އިދިކޮޅު ޕްރޮގްރެސިވް ކޯލިޝަންގެ އެޑްވައިޒަރު ކަމުގެ މަގާމަށް އިސްލާމިކް ޔުނިވާސިޓީގެ ކުރީގެ ޗާންސެލާ ޑރ. މުހައްމަދު ޝަހީމް އަލީ ސައީދު ހަމަޖައްސަވައިފިއެވެ.

ޝަހީމް، އެޑްވައިޒަރު ކަމުގެ މަގާމު ދެއްވާފައިވަނީ ބުރާސްފަތި ދުވަހު ޕީޕީއެމް އޮފީހުގައި ބޭއްވި ރަސްމިއްޔާތެއްގައެވެ.

އެޑްވައިޒަރު ކަމާއި ހަވާލުވެވަޑައިގެން ވާހަކަ ދައްކަވަމުން 2018 ވަނަ އަހަރުގެ ރިޔާސީ އިންތިހާބުގައި ރައީސް އަބްދުﷲ ޔާމީންގެ ރަނިން މޭޓްކަން ވެސް ކުރެއްވި ޝަހީމް ވިދާޅުވީ، އެންމެ ބޮޑަށް އުފާފުޅުވީ ރާއްޖެއިން ބޭރުގައި ގިނަ ދުވަސްތަކެއް ވަންދެން އުޅުއްވުމަށް ފަހު އަލުން އަނބުރާ ރާއްޖެ ވަޑައިގެންނެވުމުން ކަމަށެވެ.

ސިޔާސީ މަސައްކަތް ކުރައްވަން ޝަހީމް ރާއްޖެ ވަޑައިގެންނެވުމުގެ ކުރިން އޭނާ ހުންނެވީ ސައުދީ އަރަބިޔާގައި ހުންނަ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ސެކެރެޓަރީ ޖެނެރަލްގެ މުޝީރުގެ މަގާމުގައެވެ.

ޝަހީމް ވިދާޅުވީ، ޖަލުގައި ހުކްމް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަކީ ރައްޔިތުން ދެކެ ލޯބިފުޅުވާ އަދި ގައުމުދެކެ ވަރަށް ލޯބިފުޅުވާ ބޭފުޅެއް ކަމަށެވެ. ރާއްޖެއަށްޓަކައި ޔާމީން ކޮށްދެއްވި މަސައްކަތްޕުޅަކީ ޝަހީމްގެ ނަޒަރުގައި ޤުރުބާނީއެކެވެ.

ޕީޕީއެމް/ޕީއެންސީގެ އިސް ބޭފުޅުން ވިދާޅުވަމުން ގެންދަވާ ފަދައިން ޝަހީމް ވެސް ވިދާޅުވީ، އަދުލުވެރި ޝަރިޔަތެއް ކުރެއްވިއްޖެނަމަ ޔާމީން މިނިވަން ވާނެ ކަމަށެވެ. މި ދަނޑިވަޅަކީ މާޔޫސް ނުވެ، މަސައްކަތް ކުރަން އެންމެންގެ ސަފުތައް އަތުރަން ޖެހޭ ވަގުތު ކަމަށް އޭނާ ވިދާޅުވިއެެެވެ.

ޑރ. ޝަހީމް ސިޔާސީ މަސައްކަތް ފެއްޓެވީ އަދާލަތު ޕާޓީންނެވެ. ކުރީގެ ރައީސް މުހައްމަދު ނަޝީދުގެ ވެރިކަމުގެ ދުވަސްވަރު އިސްލާމިކް މިނިސްޓްރީގެ ސްޓޭޓް މިނިސްޓަރުކަން ވެސް ޝަހީމް ވަނީ ކުރައްވާފައެވެ. އޭގެ ފަހުން ކުރީގެ ރައީސް ޑރ. ވަހީދު ހަސަން މަނިކުގެ ވެރިކަމުގައި އަދި ރައީސް ޔާމީންގެ ވެރިކަމުގައި ޝަހީމް ވަނީ އިސްލާމިކް މިނިސްޓަރުކަން ކުރައްވާފައެވެ. 2018 ވަނަ އަހަރުގެ ރިޔާސީ އިންތިހާބު ގައި ޔާމީންގެ ރަނިންމޭޓްގެ މަސައްކަތް ކުރެއްވިއިރު ޝަހީމް ފުުރުއްވަމުން ގެންދެވީ އިސްލާމިކް ޔުނިވާސިޓީގެ ޗާންސެލަރު ކަމުގެ މަގާމެވެ.