އެއަރޕޯޓުގައި މަސައްކަތް ކުރާ ދެ ކުންފުންޏަކުން 50 އަށް ވުރެއް ގިނަ މީހުން ކޮވިޑް-19ށް ޕޮޒިޓިވްވެފައިވާ ކަމަށް ހެލްތް އިމަރޖެންސީ އޮޕަރޭޝަން ސެންޓަރ (އެޗް.އީ.އޯ.ސީ)ގެ ތަރުޖަމާނު ޑރ. ފާތިމަތު ނަޒްލާ ރަފީޤު ވިދާޅުވެއްޖެ އެވެ.

އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނަޒްލާ ރަފީޤު ވިދާޅުވީ ވެލާނާ އިންޓަރނޭޝަނަލް އެއަރޕޯޓުގައި މަސައްކަތް ދެ ކުންފުންޏެއްގައި މަސައްކަތްކުރާ 52 ބިދޭސީން ކޮވިޑް-19 އަށް ޕޮޒިޓިވްވެފައި ވާކަމަށެވެ. އޭގެތެރެއިން އެއް ކުންފުންޏަކީ ޗައިނާ ހަބަރ އިންޖިނިއަރިންގ ކޮންޕެނީ އެވެ.

ޑރ. ނަޒްލާ ވިދާޅުވީ ޕޮޒިޓިވްވި މީހުންނަކީ ސަބް-ކޮންޓްރެކްޓްގެ ދަށުން އެއަރޕޯޓުގެ މަސައްކަތުގައި ހަރަކާތްތެރިވާ ބައެއް ކަމަށެވެ. މި ކޭސް އާއި ގުޅިގެން އެއް ކުންފުންޏެއްގެ 425 މުވައްޒަފުންނާއި އަނެއް ކުންފުނީގެ 225 މުވައްޒަފުން ކަރަންޓީންކޮށްފައިވާ ކަމަށް ޑރ. ނަޒްލާ ވިދާޅުވިއެވެ. އަދި މިކޭސްތަކުގެ ކޮންޓެކްޓް ޓްރޭސިންގގެ މަސައްކަތްތައްވެސް މިހާރު ކުރިއަށް ދާކަމަށް ނަޒްލާ ވިދާޅުވި އެވެ.

ރާއްޖެއިން މިހާތަނަށް 11986 މީހަކު ބައްޔަށް ޕޮޒިޓިވްވެފައިވާއިރު، 11092 މީހަކު ވަނީ ބަލިން ރަނގަޅުވެފަ އެވެ. އަދި މިބަލީގައި މިހާތަނަށް 40 މީހަކު ވަނީ ނިޔާވެފަ އެވެ.