ވެންޓިލޭޓަރުތައް ގަތުމުގައި ބޮޑެތި އޮޅުވާލުންތަކެއް ހިންގާފައިވާ ކަމަށް ކުރެވޭ ތުހުމަތުގައި، ހެލްތް މިނިސްޓްރީގެ އިސްވެރިންތަކެއްގެ މައްޗަށް ކުރެވޭ ތުހުމަތާ ގުޅޭ ކޮރަޕްޝަނުގެ މައްސަލަތަކުގެ ތަހުގީގު ވަނީ ނިމުމުގެ މަރުހަލާގައި ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.

އޭސީސީގެ އޮފިޝަލަކު "ރާއްޖެއެމްވީ" އަށް މައުލޫމާތު ދެއްވަމުން ބުރާސްފަތި ދުވަހު ވިދާޅުވީ، ވެންޓިލޭޓަރުތަކުގެ މައްސަލަ ތަހުގީގުކޮށް، ވަރަށް އަވަހަށް ނިންމާލެވޭނެ ކަމަށާއި ނަމަވެސް ނިންމާލެވޭނެ ވަކި ތާރީހެއް ދަންނަވަން ދަތިކަމަށެވެ.

އޭސީސީގެ އޮފިޝަލް ވިދާޅުވީ، ވެންޓިލޭޓަރުތަކުގެ މައްސަލާގައި ތުހުމަތު ކުރެވޭ ފަރާތްތަކުގެ ބަޔާންތައް މިހާރު ނަގަމުންދާ ކަމަށެވެ. އަދި ވީހާވެސް އަވަހަކަށް އެމައްސަލަ ނިންމާލެވޭތޯ ކޮމިޝަނުން މަސައްކަތް ކުރަމުންދާ ކަމަށް ވެސް އޮފިޝަލް ވިދާޅުވިއެވެ.

ވެންޓިލޭޓަރުތަކުގެ މައްސަލާގައި ހެލްތް މިނިސްޓަރު އަބްދުﷲ އަމީންގެ އިތުރުން، ހެލްތް މިނިސްޓްރީގެ ޑެޕިއުޓީ މިނިސްޓަރު އަދި ބިޑް ކޮމެޓީގެ ޗެއާރ ނިޝާމާ މުހައްމަދު ހިމެނެއެވެ. އަދި ޑައިރެކްޓަރ ފައިނޭންޝަލް އެގްޒެކެޓިވް އަހުމަދު އަސްލަމް އާއި ހެލްތް މިނިސްޓްރީ ބިޑް ކޮމެޓީގެ މެމްބަރުންނާއި އެމިނިސްޓްރީގެ ބައެއް އިސްވެރިންގެ މައްޗަށް ތުހުމަތު ކުރެވެއެވެ.

ކޮވިޑް-19ގެ ބަލި މީހުންނަށް ފަރުވާދޭން ރާއްޖެއަށް ބޭނުންވާ ވެންޓިލޭޓަރުތައް ހޯދުމުގައި ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯއާ އެކުގައި ކުރެވިފައިވާ މުއަލާމަތުތަަކަކީ ސައްހަ މައުލޫމާތުކަމަށް ގަބޫލުކުރައްވާކަމަށް ވިދާޅުވެ، އޮޑިޓް ރިޕޯޓަށް ހެލްތް މިނިސްޓަރު އަބްދުﷲ އަމީން ރައްދު ދެއްވާފައެވެ.

އަމީން ވިދާޅުވެފައިވަނީ، ވެންޓިލޭޓަރުތައް ގެންނަން ޑަބްލިޔުއެޗްއޯގެ އެހީތެރިކަމަށް އެދުމުން ރާއްޖޭގައި ހުންނަ ޑަބްލިޔުއެޗްއޯގެ ރެޕްރެޒެންޓޭޓިވް ވަނީ މެދުއިރުމަތިން ވެންޓިލޭޓަރު ސަޕްލައި ކޮށްދޭ ކުންފުންޏެއްގެ މައުލޫމާތު ހިއްސާކޮށްފައި ކަމަށެވެ. ނަމަވެސް ވެންޓިލޭޓަރު ހޯދަން ޑަބްލިޔުއެޗްއޯއާ ރަސްމީ އެއްވެސް ސިފައެއްގައި ލިޔެކިޔުންތަކެއް ބަދަލު ކުރެވިފައި އަދި އެ ކުންފުންޏަކީ ޑަބްލިޔުއެޗްއޯ ރިކޮމެންޑް ކޮށްފައިވާ ކުންފުންޏެއް ނޫން ކަމަށް އޮޑިޓް ރިޕޯޓުގައި ބުނެއެވެެ. އެކަމަކު އަމީން ވިދާޅުވި ގޮތުގައި ރަސްމީގޮތުން މުއާމަލާތެއް ޑަބްލިޔުއެޗްއޯއާ ނުކުރެވޭ ކަމަށް ބުނުމުގެ ޖާގައެއް ނެތް ކަމަށެވެ.

