ދެވަަނަ ބޮޑު ހަނގުރާމަ ތެރޭގައި އިނގިރޭސިވިލާތުން ޕޮލެންޑުގެ ކޯރަކަށް ވައްޓާލީ ބޮމެއް ފެނި ޑިފިއުޒް ކުރުމުގެ މަސައްކަތް ކުރަމުން ދަނިކޮށް އެ ބޮން ގޮވައިފިއެވެ.

ބަރުދަނުގައި 12،000 ޕައުންޑު ހުންނަ ''ޓޯލް ބޯއި'' ނުވަތަ ''އާތްކުއޭކް'' ބޮން ވައްޓާލާފައިވަނީ ދެވަނަ ބޮޑު ހަނގުރާމައިގެ ފަހުކޮޅު ރޯޔަލް އެއާ ފޯހުންނެވެ. މި ބޮމަކީ ޕޮލެންޑުން ފެނުނު އެންމެ ބޮޑު އެއް ބޮމެވެ. ގަބޫލުކުރެވޭ ގޮތުގައި މި ބޮމަކީ ޖަރުމަނުގެ ''ލޫޓްޒްވޯ'' ބޯޓު ރެއިޑް ކުރުމުގެ ތެރޭގައި ގެންގުޅުނު ބޮމެކެެވެ.

ޕޮލެންޑުގެ އަސްކަރިއްޔާއިން ވަނީ އަންގާރަ ދުވަހު ''ޑިފްލަގްރޭޝަން'' ކޮށްގެން ބޮން ޑިފިއުޒް ކުރަން މަސައްކަތް ކޮށްފައެވެ. ''ޑިފްލަގްރޭޝަން'' ގައި ޑިޓޮނޭޓް ކުރުމުގެ ބަދަލުގައި ގޮވާތަކެތި ހޫނު ކުރުމެވެ. އެކަމަކު އެ މަސައްކަތް ކުރަމުން ދަނިކޮށް ޝިނޯސްޓު ބަނދަރު ސިޓީގެ ކޯރުގައި ބޮން ވަނީ ގޮވާފައެވެ.

ބޮން ނެގުމުގެ މަސައްކަތް ފެށީ ހޯމަ ދުވަހުއެވެ. އަސްކަރިއްޔާއިން ވަނީ އެ އޮޕަރޭޝަން ފެށުމުގެ ގޮތުން އެ ސަރަހައްދުގައި ދިރިއުޅެމުންދާ 750 މީހަކު އެހެނިހެން ސަރަހައްދުތަކަށް ގެންގޮސްފައެވެ.

ޑިފެންސް މިނިސްޓްރީގެ ތަރުޖަމާނުގެ ވިދާޅުވީ، ބޮން ގޮވުމުގެ ސަބަބުން އެއްވެސް މީހަކަށް އަނިޔާއެއް ލިބިފައިނުވާ ކަމަށެވެ. ދެވަނަ ބޮޑު ހަނގުރާމައިގެ ދުވަސްވަރު ޖަރުމަނުގެ ނާޒީން ހިސާރު ކޮށްގެން އުޅުނު ޕޮލެންޑަށް ވަނީ އެކި ފަހަރު މަތިން ބޮންއަޅާފައެވެ.