ވިހެއުމާއި ސިޒޭރިއަން އަދި ތުއްތު ކުއްޖާގެ ސިއްޙީ ޗެކަޕް ހިމެނޭހެން ޙާއްސަ ޕެކޭޖްތަކެއް ޓްރީ ޓޮޕް ހޮސްޕިޓަލުން ތައާރަފްކޮށްފިއެވެ.

މިކަމާއި ގުޅޭ މައުލޫމާތު ހިއްސާކޮށް ޓްރީޓޮޕް ހޮސްޕިޓަލުން ނެރުނު ބަޔާނެއްގައި ބުނީ، އަލަށް ތައާރަފުކުރި ޕެކޭޖުތަކުގައި ހިމެނެނީ ނޯމަލް ޑެލިވަރީ ޕެކޭޖަކާއި އިލެކްޓިވް ސިޒޭރިއަން ސެކްޝަން ޑެލިވަރީ ޕެކޭޖް ކަމަށެވެ. އެގޮތުން، މި ދެ ޕެކޭޖްގައި ތުއްތު ކުއްޖާއަށް ޙާއްސަކޮށްގެން ސިއްޙީ ސްކްރީނިންގްއާއި ކޮންސަލްޓަންޓް އަދި މިޑްވައިފް ކެއާގެ ޙިދުމަތް ވެސް ފޯރުކޮށްދޭނެކަމަށެވެ.

ޕެކޭޖުތައް ނެގުމުގެ ފުރުސަތު މިއަހަރުގެ ނިޔަލަށް ޓްރީ ޓޮޕުން ހުޅުވާފައިވާއިރު، ނޯމަލް ޑެލިވަރީ ޕެކޭޖުގެ އަގަކީ 16،000ރ. އެވެ. އަދި އިލެކްޓިވް ސީ-ސެކްޝަން ޑެލިވަރީ ޕެކޭޖުގެ އަގަކީ 27،500ރ. އެވެ. މި ޕެކޭޖްތަކުގެ ދަށުން ޓްރީ ޓޮޕް ހޮސްޕިޓަލުގެ ޓްވިން ޝެއާރިން ރޫމެއްގައި ހުރުމާއި ކެއުމާއި ނާސިން ކެއާ އަދި އޮބްސްޓެޓްރިކްސް، ޕީޑިއަޓްރިކްސް، ނިއޯނެޓޮލޮޖީ އަދި ގައިނައިކޮލޮޖީގެ އެންމެ ފެންވަރު ރަނގަޅު ކޮންސަލްޓެންޓުންގެ ރޫޓިން ވިޒިޓްސްގެ ކަންކަން ހަމަޖެހިގެންދާއިރު ނޯމަލް ޑެލިވަރީ ޕެކޭޖުން ހޮސްޕިޓަލުގައި ދެ ދުވަހުގެ ހުރުން ލިބޭނެއެވެ. އަދި ސީ-ސެކްޝަން ޕެކޭޖުން ތިން ދުވަހާ ހަމައަށް ހުރުން ހަމަޖައްސައިދެވޭނެކަމަށް ޓްރީޓޮޕުން ބުނެއެވެ.

މީގެ އިތުރުން ވިހެއުމަށްފަހު ޖަހަން ޖެހޭ ވެކްސިންތައް ހިމެނޭ ނިއުބޯން ހެލްތުކެއާ ޕްރޮގްރާމުގެ ހިދުމަތް ވެސް މި ދެ ޕެކޭޖާއެކު ލިބޭނެ ކަމަށް ޓްރީޓޮޕް ހޮސްޕިޓަލުން ވަނީ ބުނެފައެވެ. އަދި ތުއްތު ކުއްޖާ ހިތުގެ ބަލިތަކަށް ސްކްރީން ކުރުމާއި (ކްރިޓިކަލް ކޮންޖެނިޓަލް ހާޓް ޑިޒީސް (ސީސީއެޗްޑީ) ސްކްރީނިން، ލޭގެ ގްރޫޕް އަދި މިނޫން ވެސް ބޭސިކް ލޭގެ ސްކްރީނިން، އަޑުއެހުމުގެ ސްކްރީން، ކެޓަރެކްޓް ސްކްރީނިންއަކީ ވެސް މި ޕެކޭޖުތަކާއެކު ލިބޭ އިތުރު ޙިދުމަތްތަކެވެ.

ބަޔާނުގައި އިތުރަށް ބުނީ ހޮސްޕިޓަލުން އަމަލުކުރަމުންދަނީ ތުއްތުކުދިންނަށް ގާތުން ކިރުދިނުމާއި ގުޅޭގޮތުން ޔުނިސެފްއާއި ޑަބްލިއު އެޗް އޯ އެކުލަވާލާފައިވާ ބައިނަލްއަގްވާމީ ގައިޑްލައިން (ބޭބީ ފްރެންޑްލީ ހޮސްޕިޓަލް އިނީޝިއޭޓިވް) އާއި އެއްގޮތްވާ ގޮތުގެ މަތިންކަމަށާއި، ވިހެއުމަށްފަހު ގާތުން ކިރުދިނުމަށް ބާރު އެޅުމާއި، ދަރިފުޅާއި މައިމީހާ އާއި ދެމެދު ހަމާއި ހަމުގެ ގުޅުން ދެމެހެއްޓުމަށް ހޭލުންތެރިކުރުން ހިމެނެއެވެ. ހަމައެއާއެކު ގާތުން ކިރު ދިނުމުގައި އެންމެ ރަނގަޅު ގޮތްތަކަކީ ކޮބައިކަން ހެލްތުކެއާގެ ތަޖުރިބާކާރުންގެ ފަރާތުން ވެސް ފޯރުކޮށްދޭނެކަމަށެވެ،

ޓްރީ ޓޮޕް ހޮސްޕިޓަލުގެ ފުރިހަމަ ހެލްތުކެއާގެ ހިދުމަތްތައް ފޯރުކޮށްދެނީ ހުނަރުވެރި ޑޮކްޓަރުންނާއި ނަރުހުން ހިމެނޭ ހާއްސަ ކްލިނިކަލް ޓީމަކާއެކު، ޒަމާނީ ހެލްތުކެއާ ފެސިލިޓީއެއްގައެވެ. ޓްރީޓޮޕް ހޮސްޕިޓަލުން ބުނީ، ތުއްތު ކުއްޖަކު ދުނިޔެއަށް އުފަންވުމަކީ އެކުއްޖާގެ މައިންބަފައިންނާއި އާއިލާތަކަށް އެހާ މުހިންމު ތަޖުރިބާއަކަށްވުމާއެކު، ޕެންޑެމިކަކާއި ކުރިމަތިލާންޖެހިފައިވާ މިފަދަ ދުވަސްވަރެއްގައި މިކަމާ ގުޅޭގޮތުން އިތުރަށް ކަންބޮޑުވިޔަ ނުދިނުމަށް އިތުރު ފިޔަވަޅުތަކެއް އަޅަމުން ދާކަމަށެވެ. އެގޮތުން އިންފެކްޝަން ކޮންޓްރޯލްކުރަން ހެދިފައިވާ ބައިނަލްއަގްވާމީ ގައިޑްލައިންތަކަށް އަމަލުކުރަމުންދާއިރު، ތުއްތުކުއްޖާއާއި މައިމީހާގެ ރައްކާތެރިކަން ކަށަވަރުކޮށްދިނުމަށްޓަކައި ހާއްސަ ރައްކާތެރިކަމުގެ ފިޔަވަޅުތަކެއް ޓްރީ ޓޮޕް ހޮސްޕިޓަލުން ދަނީ އަޅަމުންނެވެ.