މަސްތުވާތަކެއްޗާއެކު ކިނބިދޫ އިން މީހަކު ހައްޔަރު ކޮށްފިއެވެ.
ފުލުހުން ބުނީ ތ. ކިނބިދޫ އިން މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި ކަރުދާސް ކޮޅަކާއެކު މީހަކު ހައްޔަރު ކޮށްފައިވާ ކަމަށެވެ.
މި މައްސަލައާ ގުޅިގެން ހައްޔަރު ކޮށްފައިވަނީ 32 އަހަރުގެ ދިވެހި ފިރިހެނެއް ކަމަށާއި އެމީހާ ހައްޔަރު ކޮށްފައިވަނީ އާދިއްތަ ދުވަހުގެ 19:44 ހާއިރު ތ. ކިނބިދޫ ރަށު ތެރެ ޕެޓްރޯލް ކުރުމުގައި ހަރަކާތްތެރި ވަމުން ދިޔަ ފުލުހުންނަށް އޭނާގެ އަމަލުތައް ހުރި ގޮތުން މަސްތުވާތަކެތި ގެންގުޅޭ ކަމަށް ޝައްކު ކުރެވިގެން ކަމަށް ފުލުހުން ބުންޏެވެ.
އަދި އެމީހާ ހުއްޓުވައި، ބަލައި ފާސް ކުރަން އުޅުމުން އޭނާގެ އަތުން އެއްޗެއް ވައްޓާލިތަން ފުލުހުންނަށް ފެނުމާއި ގުޅިގެން އެވަގުތު އޭނާ ހުރި ތަން ބަލައި ފާސް ކުރިއިރު އޭނާ ހުރި ދިމާ ބިންމަތިން މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި ކަރުދާސްކޮޅު ފެނިފައިވާ ކަމަށެވެ.
މި މައްސަލަ ކިނބިދޫ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.
ފުލުހުންގެ ޑްރަގް އެންފޯސްމަންޓް ޑިޕަރޓްމަންޓާއި އިންޓަލިޖެންސުން ހިންގާ ހާއްސަ އޮޕަރޭޝަންތަކުގައި ގިނަ އަދަދެއްގެ މަސްތުވާތަކެއްޗާއި ފައިސާ ފުލުހުން ދަނީ ހޯދަމުންނެވެ. އެގޮތުން މިދިޔަ ހަފްތާގެ ހޯމަ ދުވަހު ހިންގި އޮޕަރޭޝަނެއްގައި ވަނީ ތިން ކިލޯގެ މަސްތުވާތަކެއްޗާއެކު ދެމީހަކު ވެސް ހައްޔަރު ކޮށްފައެވެ. އަދި ވަގަށް ނަގާފައިވާ ގިނަ އަދަދެއްގެ ފައިސާ ވެސް ފުލުހުން ވަނީ މި އޮޕަރޭޝަންގައި ހޯދާފައެވެ.
