކަމަށް ވަނީ ރިޕޯޓްކޮށްފައެވެ.
ބަޣާވާތް ކުރަން އުޅުނު މައްސަލައިގައި ހައްޔަރުކުރެވުނު މީހުންގެ ޝަރީއަތް ފަށާފައި ވަނީ އޮގަސްޓް 2017 ގައެވެ. މި މައްސަލައިގައި ދައުވާއުފުލި 475 މީހުންގެ ތެރެއިން 365 މީހެއްގެ ޝަރީއަތް ކޮށްފައިވަނީ ބަންދުގައި ބަހައްޓައިގެންނެވެ.
ތުރުކީގެ ރައީސް އުރުދުޣާން ތުހުމަތުކުރައްވާ ގޮތުގައި މި ބަޣާވާތުގެ އަޑީގައި ހުންނެވީ އެމެރިކާގައި ދިރިއުޅޭ ތުރުކީގެ ރައްޔިތެއް ކަމަށްވާ ފަތުހުﷲ ގުލާންއެވެ. ނަމަވެސް ބަޣާވާތުގައި އެއްވެސް ރޯލެއް ނޯންނާނެ ކަމަށް 79 އަހަރުގެ ގުލާން ވަނީ ވިދާޅުވެފައެވެ.
ބަޣާވާތުގައި ބައިވެރިވި ކަމަށް ބުނެ 77000ށް ވުރެ ގިނަ މީހުން ހައްޔަރު ކުރެވިގެން ދިޔައިރު ގުލާންއާއި ގުޅުން އޮތް ކަމަށް ބުނެ އެ ގައުމުގެ 160،000 މީހުން ވަޒީފާއިން ވަކިކޮށްފައިވެއެވެ. އޭގެ ތެރޭގައި ސިފައިންނާއި ޓީޗަރުންނާއި ފަނޑިޔާރުން ހިމެނެއެވެ.
ބަޣާވާތާއި ގުޅިގެން 300ށް ވުރެ ގިނަ މީހުން މަރުވެ، 2100 މީހަކަށް އެކިވަރުގެ ޒަހަމްތައް ލިބިގެން ދިޔައެވެ. އަދި ހަމަ އެހެންމެ އެ ގައުމުގެ ސަރުކާރުގެ ބޮޑެތި އިމާރަތްތަކަށް ބޮޑެތި ގެއްލުންތަކެއް ދީފައިވެއެވެ. އެގޮތުން އެ ގައުމުގެ މަޖިލިސް ގެޔާއި ރައީސްގެ ގެކޮޅަށް ވައިމަގުން ބޮން އަޅާފައިވެއެވެ.
