ކޮވިޑް-19ގެ މިހާލަތުގައި ގުރޫޕް ހަދައިގެން ކަސްރަތު ކުރުން މިހާރު ވެސް ހުއްދައެއް ނުވާނެ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
އަންގާރަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ، ފަސް މީހުންނަށް ވުރެ ގިނަ މީހުން އެއްވެގެން ކަސްރަތު ޕްރޮގްރާމްތައް ނުވަތަ މޫދުގައި ވެސް ޕްރޮގްރާމްތައް ކުރިއަށް ގެންދިއުމަކީ ހުއްދަ ކަމެއް ނޫން ކަމަށެވެ.
ޑރ. ނަޒްލާ ވިދާޅުވީ ބޭރަށް ނުކުމެ ކަސްރަތު ކުރުމުގެ ފުރުސަތު ދީފައި އޮތީ ވަކި އުސޫލެއްގެ ތެރެއިން ކަމަށާއި، ހުއްދަ ދީފައިވަނީ ވެސް ވަރަށް ގިނަ ކަންތައްތަކަށް ބެލުމަށްފަހު މިފަދަ ސްޓްރެސް ދަނޑިވަޅެއްގައި ކަސްރަތު ކުރުމަކީ ވެސް މުހިންމު ކަމެއްގެ ގޮތުގައި ދެކޭ ކަމަށެވެ. އަދި މިކަންކަން ކުރަނީ ހަމައެކަނި އާންމު ރައްޔިތުންގެ ވިޔަފާރިތަކަށް ބެލުމަށް ފަހު ނޫން ކަމަށް ޑރ. ނަޒްލާ ވިދާޅުވިއެވެ.
މިގޭ އިތުރުން ޑރ. ނަޒްލާ ވިދާޅުވީ ޖިމްތައް ހުޅުމުގެ ހުއްދަ ދީފައިވަނީ ވެސް އުސޫލެއްގެ ތެރެއިން ކަމަށާއި، އެތަންތަން ހިންގަމުންދަނީ އެ އުސޫލުގެ ތެރެއިންތޯ ބެލުމުގެ މަސައްކަތްތައް ދުވަސް ދުވަހުން ކުރިއަށް ގެންދާ ކަމަށެވެ. އެގޮތުން ވަކި އަދަދަކަށް ޖިމްއަށް މީހުންނަށް ވަދެވޭއިރު، ޑިސްއިންފެކްޓް ކުރުމުގެ މަސައްކަތް ކުރިއަށް ގެންދާނެ ކަމަށް ޑރ. ނަޒްލާ ވިދާޅުވިއެވެ. އަދި ގަވާއިދާ ހިލާފަށް ހިންގާފައިވާ ބައެއް ޖިމްތައް ބަންދު ކުރިކަން ވެސް ޑރ. ނަޒްލާ ފާހަގަ ކުރެއްވިއެވެ.
ދަނޑުތަކުގައި ކުޅިވަރުތައް ކުޅުމުގެ ހުއްދަ ނުދޭ ސަބަބުތަކަށް އަލިއަޅުއްވާލައްވާ ޑރ. ނަޒްލާ ވިދާޅުވީ ޖިމްތަކުގައި ކަސްރަތު ކުރުމާއި، ދަނޑުތަކުގައި ކުޅިވަރު ކުޅުން ވަރަށް ތަފާތު ކަމަށެވެ. ކުޅިވަރު ކުޅޭއިރު ޕިޒިކަލް ކޮންޓެކްޓްވާނެ ކަމަށާއި، އެއީ ވަރަށް ބޮޑަށް ބަލި ފެތުރޭނެ ސަބަބެއް ކަމަށް ޑރ. ނަޒްލާ ވިދާޅުވިއެވެ.
އެކަހަލަ ކުޅިވަރުތައް ކުޅޭއިރުގަ މާސްކް އެޅުމުގެ ފުރުސަތެއް ނޯންނާނެ. އެކަކާ އަނެކަކު ޑިސްޓެންސް ބާއްވައިގެން އެކަމެއް ނުކުރެވޭނެ. ބާރަށް ދުވެ މިކަހަލަ ކަންތައްތައް ކުރާއިރުގަ ހަމަ މި އާންމުކޮށް މިހެން ކުރިމަތީގަ ހުރެގެން ވާހަކަ ދައްކާއިރުގަ މާބާރަށް ނޭވާލާއިރުގަ އޭގެ ސަބަބުން ހަމަ ބޮޑަށް ވައިރަސް ހަށިގަނޑުގައި ހުރި ކަމަށްވަންޏާ އެވައިރަސް ބޭރަށް ނުކުތުމުގެ ފުރުސަތު އޮންނާނެ. އެހެންވީމަ ވަރަށް ވަރަށް ހައިރިސްކް ކަމަކަށްވާތީ އެކަންތައްތައް މިވަގުތު ހުއްދަ ދިނުމަށް އަޅުގަނޑުމެންގެ ހެލްތް ޓީމަކަށް ނުފެނޭ އެނގޭތޯ. މިހާރު ބަލި ފެތުރިފައިވާ ހާލަތަށް ބަލާއިރު.ތަރުޖަމާނު ޑރ. ނަޒްލާ ރަފީގު
ޑރ. ނަޒްލާ ވިދާޅުވީ ދަނޑުތަކުގައި ކުޅިވަރު ކުޅުމަކީ ޑިސްޓެންސް ވެސް ބެހެއްޓޭނެ ކަމެއް ނޫން ކަމަށެވެ. އަދި މިހާލަތުގައި ދަނޑުތަކުގައި ކުޅިވަރު ކުޅުމަށް ފުރުސަތު ދިނުމަކީ އެންމެ ރައްކާތެރި ގޮތް ނޫން ކަމަށް ޑރ. ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ ފިޔަވަޅުތައް އަޅާއިރު އެންމެ ފުރަތަމަ ބަލަނީ އާއްމު ސިއްހަތަށް މި ބަލި ފެތުރުމަށް ހުރި ފުރުސަތަކީ ކޮބައިތޯ ކަމަށާއި، މިވަގުތު ބަލީގެ ހާލަތަށް ކަމަށެވެ. އަދި ރައްކާތެރިވުމަށް އަޅާ ފިޔަވަޅަކުން ނުކުންނަ ނަތީޖާއަށް ބަލާނެ ކަމަށް ޑރ.ނަޒްލާ ވިދާޅުވިއެވެ.
