ހަރުކަށި ފިކުރާއި ހައްދުފަހަނައަޅާ ދިއުމާ ދެކޮޅަށް ކުރާ މަސައްކަތުގައި މި ސަރުކާރުގެ އެންމެ މުހިންމު ބައިވެރިއަކީ ދިވެހި މީޑިއާކަމަށް ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރު ވިދާޅުވެއްޖެ އެވެ.

ސްޓޭޓް މިނިސްޓަރު ނަޒީރު މިހެން ވިދާޅުވީ ހަރުކަށި ފިކުރާއި، ހައްދު ފަހަނައަޅައި ދިއުމާ ގުޅޭގޮތުން މީޑިޔާ ހޭލުންތެރިކޮށް ބާރުވެރިކުރުމަށް އެއް ދުވަހަށް ބޭއްވި ވެބިނާގައި ފެށުމުގެ ބައިގައި ވާހަކަދައްކަވަމުންނެވެ.

މިނިސްޓްރީ އޮފް ހޯމްއެފެއާޒުން އިސްނަގައިގެން ރާވާ އެއް ދުވަހުގެ މި ވެބިނާއަކީ، ހަރުކަށި ފިކުރާއި ހައްދުފަހަނައަޅައި ދިޔުމާއި، އެފަދަ ކަންކަމާ ގުޅޭ ޚަބަރާއި މަޢުލޫމާތު މުވާސަލާތު ކުރުމުގައި ބައިނަލްއަގުވާމީގޮތުން ގެންގުޅޭ އުސޫލުތަކަށް ދިވެހި މީޑިއާ އަހުލުވެރިކޮށް، ބާރުވެރި ކުރުވުމަށް ބޭއްވި ވެބިނާއެކެވެ. މި ވެބިނާގެ އަމާޒަކީ، ނޫސްވެރިކަމުގެ ސުލޫކާއި އުސޫލުތަކަށް އަހައްމިއްޔަތުކަން ދިނުމާއެކު، ހަރުކަށި ފިކުރާއި ހައްދުފަހަނައަޅައިދިޔުމާ ގުޅުންހުރި ޚަބަރާއި މައުލޫމާތު ފެތުރުމުގައި ސަމާލުކަންދޭންޖެހޭ މުހިއްމު ކަންކަމަށް އަހުލުވެރިކުރުވުމެވެ.

ހަރުކަށި ފިކުރުގެ މައްސަލަތަކަށް އަލިއަޅުއްވާލައްވައި ނަޒީރު ވިދާޅުވީ ހަރުކަށި ފިކުރާއި ހައްދުފަހަނައަޅާ ދިއުމަކީ މިއަދު މިރާއްޖޭގައި ވަކިވަކި އައިސޮލޭޓެޑް މައްސަލަ ތަކަށްވުރެ ބޮޑަށް، ގައުމީ ބޮޑު މައްސަލައެއްކަމަށެވެ. މަސްތުވާތަކެތީގެ ވަބާފަދަ، ކޮންމެ ގޭބިސީއަކާ ހަމަޔަށް ވެސް ފޯރާފައިވާ ކަންބޮޑުވުމެއްކަމަށް ވިދާޅުވިއެވެ.

ވޭތުވެދިޔަ މާޒީގައި ކަން ހިނގާފައިވާ ގޮތުން ދައުލަތުގެ މުއައްސަސާތަކަށް އެކަށީގެންވާ ގޮތުގައި މި މައްސަލައަށް ހައްލެއް ހޯދުމަށް މަސައްކަތް ކުރާނެ ފުރުސަތު ނުލިބުނު ކަމުގައިވިޔަސް، ރައީސުލްޖުމްހޫރިއްޔާ އިބުރާހިމް މުހައްމަދު ސާލިހުގެ ސަރުކާރުގެ މުހިންމު އެއް އެޖެންޑާއަކީ ހަރުދަނާ ސިޔާސަތެއްގެ ތެރެއިން ހަރުކަށި ފިކުރާއި ހައްދުފަހަނައަޅާ ދިއުމުގެ މައްސަލައަށް އެކަށީގެންވާ ހައްލެއް ހޯދުން ކަމަށް ނަޒީރު ވިދާޅުވިއެވެ.

