މިއަހަރު ރާއްޖެއިން ހައްޖަށް މީހުން ގެންދިއުމަށް ޝައުގުވެރިވާ ފަރާތްތަކަށް ޕްރޮޕޯޝަލް ހުށަހެޅުމުގެ ފުރުސަތު ހުޅުވާލައިފި އެވެ.

އިސްލާމިކް މިނިސްޓްރީން އަންގާރަ ދުވަހު ކޮށްފައިވާ އިއުލާނެއްގައި ވަނީ ރާއްޖެއިން މީހުން ހައްޖަށް ގެންދިއުމާ ބެހޭ ގޮތުން ހޯމަ ދުވަހު ގެޒެޓް ކުރެވިފައިވާ އުސޫލުގައިވާ ގޮތުގެ މަތީން ރާއްޖެއިން މީހުން ހައްޖަށް ގެންދިއުމުގެ ހުއްދައަށް އެދި ޕްރޮޕޯސަލް ހުށަހެޅޭނީ، އެ އުސޫލުގައި ބުނެދީފައިވާ ޝަރުތު ފުރިހަމަވާ ކުންފުނިތަކަށް ކަމަށެވެ.

ޕްރޮޕޯސަލް ފޮތް މިމަހުގެ މަހުގެ 19 ވަނަ ދުވަހުން ފެށިގެން 23 ވާ އާދިއްތަ ދުވަހުގެ ނިޔަލަށް ސަރުކާރު ބަންދު ނޫން ކޮންމެ ދުވަހަކު 8:00 އިން 12:30އަށް އެ އިސްލާމިކް މިނިސްޓްރީން ކައުންޓަރުން ގަންނަ ލިބެން ހުންނާނެ ކަމަށް ވެސް އެ އިއުލާނުގައި ވެއެވެ.

ޕްރޮޕޯސަލް ފޮތް ހުށަހެޅުމާ ބެހޭ ގޮތުން ބާއްވާ ޕްރީ-ބިޑް މީޓިންގ އޭޕްރީލް 24 ވާ ހޯމަ ދުވަހުގެ 13:00 ގައި އެ މިނިސްޓްރީގައި އޮންނާނެ ކަމަށް ވެސް އިސްލާމިކް މިނިސްޓްރީން ބުނެއެވެ.

އެއިލާނުގައި ވާގޮތުން ޕްރޮޕޯސަލް ހުށަހަޅުއްވާނީ ސިޓީއުރައެއްގައި ބަންދު ކުރެއްވުމަށް ފަހު ސިޓީއުރައިގެ ބޭރުގައި "1438 ވަނައަހަރު ދިވެހިރާއްޖެއިން ޙައްޖަށް މީހުން ގެންދިއުމުގެ ހުއްދައަށް އެދި" މިހެން ލިޔެފައެވެ.

ޕްރޮޕޯސަލްތައް ހުޅުވާ ގޮތަށް ހަމަޖެހިފައި ވަނީ އޭޕްރީލް 30 ވާ އާދިއްތަ ދުވަހުގެ ހެނދުނު 10:00ގައި ކަމަށާއި ޕްރޮޕޯސަލް ހުށަހަޅުއްވާ ކުންފުނިތަކުގެ ހާޒިރުގައި މިނިސްޓްރީ އޮފް އިސްލާމިކް އެފެއާޒްގެ ޖަލްސާކުރާ މާލަމުގައި ކަމަށް އިސްލާމިކް މިނިސްޓްރީން ބުނެއެވެ.