މިނިސްޓަރު އަމީން ވިދާޅުވެފައި ވަނީ، ކޮވިޑް-19ގެ ހާލަތާއި ގުޅިގެން މިނިސްޓްރީގެ މުވައްޒަފުން މަސައްކަތް ކޮށްފައިވާނީ އިހްލާސްތެރިކަމާއި އެކީ ރައްޔިތުންގެ ފުރާނަ ސަލާމަތް ކުރުމަށްޓަކައި ހަވާލުކުރެވުނު މަސްއޫލިއްޔަތުގެ ތެރެއިން ކަމަށެވެ.

ބިޑް ކޮމިޓީގެ ޗެއަރ ނިޝާމާ މުހައްމަދު ވިދާޅުވީ، ވެންޓިލޭޓަރުތައް ގެންނަން ދުބާއީގެ ކުންފުންޏަށް ހަވާލުކޮށްފައިވަނީ އެ ކުންފުނީގެ ފަންނީ އަދި ގާބިލުކަމަށް ބެލުމަށްފަހު ކަމަށެވެ. ވެންޓިލޭޓަރުގެ މައްސަލާގައި އަމަލުކޮށްފައިވަނީ ހެޔޮ ނިޔަތުގައި ކަމަށް ނިޝާމާ ވިދާޅުވާ ވިދާޅުވުން އޭނާ ވަނީ ތަކުރާރުކުރައްވާފައެވެ.

އޮޑިޓް ރިޕޯޓުގައި ބުނެފައިވަނީ، ދުބާއީގެ އެގްޒެކިއުޓާރސް ޖެނެރަލް ޓްރޭޑިން އަކީ، ވެންޓިލޭޓަރު ގެންނަން ހަވާލު ކުރި ތިން ކުންފުނީގެ ތެރެއިން ސަރުކާރުން އެޑްވާންސްކޮށް ފައިސާ ދޫކުރި ހަމައެކަނި ކުންފުންޏެވެ. އެމީހުން ރާއްޖެއަށް ވެންޓިލޭޓަރެއް ފޯރުކޮށްދޭނެ އަގެއް ކަމަށް ބުނެފައިވަނީ، 32،500 ޑޮލަރަށެވެ. އެއީ އެހެން ކުންފުނިތަކުން ހުށަހެޅި އަގަށްވުރެ މާބޮޑުތަނުން ވެސް ބޮޑު އަގެއް ކަމަށް ވެއެވެ. އެ ކުންފުންޏާ މަސައްކަތް ހަވާލުކުރީ 34 މިލިއަން ރުފިޔާ އަށް ކަމަށްވާއިރު، މިދިޔަ އޭޕްރީލް މަހުގެ ދެވަނަ ދުވަހު، ވެންޓިލޭޓަރުތައް ގެނައުމުގެ އެގްރީމަންޓްގައި ސޮއިކޮށްފައިވެއެވެ.

އަދި އޭޕްރީލް މަހުގެ ތެރޭގައި ދެ ފަހަރެއްގެ މަތިން އެޑްވާންސަށް 30.9 މިލިއަން ރުފިޔާ ވެސް ވަނީ ދައްކާފައެވެ. އެގްރީމަންޓްގައި 14 ދުވަހުގެ ތެރޭގައި ވެންޓިލޭޓަރުތައް ރާއްޖެ ގެނެވޭނެ ކަމަށް ބުނެފައިވާއިރު، މިހާތަނަށް ލިބިފައިވަނީ 10 މޮބައިލް ވެންޓިލޭޓަރެވެ. މިއީ ހެލްތް މިނިސްޓްރީއާއެކު ވެފައިވާ އެއްބަސްވުމުގެ ދަށުން ކުރިން ފޮނުވި ވެންޓިލޭޓަރުތަކުގެ ބަދަލުގައި ފޮނުވާފައިވާ ވެންޓިލޭޓަރު ތަކެކެވެ. ކުރިން ރާއްޖެ ފޮނުވާފައި ހުރީ ހެލްތް މިނިސްޓްރީން ހުށަހެޅި މިންގަނޑުތަކަށް ނުފެތޭ ވެންޓިލޭޓަރުތަކެކެވެ.