ބަންގްލަދޭޝްގެ ބޮޑުވަޒީރު ޝޭޚް ހަސީނާއާ އިންޑިއާގެ ބޮޑުވަޒީރު ނަރެންދްރަ މޯދީއާ ދެ ބޭފުޅުން ދެމެދު ވާރޗުއަލް ސަމިޓެއް ބާއްވަން ނިންމައިފި އެވެ.
އިންޑިއާގެ ފޮރިން މިނިސްޓްރީގެ އޮފިޝަލަކު އެ ގައުމުގެ ނޫހަކަށް ދެއްވި އިންޓަރވިޔުއެއްގައި ވިދާޅުވީ، ދެ ދުވަހުގެ މުއްދަތަކަށް ބާއްވާ ސަމިޓް ކުރިޔަށްދާނީ އަންނަ މަހުގެ 16 އިން 17 އަށް ކަމަށެވެ. އަންނަ އަހަރު ބަންގްލަދޭޝްގެ މިނިވަން ދުވަހަށް އެ ގައުމަށް ވަޑައިގަތުމުގެ ދައުވަތު ވަނީ މޯދީ އަށް ދެއްވާފަ އެވެ.
ޓީސްޓާ ކޯރުގެ ފެން ދެ ގައުމުން ބޭނުންކުރުމަށް އެކުލަވައިލާ އެއްބަސްވުން ފައިނަލް ކުރުމުގެ މަސައްކަތް ކުރަމުންދާ ކަމަށް އިންޑިއާއިން ބަންގްލަދޭޝް އަށް އަންގާފައިވާ ކަމަށް މޯދީ އަންގަވާފައިވާ ކަމަށް ފޮރިން މިނިސްޓްރީންގެ ތަރުޖަމާނު ވަނީ ވިދާޅުވެފަ އެވެ.
ބަންގްލަދޭޝްގެ ފޮރިން މިނިސްޓަރު ޑރ. އޭކެ އަބްދުލް މޮމެން ވިދާޅުވީ، މިނިވަން ދުވަހުގެ ރަސްމިއްޔާތަށް ވަޑައިގަންނަވަން ދެއްވި ދައުވަތު މޯދީ ގަބޫލްކުރައްވާފައިވާ ކަމަށެވެ. ދެ ގައުމު ދެމެދުގައި އޮންނަ ގުޅުމަކީ ގާތް ގުޅުމެއްކަން އޭނާ ވަނީ ފާހަގަކުރައްވާފަ އެވެ.
މިދިޔަ އަހަރު ޝޭހް ހަސީނާއާ މޯދީއާ ދެ ބޭފުޅުން ވަނީ ބައްދަލުކުރައްވާފަ އެވެ.
