ހިޔާ މަޝްރޫޢުގެ ދަށުން ހުޅުމާލޭ 2 ވަނަ ފިޔަވަހީގައި ތަރައްޤީކުރަމުންދާ 7000 ހައުސިންގ ޔުނިޓަށް ނަރުދަމާ ނިޒާމްގެ ޤާއިމު ކުރުމުގެ ޢަމަލީ މަސައްކަތް މާލޭ ވޯޓަރ އެންޑް ސްވެރޭޖް ކޮމްޕެނީ (އެމް.ޑަބްލިޔު.އެސް.ސީ)ން ފަށައިފިއެވެ.

އަމަލީ މަސައްކަތް ފެށުމަށް ހުޅުމާލޭގައި ބޭއްވި ރަސްމިއްުޔާތުގައި މިމަސައްކަތް އަމަލީ ގޮތުން ފައްޓަވައިދެއްވީ އެމްޑަބްލިޔުއެސްސީގެ ޗެއަރ މަން އަހުމަދު މައުސޫމާއި މެނޭޖިންގ ޑިރެކްޓަރ ޙަސަން ޝާހެވެ.

ހިޔާ މަޝްރޫޢުގެ ދަށުން ޤާއިމްކޮށްފައިވާ 16 ޓަވަރަށް ޖުމްލަ 580 ކަނެކްޝަން ގުޅައިދެވި ގެންދާނެއެވެ. އަދި އެމް.ޑަބްލިޔު.އެސް.ސީ އިން، މިސަރަހައްދަށް ނަރުދަމާގެ ޚިދުމަތް ފޯރުކޮށްދިނުމަށްޓަކައި 11,003 މީޓަރުގެ ނަރުދަމާގެ މައި ނެޓްވޯރކާއި، 283 މޭން ހޯލް އާއި 2 ޕަންޕިންގް ސްޓޭޝަން ޤާއިމް ކުރެވިގެންދާނެ ކަމަށް އެމްޑަބްލިޔުއެސްސީން ބުނެއެވެ.

މި މަސައްކަތް އަންނަ އަހަރުގެ ފެބްރުއަރީ މަހަށް ނިންމާލުމަށް ވަނީ ތާވަލްކޮށްފައެވެ.

ހިޔާ މަޝްރޫއަކީ ބޯހިޔާވަހިކަމުގެ މައްސަލައަށް ހައްލެއް ހޯދައި ދިނުމުގެ ގޮތުން ކުރީ ސަރުކާރުން ފައްޓާފައިވާ މަޝްރޫޢުކެވެ. އެހެންނަމަވެސް އެސަރުކާރު ނިމި އައު ސަރުކާރާއި ހަވާލުވިއިރު ފްލެޓުތަކާއި ގުޅިގެން ގިނަ މައްސަލަތަކެއްވަނީ ފެންމަތިވެފައެވެ. އެގޮތުން ފްލެޓްތަކުގެ ޖާގަ ކުޑަވުމުގެ މައްސަލަ އާއި އަގުގެ މައްސަލަތަކެއް ވަނީ ފެންމަތިވެފަ އެވެ.

ހިޔާ ހައުސިންގ ޔުނިޓްތަކުގެ ސްޓްރަލކްޗަރަލް ހުރިހާ މަސައްކަތްތައް ވަނީ ނިމިފައެވެ. މިހާރު ކުރިއަށް ގެންދަނީ ފިނިޝިންގ މަސައްކަތެވެ.