ރާއްޖެއަށް ފަތުރުވެރިން ގެނައުމަށް މިހާރު ކުރަމުން ގެންދާ މަސައްކަތްތަކުގެ މަޢުލޫމާތު ވަޒީރުންގެ މަޖިލީހާ ހިއްސާކޮށްފިއެވެ.

ރައީސް އޮފީހުން ބުނީ އަންގާރަ ދުވަހުގެ މެންދުރުފަހު އޮންލައިންކޮށް ބޭއްވި މި މަޖިލީހުގެ ޖަލްސާގައި، އަތޮޅުތެރޭގެ ރަށަކުން ގިނަ ކޭސްތަކެއް ފެނިފައިވާތީ، އެކަމާ ގުޅިގެން އެ ރަށުގައި އަޅަމުންގެންދާ ޚާއްޞަ ފިޔަވަޅުތަކާއި، އަތޮޅުތަކުން އެހެން ބަލިތަކަށް ފަރުވާ ހޯދަންޖެހޭ ފަރާތްތަކަށް ފަރުވާ ދެވޭނެ ފަސޭހަ ގޮތްތަކެއް އަތޮޅުތަކުގައި ހަމަޖެއްސެވުމަށް ކުރަމުން ގެންދާ މަސައްކަތްތަކުގެ މައުލޫމާތު ހިއްސާކޮށްފައިވާ ކަމަށެވެ.

ރާއްޖޭގެ ފަތުރުވެރިކަން އިޝްތިހާރު ކުރުމަށާއި، ފަތުރުވެރިންނަށް ފަސޭހައިން ރާއްޖެއަށް ދަތުރުފަތުރު ކުރެވޭނެ އިންތިޒާމުތައް ހަމަޖެއްސެވުމުގެ ގޮތުން މިނިސްޓްރީ އޮފް ޓޫރިޒަމުން ކުރައްވަމުން ގެންދާ މަސައްކަތްތައް ވެސް ވަޒީރުންގެ މަޖިލީހުގެ މެންބަރުންނާ ހިއްސާ ކުރެވިފައިވާ ކަމަށް ރައީސް އޮފީހުން ބުނެއެވެ.

މާލެ ސަރަހައްދުގައި ކޮވިޑް 19 ކޮންޓްރޯލްކުރުމަށްޓަކައި މިހާރު އަޅަމުން ގެންދާ ފިޔަވަޅުތަކާ ގުޅޭ އެންމެ ފަހުގެ މަޢުލޫމާތު ވަޒީރުންގެ މަޖިލީހާ ހިއްސާ ކޮށްފައިވާއިރު ރާއްޖޭގައި އެންމެ ފުރަތަމަ ކޭސްއެއް ފެނުނުތާ މި ވަނީ 6 މަސް ދުވަސްވެފައެވެ.

މިކަމާއި ގުޅިގެން ހެލްތް އެމަރޖެންސީ އޮޕަރޭޝަން ސެންޓަރ (އެޗްއިއޯސީ) ގެ ތަރުޖަމާނު ޑރ ނަޒްލާ ރަފީގު ވިދާޅުވީ ކޮވިޑަށް ޕޮޒިޓިވްވި މީހުންގެ އަދަދުތައް އިތުރުވަމުން ދިއުމާއި ގުޅިގެން އިތުރު ފިޔަވަޅުތަކެއް އަޅުއްވަމުން ގެންދަވާ ކަމަށެވެ. އަދި މިކަމުގެ ނަތީޖާ ފެންނާނެ ކަމަށް އެންމެ އަވަހަށް ވެސް ބެލެވެނީ މި މަހުގެ ފަހުކޮޅާ ހިސާބުގައި ކަމަށެވެ. ޑރ. ނަޒްލާ ވިދާޅުވީ މިއީ އާންމުން ކުރި ނުވަތަ ކުރައްވަމުން ގެންދަވާ މަސައްކަތުން ނުކުންނާނެ ނަތީޖާއެއް ކަމަށެވެ.