އަހަރަކު 6 ލައްކަ ފަތުރުވެރިންނަށް އަމާޒު ކޮށްގެން އައްޑޫ ގަމުގެ އިންޓަރނޭޝަނަލް އެއަރޕޯޓް ތަރައްޤީ ކުރުމަށް 17 މިލިއަން ޑޮލަރު އިންވެސްޓް ކުރުމަށް ނިންމާފައިވާ ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
ރާއްޖެ.އެމްވީ އާ ވާހަކަ ދައްކަވަމުން ފައްޔާޒް ވިދާޅުވީ އައްޑޫ އެއަރޕޯޓް ތަރައްޤީ ކުރުމަށް ތައްޔާރު ކޮށްފައިވާ ޕްރޮޕޯސަލާއި އެއްގޮތަށް އެއަރޕޯޓް ތަރައްޤީ ކުރުމަށް ނިންމާފައިވަނީ އިންޑިއާ ސަރުކާރުގެ ލައިން އޮފް ކްރެޑިޓްގެ ތެރެއިން، އައްޑޫ ތަރައްޤީ ކުރުމަށް ހަމަޖައްސާފައިވާ ކޮމްޕޯނަންޓުން ކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ އައްޑޫއަށް ފަތުރުވެރިން ގެނައުމަށް އެއަރޕޯޓް ތަރައްޤީވުން ވަރަށް މުހިއްމުކަމަށާއި، ފަތުރުވެރިކަން ރަނގަޅުވުމަށް އެއަރޕޯޓް ރަނގަޅުވާން ޖެހޭކަމަށެވެ.
އެއަރޕޯޓުން ފައިދާވާން ފަށާނީ ފަތުރުވެރިކަން އައިސްގެން. ޕްރައިވެޓް ސެކްޓަރ މީހުނެއް ނުކުރާނެ ގެއްލުންވާ ގޮތަކަށް. ސަރުކާރުން އެކަން މިކުރަނީއިކޮނޮމިކް މިނިސްޓަރ ފައްޔާޒު އިސްމާއިލް
މީގެ އިތުރުން، ކުރު ރާސްތާގާއި އެއަރޕޯޓުން ގެއްލުންވި ނަމަވެސް ދުރު ރާސްތާގައި އައްޑޫއާއި ދެކުނުގެ މުޅި އިގްތިސާދަށް އޭގެ ފައިދާ ކުރާނެ ކަމަށް ފައްޔާޒް ވިދާޅުވިއެވެ.
ސަރުކާރުގެ ވިސްނުމަކީ އިންފްރާސްޓަރަކްޗަރ، ރައްޔިތުންނަށް ބޭނުންވާ އަސާސީ ޚިދުމަތްތައް ޤާއިމްކޮށްދިނުން، އައްޑޫއަށް ގޮސް މީހުންނަށް ވަޒީފާ އަދާކުރެވޭނެ މަގު ފަހިުކުރުން.. ދަރިންނަށް ރަނގަޅު ތައުލީމެއް ދީ، ރަނގަޅު ސިއްހީ ފަރުވާ ލިބޭނެ އިންތިޒާމް ހަމަޖެއްސުން.އިކޮނޮމިކް މިނިސްޓަރ ފައްޔާޒު އިސްމާއިލް
ފައްޔާޒް ވިދާޅުވީ އައްޑޫގައި 300 މިލިއަން ޑޮލަރުގެ ޕްރޮޖެކްޓްތައް މިސަރުކާރުން ހިންގާނެ ކަމަށެވެ. އޭގެ ތެރޭގައި ހުރިހާ މަގެއްގައި ތާރުއެޅުން، އައްޑުއަށް ދިމާވެފައިވާ ކަރަންޓުގެ މައްސަލަ ހައްލުކުރުމާ، ޓޫރިޒަމް ތަރައްޤީ ކުރުމާއި، އައްޑޫ ސިޓީގެ ބައެއް ރަށްތަކަށް ބިން އިތުުރު ކުރުމަށް ބިން ހިއްކުން ހިމެނެއެވެ. އަދި ބިން ހިއްކުމުގެ ތެރޭގައި ތިން ހަތަރު ރިސޯޓެއް ތަރައްޤީ ކުރުމަށް ވެސް ބިން ހިއްކާނެ ކަމަށް ފައްޔާޒް ވިދާޅުވިއެވެ.