މީޑިއާ އަކީ ޑިމޮކްރެޓިކް މުޖުތަމައުގެ ހަތަރުވަނަ ބާރުކަން ފާހަގަކުރައްވައި ނަޒީރު ވިދާޅުވީ މިއަދުގެ ދުނިޔޭގެ ހަގީގަތަކީ ކޮންމެ ކަމެއްގައި ވެސް އެންމެ ބާރުގަދަ ހަތިޔާރަކީ މީޑިއާކަންކަމަށެވެ.

ބައިނަލްއަގުވާމީ މަސްރަހުގައި ހިނގާ ހަމަނުޖެހުމަކަށް ވިޔަސް، ދާޚިލާ ސިޔާސީ ކަމަކަށްވިޔަށް، އިޤްތިސާދީ ކަމަކަށް ވިޔަސް، ދީނީ ނުވަތަ އިޖުތިމާއީ ކަމަކަށް ވިޔަސް ސާފުކޮށް އެނގެން އޮތް ހަޤީގަތަކީ އެކަމަކާމެދު ރައްޔިތުންގެ ވިސްނުމާ ފިކުރު ބައްޓަންކުރުމުގައި އެންމެ މުހިންމު ދައުރެއް އަދާކުރާ ބަޔަކީ ނޫސްވެރިންކަން ކަމަށް ނަޒީރު ވިދާޅުވިއެވެ. އެސަބަބާހުރެ ހަރުކަށި ފިކުރާއި ހައްދުފަހަނައަޅާ ދިއުމާދެކޮޅަށް ކުރާ މަސައްކަތުގައި މި ސަރުކާރުގެ އެންމެ މުހިންމު ބައިވެރިއަކީ ދިވެހި މީޑިއާކަމުގައި ދެކިވަޑައިގަންނަވާ ކަމަށް ވިދާޅުވިއެވެ.

މި މައްސަލަ ޙައްލު ކުރުމަކީ ސަރުކާރަށް އެކަނި ކުރެވޭނެ ކަމެއް ނޫންކަމަށާއި، މިކަމުގައި ދިވެހި މީޑިއާގެ ފުރިހަމަ އެހީތެރިކަމާ އެއްބާރުލުން ލިބިގެންދިއުމަށް އެދިވަޑައިގެންނެވިއެވެ.

އެންސީޓީސީގެ ޑިރެކްޓަރ ޖެނެރަލް ބްރިގޭޑިއަރ ޖެނެރަލް ޒަކަރިއްޔާ މަންސޫރު ވިދާޅުވީ މީޑިއާ އަކީ ގައުމުގެ ރައްޔިތުންގެ މެދުގައި އޮންނަ ސުލްހަވެރިކަމާއި އަމާންކަށް ކަށަވަރުކުރުމުގައި ހަމަހަމަކަމާއެކު މަޢުލޫމާތު ފޯރުކޮށްދިނުމުގައި އެންމެ އިސް ސަފުގައި މަސައްކަތްކުރާ ފަރާތް ކަމަށެވެ. އެހެންކަމުން މީޑިއާގެ ފަރާތުން ގެނެސްދޭ ކޮންމެ މައުލޫމާތެއް ބިނާވާންވާނީ އޭގެ ސައްހަކަން އެކުލެވިގެންވާ، މައުލޫމާތުތަކުގެ ސަބަބުން ރައްޔިތުންގެ މެދުގައި އަމަންއަމާންކަމާއި އެކު ހޭލުންތެރިކަން އިތުރުކޮށް ހެޔޮމަގުދެއްކުމުގެ މައްޗަށްކަމަށް ވިދާޅުވިއެވެ.

މިވެބިނަރ މިނިސްޓްރީން ކުރިއަށްގެންދަނީ މޯލްޑިވްސް ޕޮލިސް ސަރވިސްއާއި، ނެޝަނަލް ކައުންޓަރ ޓެރަރިޒަމް ސެންޓަރާ ގުޅިގެންނެވެ. ވެބިނާގައި މޯލްޑިވްސް ބްރޯޑްކާސްޓިންގ ކޮމިޝަނާއި، މޯލްޑިވްސް މީޑިޔާ ކައުންސިލާއި، މޯލްޑިވްސް ޖަރނަލިސްޓް އެސޯސިއޭޝަނާއި، ރާއްޖޭގެ މީޑިޔާތަކުން ނޫސްވެރިން ބައިވެރިވެއެވެ.

ޕެނަލިސްޓުން ހިމެނޭ ގޮތަށް 41 ބޭފުޅުން ވެބިނާގައި ބައިވެރިވެވަޑައިގަންނަވައެވެ.